On castigo yejuan Judá kiselis ipampa itlajtlakol
17
ToTEKO okijlij Judá: "Motlajtlakol okijkuilojkej ika on tepostli cincel, niman ika ikuayak on tetl itoka diamante ipan moyojlo yejuan ken itlaj tetl. Ipan motlaixpanuan no kipiyaj on neskayotl de moxompayejyeualis. 2 Nemejuamej israelitas nenkimauistiliaj ipan on tlaixpantin niman on iixneskayouan on ídolo Astarté yejuan onenkintlalijkaj tlatsintlaj de on kojtin mayeualtikej niman inkuapan on tlamimiltin, 3 niman impan on tepemej. Ipampa nemotlajtlakoluan, nikchiuas para ma mechichtekilikan nemoriquezas niman nenmotesoros. Niman nikchiuas para ma kitlakijkixtilikan on pipitikej tiopamej ipan on tlamimiltin kampa nenkinmauistiliaj on ídolos pampa sanoyej onkaj tlajtlakojli ipan nochi moueyitlalpan. 4 Ika onkaj tikauas on tlajli yejuan otimitsmakak ken herencia, niman mitsuikaskej ken esclavo motlauelikniuan ipan on tlajli yejuan tejua xtikixmati, pampa notlauel ken itlaj tlitl sanoyej yokauan yejuan xkaman tlamis."
Miyek sesekneka temachtiltin
5 ToTEKO kijtoua: "Ipan ma uetsi tlauelijli on tlakatl yejuan kejkuania iyojlo notech, yejuan kitlalia iyojlo intech on tlakamej niman yejuamej kintlajtlanilia ma kipaleuikan. 6 Yes ken itlaj on uitskuamekatl yejuan onkaj ne xalpatlajkan kampa xkaman ajsi atl, yejuan noskaltia intsalan on temej, ipan on tlajli istayoj, kampa xakaj chanti.
7 'Pero niktiochiuas on tlakatl yejuan notech kitlalia nochi iyojlo, yejuan notech kitlalia itlamachalis. 8 Yes ken on kojtli yejuan ijkak itempan río, yejuan ineluayouan nanaltiaj hasta kampa notlaloua on atl. Niman maski yejko on tonajli ijkuak sanoyej tona, yejua xpilinis, yej nochipa xojyoxoxojki yes. Ijkuak tlauaktok xuakis, yej nochipa tlakis.
9 'Iyojlo sen tlakatl tentikaj ikan tlakajkayaualistli niman xompayejyeualistli. Xakaj ueli kajsikamati. 10 Pero nejua, nemoTEKO, kemaj nikmatstikaj tlinon onkaj ipan iyojlo nochi tlakatl, niman nikmatstikaj kenijki tlanemilia. Yejua ika, cada se nikmakas ken yejua kimelaua kiselis de on tlen yejua okichiu."
11 On tlakatl yejuan ricojtia ikan tlaixpachoualistli nochiua ken on tototl itoka sakapollito, yejuan ijkuak tlapachoua, kimpachoua yejuan xejua iteuan. Chika on tlakatl sanken chikajtikaj, kipolos iriquezas, niman ijkon tej, tlamis inemilis ken sen tonto.
12 Toueyitiopan yejua iueyixtika trono Dios yejuan ueyixtikaj desde ipeuyan. 13 ToTEKO, tejua timochiua itlamachalis Israel. Nochimej yejuan mitstlalkauiyaj nopijpinajtiskej. Nochimej yejuan mitstlalkauiyaj popoliuiskej ken itlaj tokayotl yejuan kijkuilouaj ipan tlalkuechtli, pampa mitstlalkauiyaj tejua, yejuan ken tiamejli yejuan kimeyaltia on atl yejuan temaka nemilistli.
Jeremías kinotsa toTEKO
14 NoTEKO, xnechpajti niman nipajtis; xnechmakixti, niman nimakisas, pampa nejua san tejua nimitsueyilia. 15 On tlakamej nechijliaj: "¿Kanon onokau itlajtol toTEKO yejua ika techixkotianuiyaya? ¡Tiknekij ma nochiua aman on tlen okijtoj!"
16 Maski yejuamej ijkon nechijliaj, nejua xnimitstlajtlanilia para xkinuajtitlanili castigo niman nejua xnikinnekilia tlajyouilistli. Tejua kuajli tikmatstikaj tlinon yonikijtoj, pampa onikijtoj mixpan. 17 Maka yej tejua timochiuas nonemojtil, pampa motech ninoyolchikaua ijkuak nejua ninoyolkokoua. 18 Xkinpijpinajti on yejuan nechtotokatinemij, niman maka yej nejua; yejuamej ma nomojtikan sanoyej, niman yej maka nejua ma ninomojti. Yej xchiua para yejuamej ma tlajyouikan; kuajli xkimpopolo nochimej.
Noneki kejeuaskej on tonajli sábado
19 ToTEKO onechijlij: "Xuiya, xmotelketsa, niman xteixpantili notlajtol ipan on ueyitsakuijlotl itoka Inueyitsakuijlou on Tlakamej kampa kalakij niman kisaj ireyes Judá. Niman no ijki xchiua impan on oksekimej ikalakiyouan on ueyikalpan Jerusalén 20 Ijkin xkimijli nochimej: 'Reyes niman nochimej yejuan nenchanejkej Judá, nochimej yejuan nenchanejkej Jerusalén yejuan nenkalakij ipan in ueyitsakuijlomej, xkakikan itlajtoltsin toTEKO.' 21 ToTEKO ijkin kijtoua: 'Ipan on tonajli sábado, niman para maka itlaj ipan nochiuas nenmonemilis, maka nenkitiskej itlaj, nion maka itlaj nenkalaktiskej ipan iueyitsakuijlouan on ueyikalpan Jerusalén. 22 No ijki, maka nenkixtiskej itlaj tlamamajli ipan nenmochan ipan on tonajli sábado. Nion maka nekichiuaskej itlaj tekitl ipan on tonajli sábado. Yej, xkejeuakan on tonajli sábado ken sen yektonajli, ijkon ken onikinnauatij nenmoachtojtajuan.' 23 Pero yejuamej xonechkakkej, nion xonechtlakamatkej. Yej onoyoltechikajkej niman xokinekkej onechtlakamatkej nion xoixtojtonkej.
24 'Nejua, nemoTEKO, nemechijlia: 'Melauak xnechtlakamatikan; maka xkalaktikan itlaj tlamamajli ipan iueyitsakuijlouan on ueyikalpan ijkuak sábado. Xkejeuakan on tonajli sábado ken sen yektonajli, niman maka xchiuakan itlaj tekitl. 25 Tla ijki nenkichiuaskej, nochipa nemiskej reyes yejuan notlaliskej ipan itrono David. Niman yejuamej kalakiskej ipan iueyitsakuijlouan inueyikalpan ikan carretas niman ipan caballos, iminuan intlayekankauan niman inuan on chanejkej Judá niman Jerusalén. Niman nikan Jerusalén nochipa tojlan chantiskej. 26 Niman uajlaskej on chanejkej ipan on uejueyikalpanmej de Judá yejuan chantij iyejyeualkan Jerusalén, on chanejkej ipan iueyitlapanuan Benjamín, de on ixtlauatl, de on tepeyoj, niman kampa iueyitlapanuan Négueb. Yejuamej kinuajuikaskej yolkej ipan on tiopan para on uentli yejuan nochi tlatla niman no para okseki uentin. No kuajkiskej on uentin de trigo noso cebada, niman on kopajli, niman on uentin yejuan ika kitemakaj tlaxtlauijli. 27 Pero tla nemejuamej xnenkitlakamatij notlanauatil para nenkejeuaskej on sábado ken sen yektonajli, niman ika xitlaj tlamamajli nenkalaktiskej ipan iueyitsakuijlouan Jerusalén, tla ijkon nejua niktlatlatilis iueyitsakuijlouan on ueyikalpan. On tlitl no kitlatis ipalacios Jerusalén niman xakaj uelis kiseuis.'"