On pacto kitlakaitaj
11
ToTEKO onechnots nejua Jeremías, niman onechijlij: 2 "On israelitas kuajli ma kakikan tlinon tlanauatia in pacto. Xkinnotsa on chanejkej Judá niman on yejuan chantij Jerusalén, 3 niman xkimijli ika nejua nemoTEKO, iDios Israel, niktlauelia nochi tlakatl yejuan xkichiua on tlinon tlanauatia in pacto. 4 In yejua on pacto yejuan onikchiu inminuan inachtojtajuan ijkuak onikinkixtij Egipto, on país kampa para yejuamej katka ken itlaj horno kampa kipâtlaj on tepostli hierro. Ijkuakon ijkin onikimijij: 'Xnechtlakamatikan, xchiuakan nochi tlinon nejua nemechnauatia niman nemejuamej nenyeskej nokoneuan niman nejua niyes nemoDios.' 5 Niman tla nemejuamej nennechchiuiliaj cuenta, nejua nikchiuas on ken onikintlajtolmakak nemoachtojtajuan ika nikinmakas on tlajli yejuan aman nenkipiyaj, kampa on leche niman on nekutli notlaloua ken itlaj atl, kampa sanoyej tlatlaki."Niman nejua oniknankilij: "Kuajli noTEKO."
6 Ijkuakon toTEKO onechijlij: "Xuiya ipan iuejueyikalpanuan Judá niman ipan on iuejueyikalpanojuiuan Jerusalén, niman chikauak xkimijli on chanejkej in tlajtojli. Ijkin xkinmijli on chanejkej: 'Kuajli xkakikan tlinon tlanauatia in pacto, niman xchiuakan.' 7 Ijkuak onikinkixtij nenmoachtojtajuan de Egipto, ikan nochi noyojlo onikinmixkotianuij para ma nechtlakamatikan, niman desde ijkuakon hasta aman sanken ijki nikimijlitikaj. 8 Pero yejuamej xonechkakkej niman xonechtlakamatkej. Yejuamej yej okichijkej on tlen xkuajli yejuan inyoltechikaualis okinmijli ma kichiuakan. Xokinekkej okichijkej nochi ken nejua onikintlajtlanilij. Yejua ika, nejua onikinuajtitlanilij on castigo yejuan yonikimijlijka ipan on pacto.”
9 ToTEKO okseki más onechijlij: "On chanejkej Judá niman Jerusalén nochimej san sekan nechtlajtouiliaj ika xnechtkamatiskej. 10 Yejuamej kichiuaj sano yejua tlajtlakoltin yejuan okichijkaj iminachtojtajuan. Yejuamej xokinekkej onechtlakamatkej, niman okintokakej oksekimej dioses niman okinmauistilijkej. Nion Israel nion Judá xokitlakamatkej on pacto yejuan nejua onikchiu iminuan iminachtojtajuan. 11 Yejua ika, nejua nikinuajtitlanilis sen castigo yejuan yejuamej xuelis kinokixtiliskej. Maski más sanoyej chikauak nechtsajtsiliskej para ma nikimpaleui, nejua xniknekis nikinkakis. 12 Ijkuakon, on chanejkej Judá niman Jerusalén yaskej intech on dioses yejuan kimpopochuiyaj niman kintlajtlaniliskej ma kimpaleui, pero on dioses xueliskej kinmanauiskej ijkuak yejkos on castigo. 13 On chanejkej Judá sanoyej miyekej kimpiyaj imindioses no ichkich ken miyek kimpiyaj iminuejueyikalpanuan. Niman on chanejkej Jerusalén no yokinchijchijkej sanoyej miyek itlaixpanuan on dios Baal para kiuentlaliliaj kopajli. No ijki, onkaj miyek tlaixpan ken ichkich iueyikalpanojuiuan on ueyikalpan Jerusalén. 14 Yejua ika tej, tejua Jeremías, maka xmoueyikatsajtsili impampa yejuamej. Maka xnechixpantili iminueyikatsajtsilis, nion maka impampa xtlajto, pampa nejua xnikinkakis ijkuak nechtlajtlaniliskej ma nikimpaleui ipan on intlajyouilis.
15 '¿Tline uajlau on notlajsojkasiuau Israel ipan notiopan, ijkuak yokichiu sanoyej tlamach tlen xkuajli? ¿Kinemilia ika xkiselis castigo tla kinuentlalia yolkej niman notlajtolpaleuiya itech Dios?'
16 'Nejua iminTEKO yonikintokayotijka 'olivokojtli yejuan mayeualtik', niman sanoyej tlaktikaj ikan imintlakyo sanoyej uelik. Pero ikan chikauak tlauitekilistli, nikitlikuiltis iminxojyo niman nikintlatis iminmauan. 17 Nejua yejuan nochi ueli nikichiua, yejuan onikintôkak Israel niman Judá, nejua onitlanauatij para impan ma uajla on tlajyouilistli ipampa iminxompayejyeualis, pampa sanoyej onechkualanijkej ijkuak okipopochuijkej Baal."
Itlauelikniuan Jeremías kinekij kimiktiskej
18 ToTEKO okichiu para ma nikmati ika notlauelikniuan kinemilijtokej nechchiuiliskej tlen xkuajli. Yejua onechixtlajtlapoj, para nejua ma niknomaka cuenta. 19 Nejua noyolika ninemiya, ken sen borreguito yejuan kuikaj kampa kimiktiskej. Nejua xnikmatiya tla yej kinemilijtikatkaj nechmiktiskej. Notlauelikniuan kijtouayaj: "Ma tikmiktikan. Ma tiktsontekikan ken sen kojtli chika sanken chikajtikaj. Ma tikpopolokan de in tlaltikpaktli kampa nemij on tlakamej, para xokaman kelnamikiskej."
20 Pero tejua, noTEKO yejuan nochi ueli tikchiua, tejua titeyolkuitijketl yejuan tiktechiuilia tlen melajki. Tejua tikmatstikaj hasta on tlinon kinemilia yakaj. Xnechkauili ma nikita ken tikincastigaros on tlakamej, pampa yoniktlalij ipan momauan on tlinon yejuamej nechchiuilisnekij.
21 On tlakamej yejuan chantij ne Ananot, kinekiyaj nechmiktiskej niman nechnauatiayaj para maka ma nitlajto ika itokatsin noTEKO, pampa tlamo nechmiktiskej. 22 Yejua ika, toTEKO yejuan nochi ueli kichiua okinmijlij: "Nejua nemechmakas nenmocastigo: on nemotelpokauan mikiskej ipan nouisokilistli, niman intlakakoneuan niman insiuakoneuan mikiskej ikan apistli. 23 Xnokauas nion se de nemejuamej, pampa ajsis on tonajli ijkuak nejua nemechcastigaros, yejuan nenchantij ne Ananot, niman nemechajtitlanilis on tlajyouilistli."