Tiotlajtoltin de on tlen xkuajli ipan nochiuas on ueyikalpan Damasco niman on ueyitlalpan Israel (17.1 - 14)
Tiotlajtoltin ipampa on ueyikalpan Damasco niman on tlajli Israel
17
In tiotlajtojli kijtoua tlinon ipan nochiuas Damasco:"Damasco xok yes sen ueyikalpan, yej xoxotonis, niman on kaltin, sa ojolochijtoskej. 2 Xokaman yakaj nochantis ompa, pampa sanoyej sakayouas; yej ompa sa tlakuajkuaskej yolkej yejuan xakaj kimpeuijtinemis. 3 On tlajli Israel yejuan ika noueyiliaj on israelitas, xok kipiyas on ueyikalpan yejuan yeualtsaktikaj para nomanauiya. Niman on ueyikalpan Damasco no ijki ipan nochiuas; nochimej on sirios yejuan nokauaskej, xok kipiyaskej iminreino kenon israelitas. ¡Ijki kijtoua toTEKO yejuan nochi ueli kichiua!"
On tlajyouilistli yejuan kiseliskej on israelitas
4 ToTEKO okijtoj: "Ipan on tonajli ijkuak kixoxotoniskej on ueyitlalpan Samaria, inueyilis on israelitas popoliuis, niman kipoloskej nochi on tlen yokitlankaj. 5 Ipan nochi on tlajli xokuitlaj nokauas, kenon tlatoktli kampa yokipixkakej tlakyotl. No nokauas kenon tlatoktin ipan on ixtlauatl Refaim ijkuak nochi yokipixkakej niman yonotijtixuijkej. 6 Sa nokaua yejuan okixkajkej. Noso nokauas ken sen olivojkojtli yejuan okuatsonuitekej, niman sa kanaj ome noso yeyi itlakyo nokaua ikuapan sen imakojyo. Niman tla saman, nokaua sa naui noso makuijli itlakyo ipan nochi on olivojkojtli. ¡Nejua akin niiDios Israel, nikintlajtolmaka ika ijki nochiuas!"
7 Niman ipan on tonajli, on israelitas noyolpatlaskej niman oksejpa kitlaliskej inyojlo itech on yejuan okinmakak nemilistli, on Dios de Israel yejuan Yektli. 8 Ijkuakon on israelitas xok yaskej intech intlaixpan on ídolos, on ídolos yejuan sano yejuamej okinmachijchijkej. No xok yaskej intech on kojtin kampa ixnestikaj on diosa Asera, nion ipan on tlaixpantin kampa kitlatiaj kopajli para iminídolos.
9 Ipan on tonajli, iminuejueyikalpanuan on israelitas yejuan yeualtsakutokej ikan tepanchinantli, kintlalkauiskej niman nokauaskej ken xalpatlajkan. No ijki nochiuas ken yeuejkaui on heveos niman on amorreos okintlalkauijkej inuejueyikalpanuan pampa okinmakaskej on israelitas. 10 Ijki nochiuas pampa nemejuamej israelitas onenkelkajkej nemoDios yejuan omechmakixtij; onenkelkajkej ika yejua nemotemanauijkau. Aman yej nentlatȏkaj ikan xochitl yejuan kualtsin niman nenkintȏkaj on plantas yejuan ika nenkimauistiliaj sen dios yejuan xnenkixmatij. 11 On plantas sanoyej nencuidarouaj desde ijkuak nenkitȏkaj hasta kaman teyoua. Pero ijkuak uajlas on chauistli, nochi ijtlakauis niman sanoyej mechajmanas pampa nenkipoloskej nemotlatok.
Dios kinmejkuanis intlauelikniuan on israelitas
12 ¡Xkakikan ken sanoyej chikauak kokomoka intsajtsilis on tojlamej de miyekej naciones; kakisti ken ijkuak kokomoka chikauak on mar! On tsajtsilistli yejuan kichiuaj on yejuan ualeuaj ipan oksekimej naciones, kakisti ken ichikauak kakistilis on mar ijkuak koxoni. 13 Pero ijkuak Dios kinmajuas, yejuamej cholojteuaaskej niman yaskej sanoyej uejka, ken itlaj on tlajsoltsintli yejuan kuika on ajakatl ipan tepemej, noso ken itlaj on xojtli yejuan uitsyoj yejuan kipatlanaltia on ajkomalakotl. 14 Ijkuak tiotlak, on israelitas sanoyej nomojtiskej pampa ye uajlaskej intlauelikniuan, pero ijkuak xe tlanesis, on intlauelikniuan xokuitlaj nemiskej. Ijki imimpan nochiuas on yejuan techtlachtekiliaj; ijki tlamis innemilis on yejuan techtlajyouiltiaj.