On tlen sanoyej xkuajli impan nochiuas on israelitas yejuan xipan kitaj toTEKO
30
Dios ijkin kinmijlia on israelitas on tlen impan nochiuas:"Sanoyej xkuajli yes para on israelitas yejuan xipan nechitaj, yejuan kichiuaj itlaj niman xachtoj nechtlajtoltiaj tla kuajli, niman ijki más tlajtlakouaj, niman ijki más tlajtlakouaj. 2 Yejuamej xachtoj onechtlajtoltijkej tla kuajli para yaskej kontlajtlaniliskej on rey de Egipto para ma kimpaleui. Yejuamej san okinemilijkej ika kuajli nemiskej tla Egipto kinmanauiya. 3 Pero ipoder on rey de Egipto xuelis kimpaleuis; on israelitas pinauaskej pampa Egipto xuajlas para kimpaleuis. 4 Maski on tlajtojkamej de Judá yonenkintitlankej hasta ne Soan niman ne Hanes, on yejuan iuejueyikalpanuan Egipto, 5 san onnopinajtiskej, pampa Egipto xuelis itlaj ika kimpaleuis, niman san nokajkayauaskej niman nopinajtiskej pampa xitlaj kuajli kiseliskej de on país."
6 Isaías okijtoj: "In yejua tlen okijtoj Dios de on yolkej yejuan nemij ipan on xalpatlajkan itoka Sur: 'Imintlajtojkauan on israelitas panouaj kampa nemij on yolkej de Néguev, ipan on tlajli kampa sanoyej xtlakualkan, kampa chantij leones yejuan nanalkaj, kouamej, niman on temojmojtijkej kouamej intoka dragones yejuan patlanij. Yejuamej kitkij on tlajtlamach yejuan patioj niman kitkij nochi iminriquezas ipan impolokouan niman ipan imincamellos para yauij Egipto, ipan on país yejuan xitlaj ika tepaleuiya. 7 Egipto xitlaj ueli kichiua, nion xueli tepaleuiya. Yejua ika, nejua ijkin oniktokayotij: 'Temojtij yolki yejuan nanalka yejuan xitlaj ueli kichiua.' "
8 Kemaj, Dios okijlij Isaías: "Aman xuiya niman xkijkuilo ipan sen amamoxtli on tlen nikijtoua nochiuas ipan Egipto. Ompa ma nestia para nochipa, ken sen teixpantilijketl yejuan xkaman popoliuis yejuan kintititis on israelitas ika xonechneltokakej."
9 Isaías okijtoj: "In israelitas xipan teitaj niman tlakajkayauaj; yejuamej xkinekij kakiskej itemachtiluan toTEKO. 10 Yejuamej kinmijliaj on itiotlajtojkauan toTEKO: '¡Maka xnauatikan! Makasa xpiyakan on tlatlachalistin yejuan ken nemotemikpan; makasa xtechijlikan on tlen melauak nenkitaj ipan nemotlatlachalis. Yej xtechtlajtlajtouilikan on tlen techpaktis; xtechijlikan ika kuajli tinemiskej maski xmelauak. 11 Xmejkuanikan ipan on ojtli yejuan melajki; makasa xtechnojnotsakan de on Dios de Israel yejuan Yektli.'
12 'Yejua ika, toTEKO iDios Israel yejuan Yektli, ijkin kijtoua: 'Nemejuamej xnenkinekij nenkakiskej in tlaixkuitijli, niman yej nenkitlaliaj nemoyojlo ipan on tlauejli niman ipan on xompayejyeualistli; 13 yejua ika, nemejuamej nenkipiyaj tlajtlakojli. Niman ipampa on nemotlajtlakoluan, no nenijkej kenon ueyitepantli yejuan yotsayan, niman san ijsijkapan uajxotoni. 14 Mechpopoloskej ken ijkuak kitlajtlapanaj sen ueyi sokikontli niman kuajli kuejkuechtiliaj; nion pitentsin xnokaua para ika kixtiskej tlixochtli ipan tliko, noso para ika kontilanaskej atl ipan on atlaltekontli."
15 ToTEKO, iDios Israel yejuan Yektli, ijkin mechijlia: "Xmokuepakan notech, xmoyolseuikan, niman nejua nemechmakixtis." Pero nemejuamej xonenkinekej onenkakkej. 16 Nemejuamej ye onenkijtojkej: 'Ka, tejuamej yej ticholojteuaskej ipan tocaballos.' Tla ijkon tej, ijki nencholojteuaskej. No onenkijtojkej: 'Ticholojteuaskej ipan tocarretas de nouijsokilistli yejuan sanoyej tlaksaj.' Tla ijkon, on nemotlauelikniuan más notlaloskej xken nemejuamej ijkuak mechtojtokaskej. 17 Tla sen soldado yejuan nemotlauelikniu mechtojtokas, se mil de nemejuamej nencholojteuaskej, noso tla makuijli soldado mechtojtokaskej, nemochimej nencholojteuaskej. Niman sa nenkeskimej nenmokauaskej, ken nokaua ikojyo sen bandera ikuapan sen tepetsintli."
ToTEKO kijtoua ika kiknelis Israel
18 Isaías no ijkin okijtoj: "Pero toTEKO mechcha, para mechiknelis. Yejua kinektikaj mechititis itetlajsojtlalis, pampa toTEKO yejua sen Dios yejuan kichiua tlen melajki. ¡Dios kintiochiuas on yejuan itech yejua kitlaliaj iminyojlo!
19 'Nemejuamej yejuan nenchanejkej ipan on tepetl Sión, ne Jerusalén, xokaman más nenchokaskej. ToTEKO mechiknelis ijkuak nenkiueyikatsajtsiliaj para ma mechpaleui. Ijkuak mechkakis, nimantsin mechnankilis. 20 Maski toTEKO mechkauilis nentlajyouiskej, yejua akin nemotemachtijkau, xokaman niyanas, yej kuajli nenkitaskej ikan nemixtololojuan. 21 Niman tla nenkitlalkauisnekij ipan iojui, nemokuitlapan nenkakiskej itlajtol yejuan mechijlis: 'In yejua kuajli ojtli, maka xtlalkauikan.' 22 Niman ijkuakon, nenkintlajyelitaskej on nemoídolos yejuan onenkalauilijkej plata niman yejuan onenkalauilijkej oro. Nenkitaskej ken itlaj yejuan sanoyej tetlajyeloj niman ken itlaj tlajsojli. Niman nenkinxiniskej. 23 ToTEKO tlakiauitis ipan on tlajli kampa nenkitôkaskej on xinachtli, niman ipan on tlajli sanoyej kualtsin tlatlakis. Ijkuakon, nemoyolkauan tlakuajkuaskej kampa sanoyej onkaj tlinon kuaskej. 24 On nemouakaxuan niman nemopolokouan yejuan tekitij ipan nemocampo kikuaskej on tlen más kuajli tlakuajli. 25 Ipan on tonajli, ijkuak toTEKO kincastigaros niman kinmiktis miyekej nemotlauelikniuan niman kinxoxotonilis on tepanchinanmej de iminuejueyikalpanuan, onyas miyek ríos niman miyek ameyaltin ipan on uejueyimej tepemej niman ipan tepetsitsimej ne Judá. 26 Ipan on tonajli, toTEKO kimpajtilis niman kintejkuilis kampa nokokouaj on israelitas yejuan itlapejpeniluan. Niman ijkuakon, on metstli sanoyej tlachas itlauil kenon tonaltsintli, niman itlauil on tonaltsintli no sanoyej tlachas, hasta ken kanaj chikomepa ichkich, ken tlauiloskia chikome tonaltsintli."
On tlen sanoyej xkuajli ipan nochiuas on país de Asiria
27 Isaías no ijkin okijtoj: "Xkitakan, toTEKO yeuajlau neka uejka. Itlauel sanoyej ueyi ken tlitl yejuan sanoyej kauantikaj, ikamak tentikaj ikan iueyitlauel, itlajtol ken itlaj tlitl yejuan nochi kitlatia, 28 iijyo ken itlaj on río yejuan pankisa, niman ajsi hasta ikechtlan nochi tlakatl. Yejua uajlau para kinmandaros niman kintlajyouitis on naciones. Kinyekanas ken kinyekanaj on caballos yejuan kinkamatepitskualtiaj sen tepostli para ika kintilantiuij, niman ijki kinuikas ipan on xkuajli ojtli. 29 Pero nemejuamej israelitas yejuan nenitlapejpeniluan toTEKO, uej nenmokuikatiskej ken nenmokuikatiaj ipan on tlayoua ijkuak onkaj on yekiluitl. Sanoyej nenyolpakiskej, kenon tlakamej yejuan pakatlajtlapitstiu ikan akatlapitsaltin ijkuak yauij ipan on yektepetl kampa onkaj iueyitiopan toTEKO, on toTEKO yejuan kinmanauiya on israelitas.
30 'Pero on yejuan itlauelikniuan uej kinkakistilis itemojtijtlajtol niman kintitis iueyipoder. Impan uajlas ikan itlauel, ikan tlitl yejuan nochi kitlatia, ikan tlapetlanalistli, ikan chikauak kiautli niman ikan tejsiutli. 31 Ijkuak on asirios kakiskej itemojtijtlajtol toTEKO, niman kakiskej ika kiseliskej castigo, sanoyej nomojtiskej. 32 Niman ipan cada castigo ijkuak toTEKO kincastigaros on Asirios, nemejuamej israelitas nempakiskej niman nenkintsotsonaskej nemotambores niman nemoarpas. ToTEKO sanoyej temojtij ken kuijsokis on país Asiria. 33 Desde yeuejkaui, toTEKO okitlalij kampa kitlajyouiltis irey Asiria. Ompa kampa tlajyouis, tlaueyika niman uejkatlan, niman onkaj miyek tlatilkojtli yejuan toTEKO kitlikuiltis san ika iijyo ken ijkuak kiaui ikan on tetlatij azufre."