On tlen sanoyej xkuajli ipan nochiuas on ueyikalpan Jerusalén
29
Dios ijkin kijlia Ariel, yejuan no itoka Jerusalén, on tlen ipan nochiuas: "¡Sanoyej titlajyouis tejua Jerusalén, tejua ueyikalpan yejuan mopan ochantik David! Cada xipan miyek uentli tikuentlalia, 2 pero nejua nikchiuas para tejua Jerusalén mopan ma uetsi tlajtlamach tlen xkuajli. Mopan onyas chokistli niman iknotsajtsilistli. Niman tejua ueyikalpan titlatlas, ijkon ken tlatlaj on yolkej yejuan kinuentlaliaj ipan on tlaixpan. 3 Nikinuajtitlanis nosoldados para ma mitsyejyeualokan. Yejuamej kintlaliskej torres inyeualkan motepanchinanuan yejuan ika kalakiskej mopan para mitsuijsokiskej. 4 Niman mitspijpinajtiskej ijkuak yomitstlankej. Mitskauaskej ken yakaj tlakatl yejuan kitlajkalteuaj ipan tlajli ijkuak yokitlankej, yejuan sa uajtena ken sen tlamomojtiloni noso kenon yejuan san ichtakatlajtlajtoua.5-6 'Pero san amanaman, nion xuejkajtika yes, on toTEKO yejuan nochi ueli kichiua, kincastigaros on motlauelikniuan ikan on tlauitekilistli, tlalolinalistli, chikauak tlakomonajli, ika on temojti kiautli, on chikauak ajakatl niman on tlitl yejuan nochi kitlatis. Nochimej on motlauelikniuan, maski sanoyej miyekej, nokauaskej ken tlalkuechtli. On tojlamej yejuan mitstotokatinemij kinmochpanaskej ken polokatl. 7 Nochimej on soldados de on miyekej naciones yejuan kuijsokiskej Jerusalén, niman nochimej yejuan ipan yaskej para kixoxotoniskej itepanchinanuan yejuan ika yeualtsakutikaj, popoliuiskej ken sen temiktli yejuan se kipiya ijkuak tlayoua. 8 Impan nochiuas ken ijkuak se temiki ika apismiki niman kitemiki ika ye tlakuajtikaj, pero ijkuak tlacha kimati ika ijtipachakatik; noso ken ijkuak se temiki ika amiki niman kitemiki ika ye atlitikaj, pero ijkuak tlacha sanken amiki niman kimati ika sanoyej yokamauak. Ijki impan nochiuas on soldados de on naciones yejuan kuijsokiskej Jerusalén."
9 Isaías okijtoj:¡Nemejuamej chanejkej Jerusalén, sanken xtontojtlachixtiakan! ¡Sanken xixtsajtsakutiakan, maka itlaj xkitakan! ¡Sanken xpapatilijtiakan ken tlauankej, maski tla xitlaj nenkonij on tlen tetlauantij! 10 ToTEKO yomechajtitlanilij sen espíritu yejuan mechkochtlajkalis. On tiotlajtojkej yejuamej kintocaroua kinyekanaskej on israelitas, pero toTEKO yokinmixtlapachoj ika sen velo. 11 Cada tlatlachalistli ken sen temiktli yejuan on tiotlajtojkej kijtouaj, para nemejuamej ken itlaj on amatlajkuilojli yejuan mimilijtikaj niman kipiya sello. Tla yakaj kimakaj yejuan ueli nomachtia niman kijliaj: 'Xmomachti in', yejua ijkin tenankilia: 'Xniuelis niknomachtis pampa kipiya sello.' 12 Niman tla on amamoxtli kimakaj se yejuan xueli nomachtia niman kijliaj: 'Xmomachti in', yejua tenankilia: 'Xniueli ninomachtia' ".
13 ToTEKO okijlij Isaías: "Nochimej in israelitas, ika intlajtol sanenkaj kijtouaj nechtlajsotlaj, niman ika inkamak sanenkaj kijtouaj nechtlakamatij, pero ipan inyojlo yonechtlalkauijkej; niman ijkon ken nechmauistiliaj, san on tlakamej okinejnemilijkej niman yejuamej ijki ouelkej. 14 Yejua ika, ikan tlamauijsoltin niman tlajtlamach yejuan tetlatlachaltij, oksejpa nikintlatlachaltis in israelitas. Niman ijkuakon, intlamatkilis on tlakamej yejuan tlamatkej, niman intlamachilis on yejuan tlamachilisyejkej, popoliuis."
15 Isaías okijtoj: "¡Sanoyej tlajyouiskej on yejuan kiyanaj ixpan toTEKO on tlinon kinekij kichiuaskej, yejuan kichtakachiuaj on tlen xkuajli niman kijtouaj: 'Xakaj techita. Xakaj kimati!' 16 ¡Nemejuamej sanoyej nentlaijtlakouaj! ¿Akinon más ueyixtikaj, on konchijchijketl noso on sokitlalajmojli? On kontli xuelis kijlis on itlachijchijkau: 'Tejua xotinechchijchiu', nion xuelis kijlis on konchijchijketl: 'Xtikmati tlinon tikchijchijtikaj.'
Dios kijtoua ika kinmanauis on israelitas
17 'San xuejkajtika yes, on kojyoj nokuepas tlajli kampa uelis tlatôkalos, niman ipan on tlajli kampa tlatôkalos nesis kenon kojyoj. 18 Ipan on tonajli, on yejuan tsatsamej uelis kakiskej ijkuak yakaj nomachtis itlaj para kinkakistiliskej, niman on ciegos uelis tlachaskej pampa yejuamej xokuijtlaj kintsakuilis, yej nochi kitaskej tlastastok. 19 On yejuan yolyemankej oksejpa kipiyaskej ueyi paktli itech toTEKO. On yejuan sanoyej mayanaj kipiyaskej on paktli itech iDios Israel yejuan Yektli. 20 Ijkuakon, xok nemiskej on yejuan xipan teitaj; xok nemiskej on yejuan nouejueyimatij, niman popoliuiskej on yejuan sa kinemilijtokej kichiuaskej tlen xkuajli. 21 Xok nemiskej on yejuan kintechtiaj oksekimej tlinon xnejli okichijkej, niman kajkayauaj on juez para maka castigaroskej on yejuan kipiyaj tlajtlakojli, niman ikan tlajkajkayaualistli xkinekij kipaleuiskej on yejuan xkipiya tlajtlakojli."
22 Yejua ika, toTEKO iDios Israel, yejuan okimanauij Abraham, ijkin kijtoua: "Aman peuas ika iuejkakoneuan Jacob xokaman pinauaskej, xokaman ixtechichiliuiskej, 23 pampa ijkuak inuejkakoneuan kitaskej on tlen yonikchiu impampa yejuamej, nechyekteneuaskej niman nechtlakaitaskej nejua akin niiDios Israel yejuan niyektli. 24 On yejuan notlamachilispopolouayaj peuas tlamatkej yeskej, niman on yejuan tlamach kijtouayaj, kiseliskej notlamachtiluan."