Dios castigaroua in tlaltikpaktli
24
Isaías okijtoj: "Xkitakan, toTEKO kijtlakos in tlaltikpaktli ikan tlaxoxotonilistli. In tlaltikpaktli kikauas ken sen xalpatlajkan kampa xokuitlaj onyas, niman nochimej on tlaltikpaktlakamej kinchajchayauas. 2 Nochimej sa no ijki tlajyouiskej: tiopixkej niman xtiopixkej, tetekouan tlakamej niman esclavos, tetekouan siuamej niman esclavas, yejuan tlakouaj niman yejuan tlanemakaj, yejuan tetlanejtiaj itlaj niman yejuan kitlaneuij itlaj, yejuan ricos niman on yejuan mayankej. 3 Ipan in tlaltikpaktli nochiuiyan tlaxoxotonis niman xokuitlaj nokauas, pampa toTEKO yejua yokijtoj ika ijki nochiuas.4 'In tlajli uakis, niman nochi xojtli pilinis; on cielo xok tlakiauitis, niman nochi in tlaltikpaktli uatsaliuis. 5 On tlaltikpakchanejkej okijtlakojkej in tlaltikpaktli ikan intlajtlakoluan pampa xok onouikakej ipan on ileyes toTEKO; xok okintlakamatkej on tlanauatiltin, niman ipan ocholojkej on pacto yejuan kipiyayaj para nochipa iuan toTEKO. 6 Yejua ika, on tlauelijlia yokixoxotonij in tlaltikpaktli, niman on tlaltikpakchanejkej kijyouiyaj on castigo. Yejua ika, on tlaltikpakchanejkej xok miyekej, niman sa keski tlakatl yonokau.
7 'On uvajtlatôktin yochauilok, niman on vino ye tlantikaj. On yejuan sanoyej pakiyaj, aman sanoyej najmanaj. 8 Otlan impakakakistilis on tambores niman on arpas; xok kakisti impakatsajtsilis on yejuan tlaluichiuaj. 9 Xok koniskej vino, nion xok nokuikatiskej; on tlauankej kimatiskej chichik on vino.
10 'On ueyikalpan kampa tlamach xkuajli nochiuaya, yoxoxoton. Nochiuiyan kuajli yokintsakukej on kaltin. 11 Ipan on kalpanojtli, san kakisti on chokistli pampa xok onkaj vino; nochi on pakilistli yotlan; xokuitlaj pakilistli ipan on tlajli. 12 On ueyikalpan yoxoxoton, niman on inueyitsakuijlouan yotlajtlapânkej. 13 Nochiuiyan ipan on naciones de in tlaltikpaktli ijki nochiuas: sa keskimej nokauaskej yejuan xmikiskej, no ijki ken ijkuak sa keski kauaj on tlakyotl ijkuak pixkaj on tekitkej.
14 'On yejuan nomanauiskej de on mikilistli, pakatsajtsiskej. Kakistis intsajtsilis desde kampaka ikalakiyan tonaltsintli, ijkuak kitaskej iueyilis toTEKO. 15 No ijki, kampaka ikisayan tonaltsintli niman impan on países yejuan onokej itenko mar, kiueyiteneuaskej toTEKO, iDios Israel. 16 Desde kampa más uejka ipan in tlatilkpaktli, uajkakisti ken nokuikatiaj in kenin kuikatl: 'Xmakakan ueyi tlakaitalistli on yejuan Yolmelajki!'
'Pero nejua onikijtoj: 'Sanoyej nitlajyouiya nejua, pampa machisti nimikis ikan ajmantli! Nechajmana pampa ipan in tlaltikpaktli san onkaj tlakajkayaualistli, niman nochimej nochtakauiyaj.' 17 On tlaltikpaktlakamej kipiyaskej miyek nemojtijli, niman sa kichaj para onuetsiskej uejkatlan ipan tlatlaliltin. 18 Yejuan cholojteuas de on mojkamikilistli, onuetsis ijtik sen tlaltekontli, niman on yejuan kisas ijtik on tlaltekontli, onuetsis ipan sen tlatlalijli. Ipan cielo ualeuas sen temojtij kiautli, hasta uiuixkas ipeuyan in tlaltikpaktli. 19 Nikan tlaltikpak sanoyej chikauak tlalolinis, tlauiuixkas, niman tlaltetsatsayanis. 20 In tlaltikpaktli papatiliuis ken sen tlauanki, uiuixkas ken itlaj kalmatli ijkuak on ajakatl sanoyej tlauiteki. Intlajtlakoluan on tlaltikpaktlakamej sanoyej yoyetiyak. Yejua ika, in tlaltikapaktli uetsis niman xokaman nokuiteuas.
21 'Ipan on tonajli, toTEKO kincastigaros nochimej on xkuajkualtin yejuan tlamandarouaj ipan cielo, niman no, kincastigaros on xkuajkualtin reyes de in tlaltikpaktli. 22 Kinsentlalis, kinkalaktis ipan cárcel kampa tsakutiaskej hasta yejkos on tonajli ijkuak kincastigaros. 23 Ijkuak on toTEKO yejuan nochi ueli kichiua, tlayekanas ken rey ipan on tepetl Sión, ne Jerusalén, on tonaltsintli niman on metstli xok tlauiloskej; niman intlayekankauan on israelitas kitaskej ueyilis toTEKO."