On temakixtilistli niman on tlatiochiualistli (25.1 – 27.13)
Kuikatl yejuan kiueyiteneua Dios pampa yejua oteyolkuitij ken kimelaua niman okincastigaroj on xompayejyejkej
25
Isaías ijkin okuikatlalij toTEKO: "NoTEKO, tejua tinoDios; Nejua nimitsyekteneua niman nimitstlakaita, pampa yotikchiu miyek tlen tetlatlachaltij yejuan desde yeuejkaui yotikijtojka ika tikchiuaskia. 2 Tejua otikchiu para on uejueyikalpanmej ma nokuepakan teolocholtin, niman on uejueyikalpanmej yejuan kuajli yeualtsakutikatkaj, otikinxoxotonij. Otikinxoxotonij imimpalacios on totlauelikniuan, niman xokaman oksejpa kinchijchiuaskej. 3 Yejua ika, on naciones yejuan sanoyej uejueyixtokej, mitstlakaitaj; niman on yejuan sanoyej tlauelejkej, mitsueyiteneuaj niman mitstlakaitaj. 4 Ijkon nochiuas pampa motech noyoltlaliaj on yejuan mayankej, niman tikimpaleuiya on yejuan xitlaj kinopiyaliaj. Tikinmanauiya de on ajakakiautli, niman tikintlaseuayotilia ijkuak chikauak tona. Pero on xompayejyeuamej ijkuak tetlajyouiltiaj, nochiuaj ken sen chikauak ajakakiautli yejuan chikauak nouiteki ipan tepantli, 5 noso ken ijkuak chikauak tona kampa sanoyej tlauaktok. Pero tejua noTEKO tikintlauelseuiya on totlauelikniuan, no ijki ken ijkuak tikchiua ma tlaseuayotia ika sen moxtli ijkuak sanoyej tona. Niman ijki, on xompayejyeuamej tikinkamatsakua para makasa ma kinnokuikatikan on kuikamej de tetlanilistli.6 'Niman ipan on tepetl Sión, toTEKO yejuan nochi ueli kichiua, iluichiuas para nochi tlakatl de nochimej on naciones. Ompa, onyas uelik tlakuajli niman onyas vino yejuan más kuajli. Onyas tlakuajli yejuan más uelik niman onyas vino yejuan más patioj. 7 Ipan on tepetl, toTEKO kixtis on ajmantli de nochi tlakatl de nochimej on naciones. 8 ToTEKO kipopolos on mikilistli para nochipa, niman nochimej kinmixayopopouas; niman ipan nochi in tlaltikpaktli, kipopolos on pinaualistli yejuan kipiyayaj on itlapejpeniluan. ToTEKO ijki yokijtoj.
9 'Ipan on tonajli, nochi tlakatl ijkin kijtos: 'In yejua toDios; yejua itech tiktlaliaj nochi toyojlo pampa yejua yotechmakixtij. Yejua ika, sanoyej ma tipakikan pampa yejua yotechmakixtij.'
10 'ToTEKO kimanauis Jerusalén, pero ichanejkauan Moab uej kintlajyouiltis ken ijkuak kichojcholouaj on tlajsojli kampa tlajsolxiniua. 11 Niman on moabitas kinekiskej nomanauiskej, kenon tlakatl yejuan chikauak tlaneloua para uajkisa ijtik on atl para xamimiki. Pero toTEKO kichiuas para ma polakikan, pampa sanoyej noueyimatij. 12 ToTEKO kichiuas para ma xixinikan on ueuejkapanmej intepanchinanuan, niman nochi xintoskej ipan tlalkuechtli."