On tepalkachijketl niman on tlalajmojli
18
ToTEKO onechnots, niman onechijlij: 2 "Jeremías, xuiya ichan on tepalkachijketl niman ompa nimitsijlis sen tlajtojli." 3 Nejua Jeremías oniaj niman oniknextito on tepalkachijketl. Tekititikatka ika on tlalajmojli ipan temalakachtli. 4 Ijkuak xkuajli kisaya on tlinon kinekiya kichijchiuas, sano ika on sokitl oksejpa kichijchiuaya, hasta kaman kisaya ken yejua kinekiya.5 Kemaj toTEKO onechijlij: 6 "Nokoneuan israelitas, ¿Tlen nekuitiaj xniuelis nikchiuas nenmouan, ken kichiua on tepalkachijketl ika on tlalajmojli? Nemejuamej no nenmijkej ken on tlalajmojli yejuan onkaj ipan imauan on tepalkachijketl. 7 Ijkuak niknekis, niuelis nikixtis, nikxixinis niman nikxoxotonis sen nación noso sen reinojyotl. 8 Pero tla on nación kitlalkauiya on tlinon xkuajli kichiuaya, tla ijkon nejua xok niktitlanilis on castigo yejuan yonikijtoka niktitlanilis. 9 Tla nikijlis ika nikpeualtis niman nikiskaltis sen nación noso sen reinojyotl, 10 pero on nación kichiua tlen xkuajli niman xkineki kakis notlajtol yejuan ika nikinixkotianuiya, tla ijkon nejua xok nikuajtitlanilis on tlen kuajli ye nikpiyaya para yejua.
11 'Yejua ika, xkinmijli, on chanejkej Judá niman Jerusalén ika nejua iminTEKO nikinmijlia: 'Nikchijtikaj planes tlinon xkuajli nenmechchiuilis; niknemilijtikaj nemechcastigaros. Yejua ika tej, xkajkauakan on xkuajli ojtli yejuan nenkitokaj; xkuektlalikan nenmonemilis niman on tlinon nenkichiuaj.' 12 Pero yejuamej ijkin mitsijliskej: '¡Maka xpolo motiempo topampa! Tejuamej yotikijtojkej ika nochipa tikintokaskej toídolos. Tinemiskej ken tejuamej tiknekij, niman tikchiuaskej on tlinon xkuajli toyoltechikaualis techijlia ma tikchiuakan.'"
13 Yejua ika, toTEKO kijtoua: "Xtetlajtoltikan intech on naciones, tla kamanian yakaj ijkon yokakka kijtoua, sanoyej xkaujli ken yejua on. ¡On chanejkej Israel yokichijkej on tlen sanoyej xkuajli! 14 ¿Popoliui kamantika on nieve yejuan onkaj ipan on uejueyimej tepemej de Líbano? Melauak ika ka. ¿Ka manian uakis on atl sejsek yejuan ualeua ipan on tepemej? Melauak ika ka. 15 Pero nokoneuan yonechelkajkej, niman kimpopochuiyaj on ídolos. Yokitlalkauijkej iminojui, on ojtli yejuan yeuejkaui kitokayaj, niman yej kintokaj on ojtin yejuan xkinmixmatij. 16 Yejuamej yokichijkej para iminpaís yonochiu sen xalpatlajkan. On tojlamej nochipa ika uetskaj. Nochimej yejuan ompaka panouaj sanoyej kimojkaitaj niman hasta no nokuauiuixouaj. 17 Nejua, ken sen ajakatl yejuan ualeua ikisayan tonaltsintli, nikinsesemanas on israelitas. Nikchiuas para ontlatlaksaskej inmixpan imintlauelikniuan. Nejua nikintlalkauis; nejua xnikinkakis ipan on tonajli ijkuak nikincastigaros."
On tlen kinemiliaj kichiuiliskej Jeremías
18 Kemaj, on tlakamej ijkin okijtojkej: "Kuajli ma tiknemilikan tlinon tikchiuaskej para tikmiktiskej Jeremías. Maski tikmiktiskej, tejuamej xkaman techpoloskej tiopixkej yejuan techmachtiskej, nion on tlamatkej yejuan techtlakanonotsaskej, nion on tiotlajtojkej yejuan techijliskej itlajtoltsin Dios. Ma tikteixpanuikan de itlaj tlin xkuajli okichiu, para ma kimiktikan. Maka ma tikakikan on tlinon yejua techijlia."
Iueyikatsajtsilis Jeremías
19 ¡NoTEKO, xnechchalita! ¡Xkaki tlinon kijtouaj notlauelikniuan! 20 ¿Ka yej ikan on tlen xkuajli kitlaxtlauiliaj sen tlakatl yejuan kuajli kichiua? ¡Yejuamej yokichijchijkej notlalkon! Xkelnamiki ika nejua nimitsixnamikini pampa timitsnotsa ipampa yejuamej, para timitsijliani xkejkueni motlauel ipan yejuamej. 21 Pero aman, xchiua para inkoneuan ma mikikan ikan apistli noso ma kinmiktikan ipan nouijsokilistli. Ma nokauakan kakaualtsitsimej insiuauan niman maka ma kipiyakan inkoneuan! ¡Inueuentsitsiuan ma kinmikti on kokolistli, niman intelpochuan ma mikikan ipan nouisokilistli. 22 Ijsikapan intech xkinuajtitlani on tlakamej yejuan tlachtektinemij ¡Ma kakisti kenijki mojkatsajtsij! Ijkon xchiua pampa otlachkuakej ipan tlajli para ompa nonuetsis; okitlalijkej tlaltlaliltin ipan noojui. 23 Pero tejua, noTEKO, tikmati nochi tlinon yokinemilijkej kichiuaskej para nechmiktiskej. Maka xkintlapojpolui inxompayejyeualis; maka tikelkauas imintlajtlakoluan! ¡Xchiua para ma xinikan mixpan; xkincastigaro ikan motemojtijtlauel!