On tlen sanoyej xkuajli impan nochiuas on israelitas yejuan kitlajtlaniliskej on rey de Egipto ma kimpaleui
31
Isaías okijtoj: "Sanoyej tlajyouiskej on israelitas yejuan komintlajtlaniliaj on egipcios para yejuamej ma kimpaleuikan. Intech yejuamej kitlaliaj inyojlo pampa kimpiyaj miyekej caballos niman carretas de nouijsokilistli; niman no, kimpiyaj miyekej soldados yejuan caballojyetinemij. Pero on Dios de Israel akin Yektli, uej xkitlajtlaniliaj para yejua ma kimpaleui. 2 Pero toTEKO sanoyej tlamatki, niman kimati kenijki kintlajyouiltis, pampa ijkuak yejua kijtoua itlaj kichiuas, yejua kichiua. Yejua kincastigaros on xompayejyeuamej, iminuan on yejuan kimpaleuiyaj para kichiuaj tlen xkuajli.3 'On egipcios san tlaltikpaktlakamej, yejuamej xken Dios; on imincaballos no uelij mikij. Yejua ika, toTEKO ikan ipoder kincastigaros on egipcios. —> On yejuan tepaleuiskej niman on yejuan kimpaleuiskej, san se tipan mikiskej."
4 ToTEKO onechijlij: "Ijkon ken sen león xkineki ma kuilikan on borrego yejuan yokimiktij, maski on tlajpixkej san sekan kinekij kimomojtiskej para kuiliskej, niman yejua xkinokauilia, nejua no ijki niuajlas nikinuajmanauis notlapejpeniluan on israelitas yejuan chantij ne Jerusalén. 5 Ken on tototl patlantinemi ikuapan itepajsol para kintlajpiya ikoneuan, nejua nemoTEKO akin nochi ueli nikchiua, no ijki niktlajpiyas Jerusalén; nejua nicuidaros niman nikmakixtis."
6 Isaías ijkin kiminnauatia on israelitas "Teuejkakoneuan itech Israel, xmokuepakan itech toTEKO yejuan sanoyej yonenkuajkualanijkej ikan nemoxipanteitalis. 7 Ijkon xchiuakan pampa on tonajli ijkuak nenmochimej neka nenkominxiniskej on ídolos de oro niman de plata yejuan onenkinchijchijkej ikan on nenmomauan tlajtlakolejkej, 8 on asirios kinmiktiskej ikan espada, pero xkichiuaskej on tlaltikpaktlakamej, yej kichiuas Dios. Ika on tlauijsokilistli, on asirios ontlatlaksaskej para cholojteuaskej, niman on telpokamej kinmajsiskej para kinuikaskej esclavos. 9 Niman pampa sanoyej onyas nemojtijli, on iminrey cholojteuas. No ijki on soldadostlayekankej kajteuaskej on kampa tlajpiyaj. Ijkin kimelajkaijtoua toTEKO, ika yejua ye kipiya ne Jerusalén sen tlikuijli kampa kincastigaros itlauelikniuan."