On tlen nochiuas ijkuak uajlas on ueyixtikaj Rey
32
Isaías no okijtoj: “Se tonajli nemis sen rey yejuan tlayekanas ken kitocaroua, niman nemiskej tlayekankej yejuan tlayekanaskej ikan yolmelajkilistli. 2 Nochimej yejuamej kimpaleuiskej niman kinmanauiskej on israelitas. Yeskej kenon kampa niyanalo ijkuak chikauak ajaka noso chikauak ajakakiaui. No ijki, yeskej kenon ayajtoktsitsimej yejuan ika natekiya kampa tlaluakkan, niman yeskej ken itlaseuajlo sen ueyitetl yejuan onkaj ipan xalpatlajkan. 3 Nochimej on yejuan Dios kiminnotsas, kuajli kakiskej niman kajsikamatiskej on tlen Dios kiminnauatia ma kichiuakan. 4 On yejuan tontos kiseliskej kajsikamatilistli, niman on yejuan nenepochiuij, kuajli tlajtlajtoskej.
5 'Ijkuakon on israelitas xok kintlakaitaskej on yejuan tontos niman on tlakajkayajkej. 6 Yejua in melauak pampa on yejuan tontos sanoyej tekualanijkej ken tlajtlajtouaj niman san kinejnemilijtokej kichiuaskej tlen xkuajli. Yejuamej kitechiuiliaj tlen temojtij xkuajli niman hasta kijtouiliaj toTEKO on tlen xmelauak; xkintlakualtiaj on yejuan apismikij niman xkinatliltiaj on yejuan amikij. 7 On tlakajkayajkej sanoyej kimatij ken tlakajkayauaj, niman kuajli kinejnemiliaj ken kichiuaskej inxompayejyeualis. Yejuamej kinchiuiliaj tlen sanoyej xkuajli on yejuan mayankej niman on yejuan xitlaj kipiyaj, pampa impan istlakatij inmixpan on jueces para maka ma kinmanauikan. 8 Pero on yejuan kuajli inyojlo, uej san kinemiliaj kichiuaskej tlen kuajli, niman nochipa ijki tlanemiliaj."
On tlen xkuajli impan nochiuas on siuamej yejuan san tlajtlatsiktikej
9 Isaías okinmijlij on siuamej: “Nemejuamej siuamej yejuan nentlatsijkanemij niman xitlaj nenkonmatstokej, pampa nenkinemiliaj sanoyej kuajli nennemij, kuajli xkakikan tlinon nemechijlis. 10 Aman nemoyolika nennemij, pero kanaj ipan se xipan sanoyej nenmojkakuekuetlakaskej pampa tlatlajtlamis niman xokuitlaj yes tlinon nenkipixkaskej; nion trigo nion uvas xok onyas. 11 Peua xmojkakuekuetlakakan nemejuamej siuamej yejuan aman nenmoyolika nennemij niman xitlaj nenkonmatstokej. Xmotlakenpatlakan niman xtlalikan nemoajmankatlaken para xteititikan ika sanoyej nenmajmanaj. 12 Xteititikan ika melauak sanoyej nenmajmanaj, hasta xmoyelpanuitekikan, pampa ipan on nemotrigojtlatokuan niman nemouvajtlatokuan kampa sanoyej tlatlaki, nochi tlamis. 13 Nochi nemopaís uitsyouas niman tlakoyouas. Xchokakan, pampa nochiuiyan techajchan ipan on ueyikalpan Jerusalén, tlamis on paktli. 14 On ueyikalpan kampa sanoyej tojlan chantiua niman ipan on palacio kampa nemi on rey, xok yakaj nemis. On tepanchinantin niman on torres yejuan kimanauiyaj on ueyikalpan xok onyaskej. Niman ompa yej chantiskej tepepolokomej niman ompa tlakuajkuaskej oksekimej yolkej.
15 Ijkin nochiuas hasta ijkuak on ipoder toTEKO yejuan nochi ueli kichiua, oksejpa yejkos topan de ne iluikak, niman on xalpatlajkan kikuepas tlajli de tlatôktin, niman on tlajli más kuajli tlatlakitis. 16 Nochiuiyan ipan on país tlayekanaskej ikan yolmelajkilistli niman yolchipaualistli. 17 Pampa nochimej nouikaskej ipan yolmelajkilistli, onyas yoseuilistli, niman inyolika nemiskej para nochipa. 18 Ijkuakon, on israelitas itlapejpeniluan toTEKO, inyolika nemiskej, niman xitlaj kimpajsolos kampa chantiskej 19 maski on tejsiutli kitsineuas on kojyoj niman maski kixoxotonis on ueyikalpan Jerusalén. 20 Maski ijki nemopan nochiuas, nemejuamej yejuan nenchantij Jerusalén, sanoyej nempakanemiskej. Nenkipiyaskej miyek atl para ika nenkatekiskej nemotlatok, niman on uakaxtin niman polokomej san kanon uelis tlakuajkuaskej.”