Asiria kitlanis Egipto niman Etiopía
20
Se tonajli, Sargón, rey de Asiria, okontitlan sen iueyisoldadojtlayekankau ipan on ueyikalpan Asdod, niman on soldadojtlayekanki okuijsok on ueyikalpan Asdod niman okitlan. 2 Ipan on tonaltin toTEKO otiotlajtoj itechkopa Isaías, ikoneu Amós, niman ijkin okijlij: "Xkixti moajmankatlaken, niman no xkinkixti mokakuan." Isaías ijki okichiu niman okistinen xika ikakuan niman xika itlaken.3 Kemaj toTEKO ijkin okijtoj: "Notekipanojkau Isaías yokistinen xika ikakuan niman xika itlakeuan yeyi xipan, para itechkopa nikteititia on tlinon impan nochiuas on egipcios niman on etiopes. 4 In kijtosneki ika on rey de Asiria kinuikas ken esclavos on egipcios niman on etiopes. Kinuikas ueuentsitsimej niman telpokamej, xika inkakuan niman xika intlaken, niman tsintsotsolijtiaskej para sanoyej pinauaskej. 5 Niman on oksekimej países sanoyej nomojtiskej niman pinauaskej ipampa Etiopía niman ipampa Egipto, yejuan intech noyolchikauayaj niman impampa noueyiliayaj. 6 Ipan on tonaltin ijkin kijtoskej nochimej on filisteos yejuan chantij itenko mar: 'Xkitakan tlinon impan yonochiu on yejuan intech titoyolchikauayaj, yejuan tikintlajtlaniliayaj ma techmanauikan itech on rey de Asiria. ¿Aman akinon uelis techmanauis?' "