10
'¡Sanoyej tlajyouiskej on jueces yejuan kitlaliaj leyes para sanoyej tetlajyouiltiaj. 2 Ijki kichiuaj para xkimpaleuiyaj on yejuan xuelij nomanauiyaj, niman ximimpan tlachaj on notlapejpeniluan israelitas yejuan mayankej. No, kichiuaj para kintlachtekiliaj on kaualtsitsimej niman iknotsitsimej. 3 ¿Tlinon kichiuaskej ijkuak Dios kinyolkuitis niman kinuajtitlanilis on intlauelikniuan yejuan uejka ualeuaskej para kinuajtlaxoxotoniliskej, ijkon ken yejuamej kinmelaua? Ijkuakon, ¿akinon kitlajtlaniliskej ma kimpaleui? ¿Kanon kejeuaskej on iminriquezas para kimanauiskej? 4 Yejuamej tej, ika onkaj kinuikaskej ken esclavos ipan okse país, noso kinmiktiskej iminuan oksekimej. Pero maski toTEKO ijkon kincastigaros, xtlauelseuis, yej kijtoua ika sanken más kincastigaros.Dios kimpopolos on asirios (10.5 - 12.6)
On asirios kipopoloskej Jerusalén, niman sakin, Dios kimpopolos on asirios
5 'Dios okijtoj: 'Sanoyej tlajyouis on rey de Asiria yejuan niktekitiltis ken itlaj tlakotl para ika nitecastigaros. 6 Yejua, niktitlanis ma kuijsokiti on nación kampa chantij on xompayejyeuamej yejuan sanoyej yonechkualanijkej. Niknauatis ma kintlachtekili niman ma kinkuili nochi iminriquezas yejuan kipiyaj, niman ma kinchojcholo ken itlaj on tlalajmojli yejuan onkaj ipan kalpanojtli. 7 Pero on rey de Asiria nion xkimatis ika nejua yejuan niDios, nejua oniktitlan. Yejua san kinemilis kineki tlaxoxotonis imimpan miyekej naciones. 8 Niman ijkin noueyiteneuas: '¡Nochimej on tlayekankej yejuan nikinmandaroua, más uejueyixtokej xken on reyes yejuan nikintlanis! 9 Para nejua, on uejueyikalpanmej Calno, Carquemis, Hamat, Arfad, Samaria niman Damasco, nochijkej. 10 Nejua yonikintlan oksekimej naciones yejuan más miyekej dioses niman ídolos kimpiyaj xken Jerusalén niman Samaria. 11 Yejua ika nikijtoua, ijkon ken onikchiuilij Samaria iuan idioses, no ijki uelis nikchiuilis Jerusalén iuan ídolos.' "
12 Niman Isaías okijtoj: "Ijkuak toTEKO tlamis kincastigaros on israelitas chanejkej ipan on tepetl Sión niman ipan on ueyikalpan Jerusalén, yejua kitlakuepiltis niman castigaros on rey de Asiria ipampa on tlen okichiu ikan noueyimatilistli niman ueyi texixikoltilistli.
13 'On rey de Asiria ijkin kijtoua: 'Nochi onikchiu ikan nopoder. Nejua sanoyej nitlamatki, yejua ika nochi kuajli kisa tlinon niknemilia nikchiuas. Nejua onikimpopoloj kampa notlalnamikij on naciones, oniknoyaxkatij nochi inriquezas yejuan kipiyayaj, niman ken sen ueyitetlanki, yonikintlan on iminreyes. 14 Aman ipan nomauan onkaj nochi inriquezas on kalpanmej, yoniknoyaxkatij nochi in tlaltikpaktli ken ijkuak yakaj kikui iteuan sen tototl ipan itepajsol yejuan yokinkajteu, niman ipan on tepajsojli, nion sen tototl xompa onen para onopapatlats niman okitlapoj itenchochopiyaj para otlapituij.'
15 'Pero Dios okijtoj: '¿Tlen on hacha niman on sierra ueliskej noteneuaskej más uejueyixtokej xken on tlakatl yejuan kintekitiltia? ¿Noso uelis sen topijli yejuan san tlachijchijtli ikan kojtli, san yejua nejnemis tla xakaj kikti ikan ima?
16 'Yejua ika, toTEKO yejuan nochi ueli kichiua, kuajtitlanilis sen kualolistli on rey de Asiria iminuan isoldados. Niman xok kojtikej yeskej pampa sanoyej chikauak totoniaskej. 17 On Dios yejuan Yektli, yejuan intlauil on israelitas, nokuepas ken sen ueyitlitl kauanki. Niman san ipan se tonajli, yejua kintlatis intlauelikniuan on israelitas, ken kintlatiskia on uitskojtin niman on tlakoyoj. 18 No, kintlatis ken kitlatiskia on kualtetsin kojyoj niman on tlatokyoj. Niman nochi on tlen iyaxka on rey de Asiria, nokauas ken sen kokoxki yejuan semi xok kojtik. 19 Niman nesis kenon kojyoj kampa sa achijtsin kojtin nokauaskej, hasta sen pitentsin tlakakonetl uelis kimpouas.
20 'Niman ijkuakon, on achijtsitsimej israelitas, iuejkakoneuan Jacob, yejuan nomanauiskej de on mikilistli, xokaman kitejtemoskej itlapaleuil on rey asirio yejuan sanoyej okintlajyouiltij. Yej ikan nochi inyojlo kitejtemoskej itlapaleuil toTEKO, on Dios de Israel yejuan Yektli. 21 Sa keskimej iuejkakoneuan Jacob xmikiskej niman nokuepaskej itech on Dios yejuan kipiya nochi poder. 22 Niman maski on israelitas sanoyej miyekej kenon xajli yejuan onkaj itenko mar, san achijtsitsimej nokuepaskej. Ijki nochiuas pampa Dios yokijtoj ika kimpopolos on israelitas para kincastigaros ken kinmelaua. 23 Ijki nochiuas, pampa toTEKO yejuan nochi ueli kichiua, yokijtoj ika kipopolos on país de Israel, niman melauak kichiuas.
24 'ToTEKO yejuan nochi ueli kichiua ijkin kijtoua: 'Notlapejpeniluan yejuan nenchantij Jerusalén, maka xkinmakajsikan on asirios, maski mechtlakouiyaj niman mechmailiaj ikan intopil, ken yeuejkaui okichijkej on egipcios. 25 Maka xkinmakajsikan pampa xok uejkajtika poliui ijkuak nejua nikincastigaros, niman notlauel kimpopolos. 26 Nejua nemoTEKO yejuan nochi ueli nikchiua, nikincastigaros ken ijkuak onikincastigaroj on madianitas, itech on ueyi tetl Oreb, niman nikteititis noueyipoder ijkuak nikuijsokis on país Asiria, ken ijkuak onikuijsok Egipto. 27 Ipan on tonajli, nejua nemechmanauis intech on asirios kampa aman nennemij esclavos. Nemechkixtilis on tlajyouilistli yejuan nenkipiyaj ken itlaj nemotlamamal ipan nemotlakapan niman ken itlaj on kojtli yugo yejuan salijtiu nemokechpan.'
On soldados asirios uajlajtokej para tlauijsokiskej
28 'On soldados asirios ye uajpanotokej kampa itoka Rimón. Aman yoyejkokej hasta ne Ajat. Youajpanokej ne Migrón niman aman kauaj intlamamal ne Micmas. 29 Yokipanokej on atepanoltin, niman on tlayoua nokauaj ne Geba. On chanejkej Ramá sanoyej nomojtiaj; on chanejkej Gabaa kampa chantiya Saúl, yocholojtejkej. 30 ¡Xmojkatsajtsikan chikauak, nemejuamej chanejkej Bat-galim! ¡Xkakikan nemejuamej chanejkej ne Laisa pampa ye uajlajtokej miyekej soldados! ¡Xchokakan chanejkej Anatot, pampa nemoueyikalpan uetsis! 31 On chanejkej Madmena ye chojcholojtokej, on yejuan chantij Gebim niyanaj. 32 Amantsin on soldados asirios yonoteltijkej ne Nob; sa kolinijtokej inmatepayoluan para kuijsokiskej on tepetl Sión, on ueyikalpan Jerusalén. 33 ¡Xkitakan, on toTEKO yejuan nochi ueli kichiua, kinxinia on asirios ken kintsontekiskia on kojtin ikan itemojtij poder! Kinxinia ken kintsontekiskia on kojtin yejuan más ueuejkapanmej, niman on yejuan más onoskaltijkej, xinij ipan tlajli. 34 Ika sen hacha kintsineua on kojtin kampa más kojyoj, niman kintsonteki on kojtin yejuan más kualtsitsimej yejuan onkaj ne Líbano.