Sen kuikatl de tetlanilistli
26
Ijkuak Dios kincastigaros on totlauelikniuan,on chanejkej ne Judá kinokuikatiskej in kuikatl:
"Tikpiyaj sen ueyikalpan yejuan kuajli yeualtsakutikaj.
Ompa, techmanauiskej
pampa toTEKO yejua cuidaroua on ueyikalpan.
2 Xkintlapokan iueyitsakuijlouan on ueyikalpan,
para ma kalakikan on yejuan yolmelajkej,
yejuan xkaman mitstlalkauiyaj.
3 NoTEKO, tejua tikchiua
para ma nemikan inyolika on yejuan xmitstlalkauiyaj,
pampa yejuamej kitlaliaj inyojlo san tejua motech.
4 'Nochipa xtlalikan nemoyojlo itech toTEKO
pampa san yejua uelis nochipa techmanauis.
5 Yejua kincastigaroua on yejuan nouejueyimatij,
niman kuajli kixoxotonia on ueyikalpan yejuan nomati sanoyej ueyixtikaj.
Yejua kitlajkali hasta ipan tlalkuechtli.
6 Kixoxotonia, para on yejuan yolyemankej
niman yejuan mayankej, ipan ma chojcholokan
7 'On yolmelajkej, melajki iminojui,
tejua noTEKO tikinmixmanilia iminojui.
8 NoTEKO, tejuamej no ijki titomatij toyolika,
ipan on ojtli kampa techyekana motlanauatiluan. Tejuamej ikan nochi toyojlo timitstejtemouaj tejua.
9 Ipan tonajli niman ipan yeuajli, noyojlo mitstejtemoua.
Ijkuak tejua noTEKO tikintlajtlakolmakas on tlaltikpaktlakamej,
yejuamej kixmatiskej on tlen melajki.
10 'Maski tejua tikinmiknelis on yejuan xkuajli nouikaj,
yejuamej xkinekiskej nokuektlaliskej.
Maski nemij intsajlan on yejuan kuajli nouikaj,
yejuamej xkajkauaj inxompayejyeualis.
Niman xmitsmakajsij maski tejua sanoyej tiueyixtikaj.
11 Tejua noTEKO, ye tinemi listo para tikincastigaros,
pero yejuamej xkinekij kimatiskej ika ye uajkau imincastigo.
Pero ijkuak kitaskej ken tikinmanauiya on motlapejpeniluan yejuan sanoyej tikintlajsojtla,
yejuamej sanoyej nopinajtiskej.
¡On motlauel yejuan ken itlaj tlitl, ma kimpopolo on motlauelikniuan!
12 'ToTEKO, tejua tikchiua para kuajli ma tinemikan;
melauak tej, nochi on tlen yotikchijkej,
otikchijkej ika moueyipoder.
13 'ToTEKO niman toDios,
tejuamej otikimpixkej oksekimej totekouan,
pero tikmatij ika san tejua titoTEKO.
14 On yejuan otikintekipanojkej, yomijmikej niman xok oksejpa nemiskej ipan in tlaltikpaktli.
On intonal xokaman nokuepaskej,
pampa tejua yotikincastigaroj niman yotikxoxotonij iminpoder.
Aman xakaj kimejnamiki.
15 'Tejua noTEKO, yotikiskaltij tonación para moueyilis;
yotikiskaltij hasta itlajtlalnamikiyan topaís.
16 Tejuamej otimitstejtemojkej noTEKO ijkuak titlajyouiyayaj;
otimitsueyikatsajtsilijkej ijkuak otitechcastigaroj.
17 Tejua noTEKO, sanoyej otitechtlajyouiltij ijkuak otitechcastigaroj.
No ijki ken ijkuak tlajyouiya sen siuatl
yejuan sanoyej nokokoua pampa ye kitlaktilis ikonetsin.
18 Pero maski otitlajyouijkej
ken yakaj siuatl yejuan kitlakatilia ikonetsin,
xitlaj ouel otikchijkej.
Xotiuelkej otikmanauijkej topaís.
Xotikmakakej paktli topaís pampa xotitetlankej,
nion xotikmakakej paktli pampa xotikimpixkej miyekej tokoneuan
para más tojlantis ipan in tlaltikpaktli.
19 Pero on yejuan motlapejpeniluan yejuan mikij,
oksejpa nemiskej;
maski yomikaj oksejpa yoliuiskej.
On yejuan tlaltôktokej, oksejpa nokuiteuaskej niman chikauak pakatsajtsiskej.
Ijki nochiuas, pampa on motlauil yejuan kitemaka nemilistli,
uajlas ken itlaj ajuichtli impan on mikatsitsimej,
niman yejuamej oksejpa tlachaskej
niman nokuiteuaskej kampa tlaltôktokej."
20 Nemejuamej nochanejkauan, xtlalikan nemoyojlo itech toTEKO ika yejua mechmanauis. Itech nemomanauiskej ken ijkuak nenkalakij nemokalijtik niman kuajli nentlatsakuaj. Yejua mechiyanas chika tlami kincastigaroua on xompeyejyeuamej. 21 ToTEKO uajkisas ichan ne iluikak para kincastigaros on xompayejyeuamej de in tlaltikpaktli impampa intlajtlakouan. Ijkuakon, in tlaltikpaktli xok kinmiyantias on mikatsitsimej yejuan ichtaka okinmiktijkej, yej kiteititis on iminyesyo yejuan okintoyauilijkej, niman kincastigaros on yejuan otemiktijkej.