Tiotlajtoltin de on tlen xkuajli ipan nochiuas on país Babilonia (13.1 – 14.23)
Sen temachistijli de on ken Babilonia uetsis
13
Isaías, ikoneu Amós, okiselij ipan sen tlatlachalistli, in tiotlajtojli yejuan kijtoua on tlinon xkuajli ipan nochiuas on país Babilonia. Niman yejua ijkin okinmijlij on israelitas de on tlatlachalistli:2 "Ipan sen tepetl yejuan xkojyoj, xkajkokuikan tlakpak sen bandera yejuan kiteititis ika onyas nouijsokilistli. ¡Xkinnauatikan on soldados para ma tlauijsokikan! ¡Xkinmanotsakan para ma kalakikan ipan intsakuijlouan on yejuan uejueyixtokej tlayekankej, niman ma kinuijsokikan! 3 Nejua yonikintekuitlan nosoldados yejuan sanoyej uelij tlauijsokij; yonikinnauatij nosoldados yejuan yonikintiochijkatlalij para ma tlauijsokikan. Yejuamej sanoyej pakij ijkuak nitetlani, niman intechkopa yejuamej nikincastigaroua on yejuan nechtlauelitaj."
4 Isaías okijtoj: "Xkakikan ken sanoyej tsajtsilo ipan on tepemej; xkakikan ken sanoyej miyek soldados nejnemij. Sanoyej tlakokomotsaj on tojlamej de oksekimej naciones niman de oksekimej ueyitlalpantin yejuan yonosentlalijkej. ToTEKO yejuan nochi ueli kichiua, kimpoua niman kintekpana isoldados yejuan ontlauijsokiskej. 5 On soldados ualeuaj ipan on país yejuan más uejka; ualeuaj más uejka hasta kampa se onixtlami. ToTEKO yejua uajlau iminuan on yejuan kintekitiltis ken itlaj armas yeskiaj, para notlauelkixtis intech itlauelikniuan. Yejua uajlau para kipopolos nochi on país Babilonia.
6 'Xmojkachokakan, pampa ye nisiu on tonajli ijkuak toTEKO kuajkis on xoxotonalistli. On xoxotonalistli yejuan kuajkis on Dios yejuan nochi ueli kichiua, yejkos ken ijkuak itlaj uetsi yejuan tlaxoxotonia. 7 Ijkuakon, nochimej on tlakamej xok makojkojtikej yeskej, pampa xok yolchikajkej yeskej, 8 niman nochimej sanoyej nomojtiskej. Sanoyej mojkamikiskej niman tlajyouiskej, ken ijkuak nokokoua sen siuatl yejuan kinemitia ikonetsin. Sano yejuamej nomojkaitaskej niman ixtechichiliuiskej ikan pinaualistli. 9 Ye yejkotikaj on tonajli ijkuak toTEKO tecastigaros. Ipan on tonajli, on itemojtijtlauel toTEKO, kauas in tlaltikpaktli ken sen xalpatlajkan, niman kimpopolos nochimej on tlajtlakolejkej. 10 Ijkuakon, on sitlalimej niman on tlauiltin yejuan onokej ipan cielo xok tlauiloskej. On tonaltsintli ijkuak uajkisas nimantsin tlileuis, niman on metstli xok petlanis."
11 ToTEKO kijtoua: "Nejua nikincastigaros on tlaltikpaktlakamej ipampa on tlen xkuajli kichiuaj, niman on xompayejyeuamej ipampa intlajtlakoluan. Nejua nikpopolos iminxompatilis on yejuan noueyimatij; nikimpijpinajtis on yejuan noteneuaj sanoyej tlamatkej niman on yejuan xtetlakaitaj. 12 Nikchiuas para on tlakamej más ma tlajsojtikan xken on oro yejuan más kuajli, yejuan onkaj ne Ofir. 13 Ijkuakon, on cielo uiuixkas, niman in tlaltikpaktli nolinis kampa onkaj, pampa ipan on tonajli sanoyej nikualantias; ueyi tlauejli nikpiyas.
14 'On yejuan xchanejkej Babilonia nesiskej kenon masamej yejuan kintojtokaj, kenon borregos yejuan kinsesenmanaj niman xnemi akinon kinsentlalis. Cada se oksejpa nokuepas ipan ipaís; chojcholojteuaskej para yaskej ipan intlal................ 15 Nochimej yejuan niyanaskej ipan on ueyikalpan, kinmiktiskej ikan lanza, niman nochimej yejuan kinekiskej yejteuaskej kinmiktiskej ikan espada. 16 Inmixpan, inka tlamotlaskej ipan tlajli on inkoneuan yejuan pipitikej; kinmichtekiliskej on tlen kipiyaj ipan iminchan, niman on insiuauan kinchiualtiskej on intlauelikniuan para inuan notekaskej.
17 'Nejua nikchiuas para on medos ma kinuijsokikij on babilonios. Yejuamej in tlakamej xkuajtejtemojtiaskej plata, nion on oro xkichiuiliskej cuenta. 18 Ikan arcos kinmojmotlaskej on telpokamej. Xkinmikneliskej on kokonej nion on konetsitsimej yejuan kemach otlakatkej. 19 Babilonia sanoyej kualtsin nación, niman sanoyej ueyixtikaj. Ika on iueyilis, on caldeos nouejueyimatij de iminnación. Pero nokauas ken onokau Sodoma niman Gomorra, ijkuak onikinxoxotonij. 20 Ompa xokaman oksejpa nochantiuas; xokaman yakaj nochantis ompa. On árabes xokaman ompa noseuiskej ika inkajkal, nion on tlajpixkej xokaman ompa kintlajpiyaskej inyolkauan. 21 Ompa nochantiskej on temojmojtijkej tepeyolkej tekuanimej, on pajpaktekolomej yejuamej ontemiskej ijtik on kaltin, on yolkej intoka avestruces ompa nochantiskej, niman ompa notlatlaloskej on tepechivos. 22 Inmijtik on ueuejkapanmej kaltin, kuaochokaskej on yolkej yejuan ken tekuanimej chichimej intoka chacales, niman ijtik on inkualtsitsiuan palacios, nemiskej lobos. Ye ajsitikaj on tonajli ijkuak Babilonia uetsis; xok miyek tonajli poliui para ijkon nochiuas."