Sen kuikatl de tlajsojkamatilistli
12
Isaías no okijtoj: "Ipan on tonaltin, cada se ijkin nokuikatis:'Nimitsmaka tlajsojkamatilistli noTEKO,
pampa maski nouan otikualan,
otinechiknelij niman otinechyoltlalij.
2 Dios yejua nechmakixtia,
niman aman noyolika ninemi niman xninomojtia.
ToTEKO nechmanauiya
niman yejua nechmaka yolchikaualistli;
yejua notemakixtijkau.'
3 'No ijki tej, nemejuamej sanoyej nempakiskej itechika on temakixtilistli yejuan Dios kitemaka, yejuan nenkiseliskej ken itlaj on atl ijkuak sanoyej nenamikij. 4 Niman ijkuakon, ijkin nenmokuikatiskej:
'¡Ma tikmakakan tlajsojkamatilistli toTEKO
niman ma tikueyiteneuakan!
¡Xmakakan tlajsojkamatilistli niman xnotsakan toTEKO!
¡Xtetlajtlajtouilikan nochiuiyan ipan in tlaltikpaktli
nochi on tlajtlamach tlen yejua yokichiu!
¡Ma tikelnamikikan ika san toTEKO yejua más ueyixtikaj!
5 ¡Ma tikuikatlalikan toTEKO,
pampa yejua yokichiu uejueyi tlajtlamach.
¡Ma tikuikatlalikan toTEKO,
pampa noneki kixmatiskej nochiuiyan ipan in tlaltikpaktli
on uejueyi tlajtlamach yejua yokichiu.
6 ¡Ma tipakatsajtsikan, chanejkej Jerusalén,
pampa on Dios de Israel yejuan Yektli,
totsajlan nemi ikan nochi iueyipoder!' "