Tiotlajtoltin de on tlen xkuajli ipan nochiuas on país Egipto (19.1 – 20. 6)
Temachistijli para Egipto
19
Dios okimakak Isaías in tiotlajtojli para yejua ma kijli on país Egipto: "¡Xkontakan toTEKO! Yejua uajlajtikaj nikan Egipto, niman ualejtiu ipan sen moxtli yejuan uajnotlaloua. Ixpan yejua, kuekuetlakaj on ídolos de Egipto, niman on egipcios sanoyej nomojtiaj. 2 ToTEKO okijtoj: ‘Nejua nikchiuas para on egipcios ma noxexelokan niman sano yejuamej ma nouijsokikan: se nouijsokis iuan itlajsojkaikniu, sen ueyikalpan iuan okse ueyikalpan, sen ueyitlalpan iuan okse ueyitlalpan. 3 Nikchiuas para ma kipolokan intlamachilis, niman xnikinkauilis ma kichiuakan on tlen kinemiliayaj kichiuaskej. Kemaj yejuamej kintlajtoltiskej iminídolos niman on nanaualtin para kimatiskej tlinon kichiuaskej. No, kintlajtoltiskej intonal on mikatsitsimej niman on yejuan tetlatejtemouiliaj. 4 Pero nejua niktlalis ne Egipto sen tlayekanketl yejuan sanoyej tetlajyouiltis. ¡Nejua akin niDios yejuan nochi ueli nikchiua, nikintlajtolmaka ika ijki nikchiuas!’5 ‘Iayajtok on río Nilo tlamis; on río kuajli uakis. 6 Ipan on apantsitsimej on atl sanoyej molonias. On ayajtokmej yejuan onokej Egipto ika yolik uaktiaskej, on temekamej niman on akayoj nochi uakis. 7 Nochi on akayoj yejuan onkaj itenko on río Nilo niman nochi on tlatôktin yejuan no onokej atenko, uakiskej niman xok onyaskej. On tlaltin kampa sanoyej onkaj on temekamej itenko on río Nilo, niman nochi on tlatoktin yejuan onkaj intenko, uakiskej niman xok kaman onyas. 8 Nochimej on yejuan michajsij ipan on río Nilo, peuas najmanaskej niman chokaskej; on yejuan konchapaniaj inmatlauan ipan on atl, najmanaskej. 9 On yejuan kinchijchiuaj tlakentin de lino, xok inyolika tekitiskej; on yejuan kichipauaj on lino niman on yejuan kinchijchiuaj telas, ajmankanemiskej. 10 Nochimej on telajchijchijkej iminuan intlakeualuan, mojkamikiskej pampa xok kipiyaskej tekitl.
11 'Sanoyej nentontos nemejuamej tlayekankej ne Soan, yejuan nenkinemiliaj nentetlajtolpaleuijkej yejuan sanoyej nentlamatkej de ne Egipto. Pero on xmelauak, pampa nemejuamej nentetlajtolpaleuijkej yejuan san nenkijtouaj tontojyotl. ¿Tlinon ika omechpaleuij ijkuak onenkijlijkej on rey de Egipto: 'Tejuamej tiinuejkakoneuan on tlamatkej reyes yejuan onenkej yeuejkaui'? 12 ¿Kanon nemij motlajtojkauan yejuan sanoyej tlamatkej tejua rey de Egipto? Ma mitsititikan niman ma mitsijlikan on tlen nejua akin niDios yejuan nochi ueli nikchiua, yoniknemilij nikchiuilis Egipto. 13 On tlayekankej ne Soan niman ne Menfis, sanoyej tontos, niman okinnokauilijkej ma kinkajkayauakan. On tlayekankej ipan on uejueyikalpanmej de Egipto, okuikakej on país Egipto ipan xkuajli ojtli. 14 ToTEKO okintlamachilispoloj on tlayekankej. Yejuamej kuikaj on país Egipto ipan xkuajli ojtli, niman on país Egipto nopopoloua ipan nochi on tlen kichiua. Yejua, ipan nochiua ken sen tlauanki yejuan nijsotla niman kemaj nalaua ipan isotlal. 15 Niman xakaj, maski uejueyixtokej noso maski xitlaj intekiu, maski ricos noso maski mayankej, xakaj uelis kipaleuis on país Egipto.
16 'Ijkuakon, on Egipcios yeskej ken yakaj siuamej, pampa sanoyej nomojtiskej ijkuak kitaskej ika toTEKO yejuan nochi ueli kichiua, ye kincastigaros. 17 Sanoyej nomojtiskej on egipcios ijkuak san kakiskej kinteneuaskej on israelitas, pampa kimatiskej ika on toTEKO yejuan nochi ueli kichiua, sanoyej kintlajyouiltis. 18 Ijkuakon, ne Egipto onyas makuijli ueyikalpan kampa tlajtlajtoskej hebreo, niman notlajtolmakaskej ika xkaman nechtlalkauiskej nejua akin niDios yejuan nochi ueli nikchiua. Se de on makuijli ueyikalpan itoka yes Iueyikalpan Tonaltsintli.
19 Ipan on tonajli, onyas sen tlaixpan kampa san toTEKO kimauistiliskej itlajkotian Egipto, niman nisiu itlamiyan on país kitelketsaskej sen tetl yejuan kintlalnamiktis ika ompa Egipto san kitlakaitaj toTEKO. 20 On tetl yes sen neskayotl de Egipto para kelnamikiskej toTEKO yejuan nochi ueli kchiua. Ijkuak on egipcios kiueyikatsajtsiliskej toTEKO para ma kinmanaui intech on yejuan kintlajyouiltiaj, yejua kinuajtitlanilis sen temanauijketl para ma kimpaleui niman ma kinmanaui. 21 ToTEKO noteititis intech on egipcios para ma kixmatikan, niman yejuamej kimatiskej ika yejua Dios. Niman kimauistiliskej niman kimakaskej uentli de yolkej niman tetlayokoliltin. Yejuamej kichiuaskej promesas para yejua, niman melauak kichiuaskej on tlen kiprometerouiliskej. 22 ToTEKO kincastigaros on egipcios, pero kemaj kintiochiuas. Yejuamej nokuepaskej itech toTEKO, niman yejua kinmiknelis niman kintiochiuas.
23 'Ipan on tonajli, onyas sen ojtli patlauak yejuan oneuas Egipto niman ajsis hasta Asiria. On asirios uelis ajsiskej Egipto niman on egipcios uelis ajsiskej hasta Asiria. Niman on egipcios iminuan on asirios, san sekan kimauistiliskej toTEKO. 24 Ipan on tonajli, Israel iuan noyoltlalis Egipto niman Asiria; niman intechkopa yejuamej in países, nochiuiyan ipan on tlaltikpaktli nochimej kiseliskej tlatiochiualistli. 25 ToTEKO yejuan nochi ueli kichiua ijkin kinmijlis para kintiochiuas: 'Nejua nemechtiochiua nemejuamej chanejkej Egipto yejuan nennoyaxkauan, nemejuamej chanejkej Asiria yejuan onemechmachijchiu para xmochiuakan sen ueyi nación, niman nemejuamej chanejkej Israel yejuan nennotlapejpeniluan.' "