9
'Pero on yejuan aman nemij ipan tlayouajlotl ikan inajmanalis niman intlajyouilis, xnochipa ijki nemiskej."Itlakatilis niman itekiuajyo on Ueyitlamandarojketl yejuan kuajkis on yolseuilistli
1 Isaías ijkin okijtoj: "Desde yeuejkaui, Dios kimpiya ikan tlajyouilistli on región de Zabulón niman de Neftalí, yejuan onokej nisiu on kalpanmej kampa chantij miyekej yejuan xhebreos. Pero sakin, Dios kitiochiuas nochi on ueyitlalpan Galilea yejuan nokaua okse lado de on río Jordán, niman ontlamis itenko on Mar Mediterráneo. 2 On tlakamej yejuan tlayouatok kistinemiyaj, okitakej sen ueyi tlauijli; sen tlauijli opetlan imimpan on yejuan chantiyaj ipan tlayouajlotl. 3 Niman nejua onikijtoj: 'Tejua noTEKO yotikinmakak ueyi paktli on israelitas; sanoyej ueyi paktli kipiyaj. Nochimej pakij mixpan ken pakij ijkuak pixkaj; pakij ken ijkuak on soldados kinoxelouiliaj on tlajtlamach tlen patioj yejuan okitekuilijkej ipan nouijsokilistli. 4 Sanoyej pakij pampa tejua otikinkixtilij on tlajyouilistli yejuan kipiyayaj ijkuak nemiyaj ken esclavos. Otikinkixtilij on tlajyouilistli yejuan kinajmankapiyaya. Niman otikinmanauij kampa xueliya nomanauiyayaj. Onochiu ken ijkuak otitetlan ipan on tlajli Madián. 5 No ijki, pakij pampa inkakuan on soldados niman intlakenuan yejuan sanoyej yesyojkej, kominchapaniskej tliko para ma popoliuikan. 6 Ijkon onochiu pampa totech yotlakat sen konetsintli. Dios yotechmakak sen konetsintli, yejuan kipiyas nochi poder para tlamandaros. Niman yejua kiselis kenin tokayomej: Kuajli Tetlakanonotsketl, Dios Tetlanki, toTajtsin para yeyika, Ueyitlamandarojketl yejuan kitemaka yolseuilistli. 7 Yejua tlamandaros ipan itrono David; tlayekanas ken Rey nochiuiyan, niman on yolseuilistli xkaman tlamis; xkaman tlamis ika tlamandaros, niman tlayekanas ikan yolmelajkilistli niman ken kitocaroua. Desde aman niman para nochipa ijki nochiuas. Nochi in kichiuas iueyitetlajsojtlalis toTEKO yejuan nochi ueli kichiua.' "
Itemojtijtlauel toTEKO ouets impan on israelitas
8 Isaías no okijtoj: "ToTEKO okinmijlij on israelitas, iuejkakoneuan Jacob, on tlinon xkuajli impan nochiuas. Okinmijlij ika kincastigaros. 9 Niman nochimej on israelitas niman on efrainitas chanejkej Samaria, okiselijkej on castigo, pero maski xkuajli impan onochiu, ijkin kijtouaj ikan noueyimatilistli: 10 'Maski on totabiquejkaluan yoxixinkej, tejuamej oksejpa tikinchijchiuaskej ikan chikajkatemej. Maski yokintsontekej on sicómorojkojtin, tejuamej tikimpatlaskej ikan cedrojkojtin.'
11 'Pero toTEKO, sano yejua okinuajtitlanilij intlauelikniuan on israelitas para ma kinuijsokikij. 12 Neka ikisayan tonaltsintli oualejkej on sirios, niman kampaka ikalakiyan tonaltsintli, oualejkej on filisteos. Niman amanaman otlaxoxotonijkej ne Israel. Maski ijkin onochiu, toTEKO xtlauelseui, yej kijtoua ika sanken imimpan nochiuas on tlen xkuajli.
13 'Niman maski on israelitas miyekpa okiselijkej castigo, xonokuepkej itech Dios; xokitejtemojkej on toTEKO yejuan nochi ueli kichiua. 14-15 Yejua ika, san ipan se tonajli, toTEKO okincastigaroj intlayekankauan niman intiotlajtojkauan on israelitas. Okincastigaroj ken ijkuak yakaj kuitlapilteki sen yolki niman kechtsonteki. Niman no, ken ijkuak yakaj kintsonteki on palmeras niman on xkuajli xojtli. (On ueuetkej tlayekankej ken yejuamej tsontekomatl yeskiaj, niman on tiotlajtojkej yejuan tlakajkayauaj ken yejuamej kuitlapijli yeskiaj.) 16 On tlayekankej sano yejuamej okinkajkayajkej on israelitas, yejua ika on israelitas oixpolijkej. 17 Niman yejua ika, toTEKO xokinmiknelij on telpokamej, nion ximpan otlachix on iknotsitsimej niman siuakaualtsitsimej. Ijkin onochiu pampa nochimej yejuamej onokuepkej xompayejyeuamej, niman nochimej sanoyej tlauijuikaltiaj. Pero maski toTEKO ijkon okincastigaroj, xotlauelseu, yej kijtoua ika sanken más kincastigaros.
18 'On xompayejyeualistli sanoyej tlaxoxotonia ken ijkuak on tlajchinoualistli tlami kitlatia on uitskojtin niman on tlakoyoj. Niman no, kintlatia nochi on kojtin yejuan onokej ipan on kojyoj, niman impokyo tlejkoua ken ajkomalakotl. 19 Niman pampa on toTEKO yejuan nochi ueli kichiua, sanoyej okualan, okuajtitlan on castigo ken itlaj tlitl imimpan on israelitas. Niman on israelitas xok kinopiyaliaj teiknelilistli maski iknijtin. 20 Yejuamej kinuijsokij iminnisiuchanejkauan para kinmichtekiliaj tlakuajli, niman maski ijkon kichiuaj, xixuij. Yejuamej hasta kikuaj innakayo inkoneuan. 21 Iueyifamilia Manasés kuijsoki iueyifamilia Efraín, niman iueyifamilia Efraín kixnamiki iueyifamilia Manasés, niman in ome iueyifamilia san sekan, kinuijsokij on chanejkej Judá. Pero maski toTEKO ijkon okincastigaroj, xotlauelseu, yej kijtoua ika sanken más kincastigaros.