Tiotlajtoltin de on tlen xkuajli ipan nochiuas on país Etiopía
18
¡Xnechkaki tejua país Etiopía, yejuan tikpiya miyek barcos yejuan nesij ken mastlakapalejkej ikan on telas intoka velas yejuan ika kinyekanaj ikan ajakatl; tejua país yejuan tionkaj tlakpak kampa uajpeua on río Nilo yejuan yau kampaka sur! 2 Nimitsnotsa tejua país, yejuan yauij motlajtojkauan ipan on río Nilo ijkuak kanaj tikintitlani, niman yauij ipan barcos yejuan tlachijchijtin ikan iakayo on xojtli itoka papiro. Xuiyan nemejuamej tlajtojkamej yejuan nentlaksaj. Xuiyan ipan on nemopaís kampa nemij uejueyitlakamej niman kuetlaxpetlankej. On nemopaís, nochimej ipan in tlaltikpaktli kimakajsij, pampa on ichanejkauan sanoyej kojtikej niman xakaj kintlani. Yejuamej chantij ipan on tlajli kampa nochiuiyan yajtok atl.3 Nochimej nemejuamej tlaltikpaktlakamej, nenkitaskej ijkuak kajkokuiskej sen bandera ipan tepetl ijkuak peuas nouijsokilistli, niman nenkakiskej ijkuak kipitsaskej on tlapitsajli. 4 ToTEKO ijkin onechijlij: "Desde nikan kampa ninemi, choj nontlachixtikaj ken itlaj on tlastalyotl ijkuak sanoyej tona, kenon moxtli yejuan ajuichxini ijkuak pixkatlaj niman tona chikauak. 5 Pero maski ijkuak on isoldados Etiopía sanken xe peuaj tlauisokij, chika yejuamej yolik kinemilijtokej kenijki kichiuaskej, no kenon uvas ijkuak yolik ijiksi, nejua nikinxinis no ijki kenon mijlajtekiketl kitejtekilia ikan tijeras iseselikaj on uvajkuamekatl niman kintsontekilia imauan yejuan sanoyej yonoskaltijkej. 6 Niman ijkuak ye nisiu para kipixkaskej on uvas, nochi on uvajkuamekamej kintejtekiliskej inmauan niman kixinijteuaskej ipan tlajli. Nochimej on totomej ompa tlakuaskej ijkuak tonalko, niman nochimej on tepeyojkej ompa tlakuaskej ijkuak seuayan."
7 Ipan on tonaltin, toTEKO yejuan nochi ueli kichiua, kuajkuiliskej tetlayokoliltin. On tetlayokoliltin kuajkiskej on yejuan uejueyitlakamej niman kuetlaxpetlankej, yejuan nochiuiyan ipan in tlaltikpaktli kinmakajsij pampa sanoyej kojtikej niman xakaj kintlani. Yejuamej chantij ipan on tlajli kampa nochiuiyan yajtok ríos. Niman on tetlayokoliltin kuajkiskej Jerusalén, kampa kiueyiteneuaj toTEKO yejuan nochi ueli kichiua.