ToTEKO kinauatia Jeremías tlinon kichiuas
16
ToTEKO onechnots, niman onechijlij: 2 "Maka xmonamikti niman maka xkimpiya mokoneuan ipan in país, 3 pampa nejua, moTEKO, nimitsijlis tlinon impan nochiuas on tekoneuan yejuan tlakatiskej ipan in país niman on tatajtin. 4 Mikiskej ikan sen temojtij kokolistli, niman xakaj chokas impampa, niman nion xakaj kintȏkas. Xintoskej ipan tlajli ken itlaj xixalistli. On nouisokilistli niman on mayantli kintlamis, niman inmikatlalnakayo kinkuaskej on totomej niman on tepeyolkej yejuan nakakuanij."5 ToTEKO no onechijlij: "Maka xkalaki ipan sen kajli kampa yakaj yomik, maka tichokas, nion maka xteititi tla timajmana ipampa, pampa intech yejuamej in chanejkej yonikinkixtilij noyolseuilis, notetlajsojtlalis niman noteiknelilis. Nejua, moTEKO ijki nikijtoua. 6 Yejuan uejueyimej niman pipitikej mikiskej ipan in país, niman xakaj kintôkas, nion xakaj kinchokilis. Nion xakaj notlajyouiltis ipan itlalnakayo noso nokuatexikalos para kiteititis ajmantli impampa yejuamej. 7 Xakaj iluichiuas ipampa on mikatsintli para kinyoltlaliskej on yejuan ken kitayaj, nion maski tla mikiskia on tajtli noso on nantli.
8 'No ijki, maka tikalakis ipan on kajli kampa onkaj se iluitl; maka timotlalis inmiuan para titlakuas niman titlaonis inmiuan. 9 Nejua, moTEKO yejuan nochi ueli kichiua, iDios Israel, nikijtoua: Nejua nikchiuas para ipan in país ma tlamikan on iluimej, niman pakilistli, niman kuikamej de iluitl, niman on kuikamej de nonamiktilistli. Niman yejua in nochiuas chika yejuamej sanken nemij, niman sano nemejuamej nenkitaskej.
10 'Ijkuak tikinmachistis on chanejkej in tlajtojli, yejuamej mitstlajtoltiskej: '¿Tline toTEKO yotlanauatij topan ma nochiua in tlen sanoyej xkuajli? ¿Tlinon xkuajli otikchijkej? ¿Katlejua tlajtlakojli otikchikej ixpan toTEKO Dios?' 11 Tejua ijkin tikinnankilis: 'ToTEKO kijtoua: Ijkin nikchiua, impampa nenmoachtojtajuan yejuan onechtlalkauikej niman okintokakej oksekimej dioses para okinueyilijkej niman okinmauistilijkej. Niman nejua uej onechtlalkauikej niman yejuamej xokichijkej notlanauatiluan yejuan nejua onikinnauatij. 12 Niman nemejuamej más onenkichijkej on tlen xkuajli xken nenmoachtojtajuan. Niman cada se de nemejuamej onenkichijkej on tlinon xkuajli nenkinemiliayaj ipan nenmoyojlo niman xominnechtlakamatkej. 13 Yejua ika, nejua nemechkixtis ipan in tlajli para nemechuikas ipan on país kampa nion nemejuamej nion nenmoachtojtajuan xokixmatkej. Ompa nenkinmauistiliskej oksekimej dioses ikan tonajli niman ikan yejuajli, niman nejua xnemechiknelis.
14 'Nejua nemoTEKO nikijtoua ika yejkos on tonajli ijkuak xok notlajtolmakaskej ijkin: 'Ipampa inemilis toTEKO, yejuan okinkixtij on israelitas de Egipto.' 15 Yej kijtoskej: 'Ipampa inemimilis toTEKO, yejuan okinkixtij on israelitas de neka ipan on país norte niman no ipan on oksekimej paises kampa yokinchajchayajka.' Nejua nikchiuas para oksepa xmokuepakan ipan nenmotlaluan, ipan on tlajli yejuan onikinmakaka nenmoachtojtajuan.
16 'Nejua nemoTEKO nikijtoua: 'Nikchiuas para ma uajlakan miyekej intlauelikniuan ken yakaj michajsikej para kinmajsikej on israelitas ken itlaj michimej. Kemaj nikchiuas para ma ualakan miyekej intlauelikniuan ken yakaj masatemojkej para kinmajsiskej niman kintejtemoskej nouiyan ipan on tepemej, ipan on tlamimiltin niman hasta ijtik techinanyoj kampa tsajtsayankej. 17 Nikita nochi tlinon kichiuaj; xitlaj iyantikaj nixpan, nion intlajtlakoluan iyantokej nixpan. 18 Achtopa nikintlajyouiltis hasta okpa ipampa on inxompayejyeualis niman ika on ueyi tlajtlakojli pampa okijtlakojkej notlal ika on tetlajyelojkej ídolos yejuan xyoltokej, niman pampa ipan nochi in tlajli yejuan nejua onikinyaxkatij okichijkej on tlajtlamach yejuan sanoyej niktlajyelita.'"
Jeremías kinotsa ToTEKO
19 NoTEKO, tinechmaka chikaualistli, tinechmanauiya, niman tinechiyana ijkuak nechchiuilisnekij tlen xkuajli. Motech ualaskej miyekej naciones yejuan ualeuaskej uejka de in tlaltikpaktli, niman mitsijliskej: "Totajuan san okinmachijchikej ídilos yejuan xmelauak dioses, yejuan xitlaj ika tepaleuiyaj pampa xkipiyaj poder. 20 ¿Sen tlakatl uelis kinochijchiuilis imindioses? ¡Tla ijkon, on melauak xejuamej dioses."
ToTEKO okinankilij Jeremías
21 Yejua ika, sepa más niman para nochipa, nikintitis nopoder on naciones, niman ijki kimatiskej ika san nejua melauak niDios.