Tiotlajtoltin de on tlen xkuajli ipan nochiuas on país Moab (15.1 – 16.14)
Temachistijli para Moab
15
Dios ijkin okijtoj de on tlinon ipan nochiuas on país Moab:"San ipan se tlayoua kixoxotoniskej on ueyikalpan Ar niman on ueyikalpan Quir; ijkon tej, ipan on tlayoua kitlaniskej Moab niman kixoxotoniskej. 2 On chanejkej Dibón tlejkoskej para onchokaskej ipan on tepetsitsimej, kampa onokej on tiopantin pipitikej kampa kinmauistiliaj ídolos. Moab chokas pampa kinxoxotoniskej on uejueyikalpanmej Nebo niman Medeba. Nochi tlakatl nokuatexikalos niman notentsonximas ipampa iajmanalis. 3 Yejuamej kisaskej ipan on kalpanojtin ikan inajmankatlaken; inkuapan inkal tlejkoskej niman ompa onajmankachokaskej. No ijki, ipan plaza nochimej onajmankachokaskej, niman sanoyej chokaskej hasta kampa xok ueliskej. 4 On chanejkej Hesbón niman Eleale, hasta ne Jahaza onkakistis inchokilis. Yejua ika, sanoyej nomojtiaj isoldados Moab niman sanoyej mojkakuekuetlakaj."
5 Isaías kijtoua: "Noyojlo kiyemankatlajtlani para ma kipaleuikan Moab; on ompa chanejkej, cholojteuaskej para yaskej hasta ne Zoar, noso yaskej ne Eglat-selisiya. Tlejkoskej chokatiaskej ipan on tlaixtli de on ueyikalpan Luhit; yaskej ipan iojui on ueyikalpan Horonaim niman ajmankachokatiaskej pampa kintlaxoxotoniliskej. 6 On atlaltekontin yejuan onokej ne Nimrim, uakiskej. On xojtli pilinis, uakis on tlen xoxojki katka. Xok onyas nion se xojtli xoxojki. 7 Yejua ika, on chanejkej kisentlaliskej inriquezas, niman kitkiskej más uejka de on ayajtok kampa onokej on kojtin Álamos. 8 Inajmankachokilis on moabitas kakistis ipan nochi on tlajli Moab: desde kampa ompeua on tlajli, hasta kampa ontlami, desde Eglaim hasta Beer-elim. 9 Maski on atlaltekontin yejuan onokej Dimón teniskej ikan yestli, Dios kuajtitlanis más temojtij castigo. Uajlaskej leones yejuan kinkuaskej on moabitas yejuan cholojteuasnekiskej niman on yejuan nokauaskej ipan on país Moab.