Tiotlajtoltin de on tlen xkuajli ipan nochiuas on tlajli Tiro niman Sidón
23
Isaías okiselij ipan on tlatlachalistli ken itemikpan, in tiotlajtojli yejuan kijtoua on tlinon xkuajli ipan nochiuas on ueyikalpan Tiro:"Xajmankachokakan nemejuamej yejuan nenkistinemij ipan on barcos yejuan ualeuaj ne Tarsis, pampa ne Tiro kampa ajsiyaj on barcos, yotlaxoxoton. Desde on tlaluaktli Chipre okiteijlikoj on tlinon xkuajli yonochiu. 2 On chanejkej ne Tiro niman on tlasemankej de ne Sidón xok nauatij pampa sanoyej najmanaj. Inbarcos yayaj niman uajlayaj ipan on mar ikan miyek riquezas. 3 Yejuamej sanoyej ricos katkaj, pampa kinemakayaj miyek trigo yejuan kualeuitiayaj Egipto. Nochi on tlen tlakiya itech on río Nilo, kinnemakiltiayaj oksekimej naciones.
4 'Pero aman, on chanejkej Sidón yejuan kimandarouayaj on mar, pinauaskej, pampa on mar ken sen nantli ijkin okijtoj: "Aman xok nikimpiya nokoneuan para nikincuidaroua; on yejuan onikintlakatilijka, ken xkaman nikintlakatiliskia. Xok nikimpiya nokoneuan nion yejuan tlakamej nion yejuan siuamej para nikinmiskaltis niman nikincuidaros.
5 'Ijkuak on egipcios kakiskej tlinon ipan yonochiu Tiro, sanoyej ajmankachokaskej. 6 Kijtoskej: 'Xuiyan ne Tarsis; peua xchokakan, nemejuamej yejuan nenchantij itenko on mar.'
7 'On ueyikalpan Tiro sanoyej yeuejkauikayotl, niman on ichanejkauan sanoyej pakanemiyaj. Niman sekimej on ichanejkauan sanoyej uejka yayaj para onnochantiayaj ipan oksekimej tlaltin. 8 ¿Akinon otlanauatij para ma kixoxotonikan on ueyikalpan Tiro kampa chantijyaj on reyes, niman on tlasemankej kintlakaitayaj ken tlayekankej yejuan más uejueyixtokej ipan nochi in tlaltikpaktli? 9 ToTEKO yejuan nochi ueli kichiua, yejua otlanauatij ijkon ma kichiuilikan on ueyikalpan para okimpijpinajtij nochimej on yejuan noueyimatiyaj; niman no, para ma noknelikan on yejuan más uejueyixtokej ipan in tlaltikpaktli.
10 'Nemejuamej teuejkakoneuan intech on chanejkej Tarsis yejuan nenchantij ne Tiro, xpeuakan xtlatôkakan ipan nemotlal, pampa ne Tiro kampa ajsiyaj nemobarcos yotlaxoxoton. 11 ToTEKO okiteititij iueyipoder ipan on mar, niman on naciones sanoyej onomojtijkej. Yejua otlanauatij ma kinxoxotonitij itepanchinanuan on uejueyikalpanmej yejuan onokej ipan on tlajli Canaán. 12 Niman toTEKO ijkin okijlij on ueyikalpan Sidón: 'Aman xok timopaktis tejua ajauilichpokatl. Maski ticholojteuas niman tias ne Chipre, ompa no xtikpiyas yolseuilistli.'
13 'Nemejuamej chanejkej Tiro niman Sidón, xkitakan on tlinon ipan onochiu Babilonia. On ueyikalpan opoliu pampa on asirios okixoxotonijkej. On asirios okinchijchijkej torres yejuan ika okalakkej Babilonia para okuijsokkej, niman okixoxotonilijkej ikaluan yejuan sanoyej kualtsitsimej katkaj. Niman aman, ompa sa chantij tepeyolkej.
14 'Xajmankachokakan nemejuamej yejuan nenkistenemij ipan on barcos yejuan ualeuaj ne Tarsis, pampa ne Tiro kampa ajsiyaj on nemobarcos yotlaxoxotonitoj."
15 Niman on ueyikalpan Tiro, kelkauaskej setenta xipan, no ichkich kech ika uejkaui inemilis sen rey. Ijkuak kajxiltis on setenta xipan, Tiro, ipan nochiuas ken kijtoua on kuikatl yejuan kuikatlalia on siuaauilnenki yejuan ijkin kijtoua: 16 "Tejua siuaauilnenki yejuan yomitselkajkej, xkontilana moarpa niman xpaxalo ipan on ueyikalpan. Kualtsin xtlatsotsona niman xkinmokuikati on kuikamej yejuan más kualtsitsimej. Manin kas uelis ika mitselnamikiskej."
17 Ijkuak yopanok on setenta xipan, toTEKO oksejpa kauilis on ueyikalpan Tiro ma tlasemana intech on okekimej países de in tlaltikpaktli. Oksejpa nouikas ken sen siuaauilnenki yejuan noteka iminuan miyekej tlakamej. 18 Pero on tlen kitlanis ipan itlanemakalis, nochi kiteyaxkatis itech toTEKO. Xok keuas nion kisentlalis, yej nochi kinmakas on yejuan kitekipanouaj toTEKO, para yejuamej ma kouakan miyek tlakuajli niman tlakentin yejuan patiojkej.