On tiotlajtoltin de on tlaueliltin niman on tlatiochiualtin yejuan nochiuas (28.1 — 34.17)
On tlen sanoyej xkuajli ipan nochiuas Israel
28
Isaías ijkin okimachistij on ueyikalpan Samaria:"¡Sanoyej tlajyouis on ueyixtikaj ueyikalpan Samaria, on icapital Israel, yejuan ika noueyiliaj on tlauankej yejuan iuejkakoneuan Efraín. Yejuamej kipiyaj Samaria ken sen xochicorona yejuan kisa ipan on kualtetsin ixtlauatl. Pero on xochicorona pilinis, pampa on chanejkej niman on tlayekankej ompa, nochimej tlauankeros, niman xok ueli kajkauaj ika tlauanij. 2 ToTEKO yokitlalij sen tlakatl yejuan kipiya miyek poder, yejuan ken itlaj temojtij tejsiutli niman ken sen chikauak ajkomalakotl yejuan tlaxoxotonia. Noso no, kenon temojtij kiautli yejuan ika uejueyiyaj atepeyamej yejuan kinmatoktis on uejueyikaltin de Samaria. Yejua in tlakatl ika imauan tlaxoxotonis ne Samaria, 3 niman kixaxakualos ika ikxiuan on ueyikalpan yejuan ipampa sanoyej noueyimatij on tlauankej iuejkanoneuan Efraín. 4 Samaria onkaj ipan sen kualtetsin ixtlauatl kampa kuajli tlatlaki, pero ikualtsinyo amanaman poliuis kenon achtoj itlakyo higos yejuan yochikau. Ijkuak yakaj kita, nimantsin kiteki niman kikua.
5 'Ipan on tonajli, toTEKO yejuan nochi ueli kichiua, yejua nochiuas ken itlaj corona yejuan sanoyej kualtetsin, para on itlapejpeniluan yejuan xmikiskej. 6 Niman yejua kichiuas para on teyolkuitijkej ma kichiuakan tlen melajki ijkuak tekiuajtiskej; niman kinmakas yolchikaualistli on soldados yejuan kimanauiyaj on ueyikalpan."
7 Pero aman on tlayekankej ne Israel yonopopolojkej pampa okonikej vino. On tiopixkej niman on tiotlajtojkej okonikej vino hasta papatiliuij niman kintlamachilispoloua. On tiotlajtojkej sanoyej tlauanij, hasta xok uelij kajsikamatij on tetlatlachalistli yejuan Dios kinmaka, niman on tiopixkej sanoyej tlauanij hasta xok uelij teyolkuitiaj. 8 Ipan mesas tentikaj ikan isotlajli yejuan sanoyej teyelmoyau, niman xkanaj tlachopajkan. 9 Yejuamej tlamach nechteneuiliaj. Ijkin kijtouaj: "¿Tlen on Isaías akin yejua in para techalijlijtias tlinon tikchiuaskej, noso techijlis on tlen Dios yokijlij ma techijli? ¡Yejua techita kenon tikokonej yeskiaj yejuan pipitikej, 10 yejuan kemach ueli kijijtouaj on tlajkuilojli: ba be bi bo bu!"
11 'Tla ijkon tej, tla nejua xkinekij nechkakiskej, Dios kiminnotsas ikan okse tlajtojli yejuan xkajsikamatiskej, yejuan ximintlajtol. < “Yejua in país niknotsas ikan okseki tlajtoltin niman ika inkamak on yejuan xchanejkej. Pero maski ijkon nikchiuas, xnechtenkakiskej. Yejua in okijtoj toTEKO.”> 1 Cor. 14.21 12 Dios ijkin yokinmijlijka: 'Nikan onkaj yolseuilistli, niman nikan onkaj neseuijli; xmoseuikan nemejuamej yejuan nensiautokej.' Pero xokinekkej okakkej. 13 Yejua ika, toTEKO kiminnotsas ken yakaj kokonej, kenon yejuan kemach ueli kijijtouaj on tlajkuilojli ba be bi bo bu. Niman ijkuak nejnemij, ajketsteuetsij, nokokouaj, niman onuetsij ijtik on tlatlalijli niman xok uelij kisaj.
On tlen sanoyej xkuajli ipan nochiuas Judá
14 'Xkakikan tej, itlajtoltsin toTEKO, nemejuamej yejuan xnentetlakaitaj, yejuan nentekiuajkej impan in chanejkej Jerusalén. 15 Nemejuamej ijkin nenmoueyiteneuaj: 'Yotikchijkej sen pacto iuan on mikilistli. Yotitotlajtolmakakej iuan on yejuan tlayekana miktlan para ijkuak uajlas on temojtij tlajyouilistli, tejuamej xtechajtsis; tiktejtemouaj tomanauiskej ika on tlen xmelauak, niman tiknekij titopaleuiskej ika on tlakajkayauilistli.'
16 'Yejua ika, on toTEKO Dios yejuan kipiya nochi tekiuajyotl kijtoua: 'Nejua niktlalis ne Jerusalén, yakaj yejuan ken sen tetl yejuan tlatlapejpenijli niman patioj. Yejua yes kenon tetl yejuan yakatstias, niman ipan nokojtilijtias on kajli yejuan nikchijchiuas. On yejuan kitlalis iyojlo itech, xitlaj ika noyolpajsolos. Rom. 9.33 Ijki onochiu ken tlajkuilolnestikaj ipan in Yektlajkuilojli:
Xkita, ne kampa itoka Sión, niktlalia sen tlakatl ken itlaj tetl yejuan ika nantikisalo,
niman ken itlaj tepetlatl yejuan tetlajkali.
Pero on yejuan kineltokas xkaman nopijpinatis. Rom. 10.11 In Yektlajkuilojli ijkin kijtoua: “Nochi tlakatl yejuan kineltoka, xkaman kipijpinatiskej ipampa itlaneltok.” 1 Pet. 2.6 Dios ipan in Yektlajkuilojli tlajtoua de Cristo:
Xkakikan, niktlalia sen tetl
yejuan yakatstikaj ne ipan on chanyotl* itoka Sión.
Oniktlapejpenij in tetl,
niman para nejua in tetl sanoyej ueyi kijtosneki.
In tetl kijtosneki noKoneu.
On yejuan kineltokas yejua, xkaman pinauas. 17 Ijkuak nikchijchiuas on kajli, niktekitiltis yolchipaualistli niman yolmelajkilistli, ken ijkuak sen kalchijchijketl kitekitiltia plomo para kita tla on tepantli melajki yau. Nemejuamej nenkitlaliaj nemoyojlo itech sen tlaixkajkayaualistli yejuan nenkinemiliaj mechpaleuis, pero on isoldados Asiria mechxoxotoniliskej on tlen nenkinemiliaj mechpaleuis. 18 On pacto yejuan onenkichijkej iuan on mikilistli, xok onyas, niman on tlajtolmakalistli yejuan onenkimomakakej iuan on tlayekanki miktlan, xuelis mechpaleuis ijkuak uajlas on temojtij tlajyouilistli. Ijkuak mechajtlaxoxotoniliskej, nemejuamej nemopan chojcholoskej. 19 On nemotlauelikniuan nochipa mechtlajyouiltiskej; uajlaskej ipan tonajli niman ipan yeuajli. Ijkuak nenkakiskej ika ye uajlajtokej, sanoyej nenmojkakuekuetlakaskej. 20 Yejuamej no ijki yes ken sen tlapechtli pitsauak kampa se xiyolika kochi pampa xonaki, niman on itojmiu no choj pitentsin. 21 ToTEKO uajlas ikan itlauel para mechuijsokis ken okinuijsok intlauelikniuan on israelitas ipan on tepetl Perazim niman ipan on ixtlauatl Gabaón. Ijki kichiuas, maski nemejuamej xnenkajsikamatiskej on tlen yejua kichiuas, maski xnenkajsikamatiskej tline kinmiktis on israelitas yejuan itlapejpeniluan. 22 ¡Aman tej, maka san xnechajuejuetskilikan de on tlen nemechijlia, pampa tlamo más uajlas castigo nemopan! ToTEKO yejuan nochi ueli kichiua onechijlij ika tlaxoxotonis ipan nochi in país.
23 'Kuajli xkakikan on tlen nejua nikijtoua; sanoyej kuajli xkakikan notlajtoluan. 24 Ijkuak sen tlatôkaketl tôkas, xsa ika nemi tlaxoponijtikaj, xsa ika nemi tlayemanilijtikaj ipan itlal noso xsa ika nemi tlakuentektikaj. 25 Ijkuak on tlakatl kuajli yokixman itlal, peua kixinia ixinachyoj eneldo noso comino. Niman kemaj no kitôka trigo ipan on tlajli, niman itejtenko on tlajli, kitôkilia centeno niman cebada. 26 Dios okititij on tlakatl kenijki tlatôkas. 27 On eneldo xnoteyinia, niman on comino xnoneki ipan kipanoltiskej sen carreta para kiteiniskej. Yej on eneldo kitsejtselouaj ikan sen kojtli, niman on comino uej kitsejtselouaj ikan sen tlakotl. 28 Niman on trigo uej kemaj kiteiniaj ikan sen carreta, pero san yolik ipan panouaj on iruedas para xkuejkuechtilia. 29 Nochi in tlamatkilistli ualeua itech toTEKO yejuan nochi ueli kichiua. On tlen yejua kichiua tetlatlachaltia, niman tlen yejua kichiua, kichiua ikan miyek tlamatkilistli."