On moabitas kinekiyaj nomanauiskej ipan on ueyitlalpan Judá
16
'Desde Sela, kampa onkaj sen xalpatlajkan, on itlayekankauan on país Moab kuajtitlaniliskej borreguitos on rey de Judá yejuan chanti ipan on tepetl Sión, para on isoldados makasa kinuijsokikan on moabitas. 2 On chanejkej Moab kipanoskej on tepanojli ipan on río Arnón ken itlaj totomej yejuan yokinmomojtijkej, yejuan kitlalkauijteuaj intepajsol. 3 Yejuamej kinmijliaj ichanejkauan Jerusalén: 'Xnemilikan kenijki nenkichiuaskej para nentechmanauiskej. Xtechiyanakan ken titiyanaskiaj ipan itlaseuajlo sen kojtli ijkuak tlakualispan niman sanoyej tona. Tejuamej ticholojtinemij; xtechiyanakan tej, kampa xakaj uelis technextis. 4 Xtechkauilikan tejuamej yejuan otiuajcholojtejkej Moab, ma titokauakan nemotech. ¡Xtechiyanakan de on totlauelikniuan yejuan kinekij techmiktiskej!'Yejkos on tonajli ijkuak xok nemis yejuan techtlajyouiltis, niman on totlauelikniuan xok techtlaxoxotoniliskej. 5 Ijkuakon, sen iuejkakoneu David nochiuas Rey. Yejua tlamandaros ikan kuajli iyojlo niman ikan yolchipaualistli. Tlayekanas ikan tetlajsojtlalistli niman xnouejkauas tepaleuis ikan yolmelajkilistli.
On iueyimatilis Moab popoliuis
6 'On chanejkej ne Judá ijkin kijtouaj: 'Tikmatij ika on chanejkej Moab sanoyej noueyimatij. Kinemiliaj san yejuamej sanoyej uejueyixtokej; sanoyej noueyiteneuaj niman noueyiliaj. Pero xnejli ken yejuamej noteneuaj.' 7 Yejua ika, on yejuan chantij ne Moab chokaskej ipampa innación, ijkuak kelnamikiskej on kualtsitsimej inuvajtlatokuan. Sanoyej najmanaskej niman tlajyouiskej impampa on yejuan chantij ipan on ueyikalpan Quir-haréset pampa xok kikuaskej on memelatsitsimej de uvajtetsojli. 8 On iuvajtlaltôkuan on ueyikalpan Hesbón niman Sibma, yopilinkej, pampa okintsojtsontekitoj intlayekankauan on naciones. Inmakojyouan on uvajtemekamej, ajsiyaj hasta ipan on ueyikalpan Jazer; yonouiuilankaj nochiuiyan ipan on xalpatlajkan, niman ajsiyaj más uejka de on mar. 9 Yejua ika, nichoka ipampa iuvajtlatôk on ueyikalpan Sibma niman Jazer. Niman nichoka ipampa on ueyikalpan Hesbón niman ipampa on ueyikalpan Eleale, pampa ipan intlatok xokuitlaj pixkilistli yejuan kimpaktia on tlakamej. 10 On pakilistli tlamis ipan on tlatôktin; xok onyas on pakatsajtsilistli, nion xok nokuikatiuas ipan on uvastlatôktin. Xok kichojcholoskej on uvas para kichijchiuaskej vino. On pakatsajtsilistli yotlan. 11 Noyoltsin tejtekuini ken itlaj arpa ijkuak kitsotsonaj; tejtekuini ikan ajmantli ipampa on pais Moab niman ipampa on ueyikalpan Kir-hareset. 12 Maski on moabitas yaskej ipan imintiopantsitsiuan iminídolos ne ipan on tepetsitsimej niman sanoyej noueyikatsajtsiliskej hasta kampa siauiskej, xakaj kinmakixtis."
13 Ijkon yokijtojka toTEKO yeuejkaui de on tlen ipan nochiuas Moab. 14 Pero aman kijtoua toTEKO: "Ipan yeyi xipan, ijkon ken sen tlakeuajli kipoua on tonaltin yejuan ye tlantiu kitlaxtlaua ikan itekiu on tlen kiteuikilia, Moab kixoxotoniskej iuan nochi on kech ika tojlan chanejkej. San keskimej nokauaskej yejuan xitlaj uelis kichiuaskej." "Ipan yeyi xipan, ijkon ken tlapoua sen tlakeuajli yejuan kitlaxtlauiliaj, iueyilis Moab kixoxotoniskej iuan nochi on kech ika tojlan chanejkej. San keskimej nokauaskej yejuan xitlaj uelis kichiuaskej."