On israelitas oksejpa nokuepaj ipan imintlal
14
Pero toTEKO kinmiknelis on iuejkakoneuan Jacob. Oksejpa kintitis ika yejuamej itlapejpeniluan, niman oksejpa kinuikas ipan imintlal para oksejpa ompa ma nochantitij. Niman on yejuan xisraelitas, uajlaskej intech iuejkakoneuan Jacob niman iminuan nosentlaliskej. 2 Miyekej on chanejkej ipan oksekimej naciones, kimpaleuiskej on israelitas para nokuepaskej ne Israel, ipan on tlajli yejuan toTEKO okinmakak. Pero ompa, on israelitas kinchiualtiskej on yejuan xchanejkej para iminesclavos yeskej. Ijkon tej, on yejuan achtopa okintlajyouiltijkej on israelitas kej yejuamej nochiuaskej esclavos intech on israelitas, niman on israelitas kej yejuamej tlamandaroskej.On israelitas kipijpinauiskej on rey de Babilonia
3 Chanejkej de Israel, ijkuak toTEKO mechseuis de on tlajyouilistli, on ajmantli niman on ika mechpiyayaj esclavos, 4 nenkijtoskej in xochikuikatl yejuan ika nenkipijpinauiskej on rey de Babilonia:
"¡Xkitakan kenijki onotlamilij yejuan tetlajyouiltiaya! ¡Xkitakan kanon okajxitij on iueyimatilis! 5 ToTEKO yokinkixtilij impoder on xkuajkualtin tlayekankej; kimpojpostekiliskia intlakou on yejuan tetlajyouiltiayaj. 6 Yejuamej kintlajyouiltiayaj on yejuan chantij ipan oksekimej naciones, niman sa ika nokauayaj kinmailiayaj; imimpan tlauelchojcholouayaj niman kintlaueltotokatinemiyaj. 7 Aman, ipan nochi in tlaltikpaktli onkaj yolseuilistli; nochimej inyolika nemij niman nokuikatiaj ikan paktli. 8 Hasta on pinojkojtin niman on cedrojkojtin yejuan onokej ne Líbano, pakij pampa omitstlankej, niman kijtouaj: 'Desde ijkuak tejua omitstlankej, xok yakaj techtsonteki'. 9 'Ijtik on tlajli kampa miktlan, on mikatsitsimej sanoyej yonajkomankej pampa sa mitschaj para mitsseliskej. Intonal on mikatsitsimej yotlachixkej. Nochimej on yejuan uejueyixtikatkaj ipan in tlaltikpaktli niman on reyes yejuan yeuejkaui omikej, nokuiteuaj para mitsseliskej. 10 Nochimej yejuamej san setipan mitsijliskej: 'Tejua no yotikpoloj mopoder; no ijki yotimokau ken tejuamej. 11 Nikan otlamiko moueyimatilis niman intlatsotsonalis moarpajuan. Aman motlapech yes tlapalanajli, niman motojmiu yes okuilimej.'
12 '¡Sanoyej titlajyouis tejua rey de Babilonia yejuan sanoyej tiueyixtikatka niman tikintlaniya on naciones! Pero aman xok tiueyixtikaj, yej omitsajtlajkalkej hasta ipan tlajli. 13 Tejua ijkin tikijtouaya ipan moyojlo: 'Nejua nitlejkos hasta ne iluikak; nikontlalis notrono más tlakpak xken kampa onkaj on sitlalimej yejuan iyaxkauan Dios. Ompa nonnotlalis ne uejka, kampa norte ika, ipan on tepetl kampa nosentlaliaj on dioses. 14 Nejua nitlejkos más tlakpak de on kampa onkaj on moxtli; niman nejua niyes kenon Dios Ueyixtikaj.' 15 ¡Pero tejua yej yomitsajtlajkalkej nikan miktlan, kampa más uejkatlan! 16 Nikan, on mikatsitsimej yejuan mitsitaj mitstlajtlataj, niman kemaj ijkin kijtouaj: '¿In yejua on tlakatl yejuan kichiuaya ma uiuixka on tlaltikpaktli, niman kinxoxotoniaya on naciones? 17 ¿Yejua okau on tlaltikpaktli ken xalpatlajkan, yejuan kinxoxotoniaya on uejueyikalpanmej niman yejuan xkaman kinmakauaya on yejuan kimpiyaya ipan cárcel?'
18 'Nochimej on reyes kintlaltȏkaj ikan tetlakaitalistli, cada se kipiya itlalkon, 19 pero tejua, mitsontlajkalij uejka de on tlalkontli ken itlaj tlajsojli yejuan sanoyej tetlajyeloj. Mitsontlajkaliskej kampa uejkatlan niman sanoyej teyoj, kampa kominxiniaj on yejuan okinmiktijkej niman okinchojcholojkej. 20 Tejua xmitstlaltôkaskej kenon oksekimej reyes,
pampa otikixpoloj mopaís
niman otikinmiktij on yejuan chantiyaj ipan motlalpan.
On mouejkakoneuan xokaman kinmelnamikiskej, pampa tejua otiaj sanoyej tixompayejyeua. 21 On mokoneuan mikiskej ipampa tejua moxompayejyeualis. Yejuamej kitlaxtlauaskej on tlajtlakojli yejuan okichijkej inachtojtajuan. Mikiskej para maka kej yejuamej tlamandaroskej ipan in tlaltikpaktli niman para maka yejuamej kitemiltiskej iuejueyikalpanuan in tlaltikpaktli."
22 ToTEKO yejuan nochi ueli kichiua ijkin kijtoua: "Nejua yoniktlajtouilij Babilonia ika nikpopolos. Nikimpopolos nochimej on ichanejkauan niman inuejkakoneuan yejuamej. 23 Nejua nikchiuas para ma nokuepa kenon sokiatl yejuan tetoloua niman ompa ma temitij on tetekolomej. Nejua nochi nikxoxotonis niman nikauas ken kuajli tlachpankan. Nejua nemoTEKO yejuan nochi ueli nikchiua, yonikijtoj ika ijki nikchiuas."
Tiotlajtoltin de on tlen xkuajli ipan nochiuas on país Asiria
24 ToTEKO yejuan nochi ueli kichiua ijkin yonotlajtolmakak ika ijkin kichiuas: "On tlen yoniknemilij nikchiuas, ijki nochiuas; on tlen yonikijtoj nikchiuas, ika onkaj nochiuas. 25 On asirios nikimpopolos ipan on país yejuan onikinmakak notlapejpeniluan de Israel; nikinmiktis ipan itepeuan on tlajli, ken imimpan nichojcholoskia. On notlapejpeniluan xok kimpiyaskej ken esclavos; yejuamej noseuiskej de on tlajyouilistli yejuan kipiyaj. 26 Ijkin yonikijtoj nikchiuas ipan nochi on tlaltikpaktli. Ikan noueyipoder nikincastigaros nochimej on naciones."
27 ToTEKO yejuan nochi ueli kichiua, ijki yokijtoj kichiuas, niman xakaj uelis kiteltis. Ikan iueyipoder tecastigaros, niman xakaj uelis kitsakuilis.
Tiotlajtoltin de on tlen xkuajli ipan nochiuas on país Filistea
28 Ipan on xipan ijkuak omik on rey Acaz, Isaías okijtoj: "Ijkin kijtoua toTEKO: 29 'Maka xpakikan filisteos tla yomik on rey yejuan mechcastigarouaya, pampa itech ifamilia kisas okse rey yejuan más xompayejyeua. Niman kemaj oksejpa nemis okse yejuan más xompayejyeua, no ijki kenon kouatl yejuan sanoyej pajyoj. 30 Ipan notlatôk, imborregos on mayankej kipiyaskej tlinon kikuaskej, niman on yejuan más xitlaj kipiyaj, noseuiskej inyolika. Pero nemejuamej filisteos uej nemechmiktis ikan apistli, niman on achijtsitsimej de nemejuamej yejuan nokauaskej, nochimej nikinmiktis.
31 '¡Xmojkachokakan, chanejkej ipan on uejueyikalpanmej de Filistea! ¡Xajmankatsajtsikan, hasta xmojkakuekuetlakakan! Ijkon xchiuakan pampa neka nortejika ye uajlauij sanoyej miyekej soldados, hasta nesij ken itlaj poktli, niman nion se soldado xkisa kampa uajtekpantiuij. 32 ¿Kenijki kiminnankiliskej intlajtojkauan on filisteos? Ijkin ma kiminnankilikan: 'ToTEKO okiyektlalij Jerusalén, on itlapejpeniluan yejuan tlajyouiyaj, ompa nomanauiskej' ".