Tlamakaualistli para on israelitas
27
Isaías okijtoj: "On intlauelikniuan on israelitas, kenon temojmojtij kouatl Leviatán yejuan nemi ijtik mar, yejuan sanoyej tlaksa niman noyeyeualoua. Se tonajli, toTEKO kimiktis on temojmojtij kouatl yejuan nemi ijtik on mar; kimiktis ikan iespada yejuan temojtij ueyak niman tlateki."2 Ipan on tonajli ijkuak yejkos incastigo on totlauelikniuan, toTEKO ijkin kijtos:
"Xkuikatlalikan on nación Israel, yejuan ken sen kualtetsin uvajtlatoktli.
3 Nejua nemoTEKO, nicuidaroua on nación
ken sen uvajtlatoktli yejuan sa chika katekiyaj.
Nicuidaroua tlajokaj niman tlayoua,
para maka itlaj xkuajli kichiuiliskej.
4 Nejua xok nikualani iuan on nación.
Niman ompa, sanken nemij on yejuan xipan nechitaj,
yejuan yeskiaj kenon uitstli niman on xkuajli xojtli.
Pero nejua nikixtis nochi on uitstli niman niktlatis.
5 Tla on nación Israel kineki ma nikmanaui,
¡noneki nechtlajtlanilis ma niktlapojpolui!
¡Kemaj, noneki noyoltlalis nouan!"
6 Isaías okijtoj:
"Ajsis on tonajli ijkuak on israelitas, iuejkakoneuan Jacob, oksejpa miyekiyaskej niman kitemiltiskej in tlaltikpaktli. 7 Dios xokincastigaroj on israelitas ken okincastigaroj on intlauelikniuan. Nion xokinmiktij on israelitas ken okinmiktij on yejuan okinmiktijkej on israelitas. 8 Dios, para okincastigaroj on israelitas, okinkixtij ipan imintlal niman okomintitlan ipan oksekimej países. Okinkixtij ken kinuikaskia sen chikauak ajakatl yejuan ualeua kampaka ikisayan tonaltsintli. 9 Pero Dios san kintlapojpoluis on israelitas tla kichiuaj in tlinon kiminnauatia: Ma kinkuejkuechokan intlaixpanuan on ídolos, ken kuechtia on tetl yejuan nochiua tenextli. Ma kimpopolokan nochi on kojtin kampa ixnestikaj on diosa Asera, niman ma kimpopolokan nochi on tlaixpantin kampa tlapopochuiyaj para on ídolos.
10 'On ueyikalpan yejuan kuajli yeualtsakutikaj, xoxotonis. Nokauas ken itlaj on kajli kampa xakaj chanti niman kenon xalpatlajkan kampa tlakauyan. Niman no, nokauas kenon kampa tlakuajkuaj on yolkej, kampa kixojyokuajkuaj on kuamatli niman ompa notejtemaj. 11 On israelitas, no ijkej kenon kuamatli yejuan youajuak, yejuan on siuamej kisentlaliaj para ika tlatlatiaj. No ijki otlamachilispolijkej. Yejua ika, on Dios yejuan okinmakak nemilistli, xkimpaleuis niman xkinmiknelis.
12 'Ipan on tonajli desde on río Éufrates hasta itech on río Nilo, toTEKO mechsentlalis nemejuamej israelitas nensesentemej ken ijkuak yakaj kiteyinia imiyauayo trigo niman kitlakuijkuilia. 13 Ipan on tonajli kipitsaskej on ueyi trompeta, niman on yejuan okinmajsikej niman okinuikakej Asiria niman Egipto, uajlaskej para kimauistiliskej toTEKO ne Jerusalén, ipan on yektepetl."