Iuejkakoneu Isaí kuajkis yolseuilistli niman tlamandaros ikan yolmelajkilistli
11
'Yejkos on tonajli, ijkuak on reyes yejuan kistiuij itech iuejkakoneuan Isaí, itataj David, xok nemiskej. Nochiuas ken ijkuak kitsontekij sen ueyi kojtli, niman sa nokaua sen kojtejtepojli. Pero sakin, nemis sen yenkuik Rey yejuan yes ken sen tlatsmolintli ipan on kojtejtepojli; ken sen tlatsmolintli yejuan kisa ipan itemetsonyo sen kojtli, niman noskaltia niman kipiya itlakyo. 2 Iespíritu toTEKO nochipa iuan nemis, niman kimakas tlamatkilistli, tlamachilistli, kajsikamatilistli, poder, niman tlakaitalistli itech toTEKO. 3 Yejua, ikan paktli kitlakamatis toTEKO. Ijkuak tetlajtlakolmakas, xnouikas san ipan tlaixkajkayaualistli, niman ijkuak kijtos tlinon kichiuas, xnouikas san ipan on tlen oksekimej kijtouaj. 4 Yejua xkitekauilis ma kinchiuilikan tlen xkuajli on yejuan xuelij nomanauiyaj, niman kinmanauis on mayankej. Itlajtol sanoyej tekokoj yes ken itlaj tlakotl yejuan ika kinmailis on yejuan sanoyej xkuajkualtin, niman itlajtol yejuan ikamak kisas, kichiuas para ma mikikan yejuan xompayejyeuamej. 5 Yejua tekiuajtis ikan yolmelajkilistli niman nochipa nouikas ipan iley toTEKO.6 'Ijkuakon, on lobo niman on borreguito san sekan nemiskej, on tigre niman on chivito san sekan noseuiskej, on uakaxkonetl niman on león san sekan noskaltiskej, niman kinokauiliskej ma kintlajpiya sen tlakakonetl pitentsin. 7 On siuauakax niman on yolki osa kuajli nouikaskej, niman on uakaxkonetl niman on osojkonetl san sekan noseuiskej. On león no kikuas sacatl no ijki kenon uakax kikua. 8 Sen konetsintli uelis nauiltis kampa otlakoyonij on pajyojkouatl, niman uelis konkalaktis ima kampa onkaj iteuan on kouatl. 9 Ipan nochi iyektepeu toTEKO, xakaj nion on yolkej kijtlakoskej itlaj, nion kichiuaskej tlen xkuajli, pampa ijkon kenon atl kitemiltia on mar, no ijki kixmatiskej toTEKO nochiuiyan ipan in tlaltikpaktli.
10 'Ipan on tonaltin sen iuejkakoneu Isaí notelketsas ken sen bandera yeskia, para nochimej on tlaktikpaktlakamej ompa onnosentlaliskej itech. On yejuan ualeuaskej de oksekimej naciones, kitejtemoskej, niman on tlajli kampa yejua nemis, sanoyej ueyixtias.
Nokuepaskej ikan paktli on israelitas yejuan okinuikakaj ipan oksekimej países
11 'Ipan on tonajli, toTEKO oksejpa kiteititis iueyipoder. Oksejpa kinnoyaxkatis on itlapejpeniluan yejuan sa keskimej nokauaskej. Oksejpa kinuikas ipan on tlajli Israel on yejuan nokauaskej ipan on país Asiria, Egipto, Patros, Etiopía, Elam, Sinar, Hamat niman ipan nochimej on países yejuan onokej itenko on mar. 12 Kitelketsas sen bandera para ma kitakan on naciones, niman kinsentlalis on israelitas yejuan okinuikakej ipan oksekimej países. Oksejpa kinsentlalis on chanejkej Judá yejuan chajchayajtinemiskej imanian in tlaltikpaktli. 13 Efraín tlamis inexikol, niman itlauel Judá noteltis. Efraín xok kinexikolitas Judá, niman Judá xok kitlauelitas Efraín. 14 On omemej san sekan yaskej kampaka ikalakiyan tonaltsintli para kominuisojkiskej on filisteos; niman no, onteuijsokiskej kampaka ikisayan tonaltsintli. Imimpoder ajsis hasta Edom niman Moab, niman no kintlaniskej on amonitas. 15 ToTEKO kintlapouilis sen ojtli ipan on Mar Rojo. No ijki, ikan iueyipoder kichiuas para chikauak ma ajaka ipan on río Éufrates para ma noxelo chikomekan. Niman xnonekis nokakkixtiskej para kipanoskej rio, pampa onyas sa achijtsin atl. 16 Ijkuak on itlapejpeniluan toTEKO yejuan sa achijtsitsimej nokauaskej ne Asiria, oksejpa nokuepaskej ipan imintlal, kinextiskej sen ojtli patlauak, no ijki ken ijkuak iminuejkatajuan okiskej ne Egipto."