Tiotlajtoltin de on tlen xkuajli ipan nochiuas on país Babilonia
21
Isaías okiselij ipan on tlatlachalistli ken itemikpan, in tiotlajtojli yejuan kijtoua on tlinon xkuajli ipan nochiuas on país Babilonia:"Ijkon kenon temojmojtij ajkomalakotl amanaman notlaloua neka kampaka sur, no ijki uajlas on tlaxoxotonilistli yejuan ualeua ipan on temojtij xalpatlajkan. 2 Dios onechititij in temojtij tlatlachalistli ken sen temiktli: 'On teichtakauijketl niman on tlaxoxotonijketl tlami kichiuaj on intekiu. ¡Nemejuamej chanejkej Elam, xkajsikan nemoteposuan yejuan ika nentlauijsokiskej! ¡Nemejuamej chanejkej Media, xtlauijsokikan! Dios kiteltis on tlajyouilistli yejuan kichiuaj on babilonios.
3 'Nejua hasta nisesepoka pampa nikita on tlen Dios kichiuilis Babilonia. Sanoyej ninokokoua ken yakaj siuatl yejuan kitlakatilia ikonetsin. No, hasta yonitsatsatiak ipampa on ajmantli yejuan nikpiya, niman xok nitlacha ipampa on nonemojtil. 4 No ijki, yonitlamachilispoliu niman nikuekuetlaka ikan nemojtijli. Niman on tiotlaktlasesejli yejuan sanoyej nikuelitaya, aman yej sanoyej nikmakajsi.
5 'Ne Babilonia, yokintlalijkej mesas niman yokinsojkej on telas pachontikej ipan piso, niman yopeu tlakualo niman tlaonilo. ¡Pero nemejuamej soldadostlayekankej amanaman xmotelketsakan pampa yopeu mechuijsokij! ¡Xkuikan nemoescudos para nenteixnamikiskej!' "
6 Kemaj toTEKO ijkin onechijlij: "Xuiya niman xtlali sen soldadojtlajpixki yejuan tlacuidaros niman kitemachistis nochi tlen yejua kitas. 7 Mechijlis tla kinta miyekej carretas de nouijsokilistli yejuan kintilantiuij ojomemej caballos, noso mechijlis tla kinta tlakamej yejyetiuij ipan burros noso ipan camellos; nochi sanoyej kuajli ma kita."
8 Kemaj on soldadojtlajpixki chikauak onanalkak ken itlaj león, niman ijkin okijlij Isaías: "Noteko, nikan kampa onechtlalijkej nochipa nikan ninemi, ipan tonajli niman ipan yeuajli nochipa nitlacuidarojtikaj. 9 Niman nikita ika uajlauij carretas de nouijsokilistli yejuan kinuajtilanaj ojomemej caballos."
Kemaj yakaj ijkin otsajtsik: "¡Youets Babilonia, youets Babilonia! Nochi on tlamachijchiualtin ídolos yoxinkej ipan tlajli niman yotlajtlapankej."
10 Niman Isaías ijkin okijtoj: "Ay nokniuan israelitas, yejuan sanoyej yomechtlajyouiltijkej, nejua yonemechmachistij on tlen onechijlij on toTEKO, Dios de Israel yejuan nochi ueli kichiua."
Tiotlajtoltin de on tlen xkuajli ipan nochiuas on país Dumah (Edom)
11 Isaías okiselij ipan on tlatlachalistli ken itemikpan, in tiotlajtojli yejuan kijtoua on tlinon xkuajli ipan nochiuas on país Edom. Kijtoua: "Yakaj desde ne Seir, onechajtsajtsilij niman ijkin onechtlajtoltij: 'Soldadojtlajpixki, ¿kech poliui para tlanesis? Soldadojtlajpixki, ¿kech poliui para tlanesis, niman ijki xok tikijyouiskej in castigo?' 12 Niman nejua ijkin oniknankilij: 'Ye uajtlanestiu, pero on castigo oksejpa uajlas ijkuak oksejpa tlayouas. Tla oksejpa tikneki tinechtlajtoltis, tla ijkon, más sakin oksejpa tiuelis tinechtlajtoltis.' "
Tiotlajtoltin de on tlen xkuajli ipan nochiuas on país Arabia
13 Isaías okiselij ipan on tlatlachalistli ken itemikpan, in tiotlajtojli yejuan kijtoua on tlinon xkuajli ipan nochiuas on país Arabia:
"Nemejuamej dedanitas, yejuan nenpanouaj cada tlayoua ipan on iuitskojyoj on xalpatlajkan, 14 xkinnamikitij on yejuan amikij niman xkinmakakan atl. Nemejuamej chanejkej ipan on tlajli Tema, xkinnamikitij on yejuan uajcholojtiuij niman xkinmakakan tlakuajli, 15 pampa yejuamej uajcholojtiuij para maka kinmiktiskej ipan on nouijsokilistli. Uajcholojtiuij de on espadas niman on arcojtlaminaltin."
16 ToTEKO onechijlij: "Ipan se xipan, ijkon ken sen tekitketl kipoua on tonaltin ijkuak ye tlantiu kitlaxtlaua ikan itekiu on tlen kiteuikilia, no ijki tlamis iueyilis itribus* Quedar. 17 Niman on soldados de itribus Quedar yejuan tlamotlaskej ikan arco, sa keskimej nokauaskej. ¡Nejua yejuan niiDios Israel, nemechtlajtolmaka ika ijki nochiuas!"