Tiotlajtoltin de on tlen xkuajli ipan nochiuas Jerusalén (22.1 – 25)
On castigo yejuan kiseliskej on ichanejkauan Jerusalén
22
Isaías okiselij ipan on tlatlachalistli ken itemikpan, in tiotlajtojli yejuan kijtoua on tlinon xkuajli ipan nochiuas on Ixtlauatl Kampa Kiseliaj Tlatlachalistin:"¿Tlinon nochiua, ika nochi tlakatl tlejkoua ikuapan ikal? 2 Tejua ueyikalpan yejuan mochanejkeuan sanoyej chalmaniyaj pampa sanoyej pakamikiyaj, aman titentikaj ikan mikatsitsimej. Yejuamej xomikkej ikan espada nion ipan nouijsokilistli. 3 Nochimej motlayekankauan cholojteuasnekiyaj, pero okinmajsikej, niman xakaj otlamotlak ikan iarcojtlaminal para onomanauij. Okinmajsikej maski uejka yocholojtejkaj. 4 Yejua ika onikijtoj: 'Xnechtlalkauikan, pampa nikneki niajmankachokas. Nejua xnikneki ma nechyoltlalikan ipampa on tlen teajman impan onochiu nochanejkauan.' 5 Ijkin onochiu pampa toTEKO yejuan nochi ueli kichiua otlanauatij para ma onya ueyi nemojtijli, tlaxoxotonilistli niman mojkamikilistli ipan on Ixtlauatl Kampa Kiseliaj Tlatlachalistin. Amantsin ye kinxoxotonijtokej itepanchinanuan Jerusalén, niman on ajmankatsajtsilistli hasta kuajnankiliaj on tepemej.
6 'On elamitas nemij listos ikan inflechas, ikan incarretas de nouijsokilistli niman ikan incaballos. Niman on chanejkej Kir nemij listos ikan iminescudos. 7 On moixtlauayojuan yejuan más kualtsitsimej, ipan yotemitoj carretas de nouijsokilistli; niman on soldados yejuan ika incaballos, ye kalakiskej ipan iueyitsakuijlouan on ueyikalpan Jerusalén para kuijsokiskej. 8 Ijkon tej, Judá xok ueli nomanauiya."
Ipan on tonajli nemejuamej chanekej Judá onenkitakej nochi on iminteposuan on soldados yejuan onokej ijtik on palacio yejuan itoka Ikojyoj on Líbano. 9 Onenkitakej ika on itepanchinanuan on Iueyikalpan David sanoyej yoijtlakaukej, niman onenkiatenkej on pila yejuan onkaj tlatsintlankopa. 10 No ijki, onenkinmijitakej on kaltin de Jerusalén, niman sekimej onenkinxoxotonijkej para ika onenkuejkuektlalijkej itepanchinan Jerusalén. 11 Niman itsajlan ome tepanchinantli onenkichijchijkej sen pila para ompa onenkitêkakej on atl yejuan onkaj ipan on ueyipila yejuan yeuejkauikayotl. Pero on Dios yejuan okichiu para ma onya nochi on, uej xnenkitaj; xnenkitaj on yejuan ijki otlatlajtlalij desde yeuejkaui.
12 Isaías okijtoj: "Ipan on tonajli, toTEKO yejuan nochi ueli kichiua, yejua omechnauatij para xchokistsajtsikan, xmajmanakan, xmokuatexikalokan niman xkintlalikan nemoajmankatlakeuan para nesis ika nenmajmanaj. 13 Pero nemejuamej yej onentlaluichijkej niman sanoyej onenpakkej. Onenkinmiktijkej uakaxtin niman borregos, onekuajkej nakatl niman onenkonikej vino, niman hasta onenkijtojkej: 'Ma titlakuakan niman ma titlaonikan pampa mostla timikiskej.'
14 'Niman toTEKO onechijlij san nonakastempan: 'Nejua xkaman nikintlapojpoluilis in tlajtlakojli, hasta kaman mikiskej. Nejua yejuan niDios, yejuan nochi ueli nikchiua, yonikijtoj ika ijki impan nochiuas.' "
On castigo yejuan kiselis on ueyitekitlayekanki ipan on palacio
15 ToTEKO yejuan nochi ueli kichiua ijkin onechijlij: "Xuiya xkitati Sebna on ueyitekitlayekanki ipan on palacio, niman ijkin xkijli: 16 '¿Tejua tlinon tikchiua nikan? ¿Akinon omitskauilij para tikchijchiuas motlalkon nikan, kenon tlalkontli yejuan kichijchiuaj ne kampa tlakpak ipan on teostotl para on uejueyixtokej reyes? 17 Maski tiueyixtikaj, toTEKO uejka moka ontlamotlas. 18 Mitspapalakachos niman sanoyej uejka ipan sen tlajli kampa sanoyej tlaueyi, mitsontlajkalis ken itlaj tepayolpajpaktli. Ompa timikis innakastlan mocarretas de nouijsokilistli yejuan ika timoueyimatiya. Ijkon tej, on rey yejuan moteko, pinauas mopampa. 19 Nejua nimitskixtilis on tekitl, niman xok tikpiyas on tekiuajyotl.
20 'Ipan on tonajli niknotsas notekitkau Eliaquim, ikoneu Hilquías. 21 Yejua niktlaliltis on motekiuajtlaken niman on moxijlanilpika yejuan ika mitstlakaitaj, niman nikmakas on tekiuajyotl yejuan tejua otikpix. Yejua yes ken sen tajtli para on chanejkej Jerusalén niman para nochimej on chanejkej ipan on ueyitlalpan Judá. 22 Nikmakas on tekiuajyotl para kitlajtolpaleuis on rey de Judá ijkuak kijtos tlinon nochiuas. Niman xakaj uelis kitlajtolpatlas. 23 Ipampa on tekiuajyotl yejuan nikmakas, nochi ifamilia itataj kitlakaitaskej. Niman xakaj kejkuanis kampa nejua niktlalis; yes ken sen clavo yejuan kuajli tlalaktias ipan tepantli. 24 Pero nochimej on ifamilias, desde yejuan más pitentsin hasta yejuan más ueyi, yejua kintekipanos. Yejua no yes kenon clavo yejuan ipan kimpipilouaj kontin, tsotsokoltin niman jarros. 25 Ipan on tonajli, on clavo yejuan kuajli tlalaktikatka, uetsis, niman on tlajtlamach yejuan ipan yokimpilojkaj, tetlajtlapâniskej. Kijtosneki ika nochi ifamilias Eliaquim mikiskej. ¡Nejua nemoTEKO yejuan nochi ueli nikchiua, yonikijtoj ika ijki nochiuas!' "