Sen ejemplo de on tsotsokojli tlapanki
19
ToTEKO onechijli: "Xuiya niman xkoua sen tsotsokojli. Kemaj xkinnotsa keskimej ueuetkej tlayekankej de on kalpan niman sekimej tiopixkej ueuentsitsimej. 2 Xkinuika ipan on Ixtlauatl Ben-hinom, ixpan on ueyitsakuijlotl itoka Tepalkatlapanki, niman ompa xkinchikajkaijli in tlajtoltin yejuan nimitsijlis. 3 Ijkin xkimijli: 'Reyes de Judá niman chanejkej Jerusalén, xkakikan itlajtotsin toTEKO yejuan nochi ueli kichiua, iDios Israel: Nikuajtitlanis sen temojtij tlajyouilistli, niman nochi on akin kakis kuekuetlakas ikan nemojtijli. 4 Ijkon nikchiuas pampa on israelitas onechtlalkauikej, niman in tlajli okijtlakojkej pampa okitlatijkej kopajli imixpan on oksekimej dioses yejuan yejuamej xkaman okinmauistilijkaj, nion iminachtojtajuan, nion inreyes Judá. Niman in tlajli okitemiltijkej ikan inyesyo on tlakamej yejuan xkipiyaj tlajtlakojli. 5 Niman no okinchijchijkej tlaixpantin kampa okintlatijkej inkoneuan ken uentli yejuan nochi tlatla para Baal. Yejua in, nejua xonikinnauatij nion xonikimijlij, niman nion xkaman oniknemilij. 6 Yejua ika, yejkos sen tonajli ijkuak nikan xok itoka yes Tófet nion Ixtlauatl de Ben-hinom, yej iitoka yes Ixtlauatl kampa Otemiktijkej. 7 Nikan nikinxoxotonilis on tlinon yokinemilijkaj kichiuaskej on tlakamej yejuan chantij Judá niman Jerusalén. Nejua nikchiuas para on intlauelikniuan ma kintlanikan niman ma kinmiktikan. Niman inmikatlalnakayo ma kikuakan on totomej yejuan nakakuanij niman no ijki on tepeyolkej. 8 Nikchiuas para ipan in ueyikalpan maka sa yakaj ma chanti, yej onyas itlaj yejuan sanoyej temomojtis. Nochimej yejuan ompaka panoskej nomojtiskej niman tlamojkaitaskej ijkuak kitaskej ken kuajli tlaxoxotontos. 9 Nikchiuas para nemotlauelikniuan kiyejyeualtsakuaskej on ueyikalpan, niman mechuijsokiskej hasta xok nenkipiyaskej on tlen nenkikuaskej. Ijkuak on, sano nemejuamej nennokuaskej, hasta nenkinkuaskej nemokoneuan tlakamej niman siuamej.'"10 Kemaj, toTEKO onechijlij: "Xtetlajtlapana on tsotsokojli imixpan on yejuan ompa mouan nemij. 11 Kemaj ijkin xkimijli: 'ToTEKO yejuan nochi ueli kichiua, kijtoua: Nikinpopolos in chanejkej niman in ueyikalpan, ijkon ken yakaj kitetlajtlapana sen tsotsokojli de tlalajmojli para xok kaman kikuektlaliaj. On chanejkej kintlalpachoskej on mikatsitsimej ne Tófet, pampa xok onyas kanon uelis kintlalpachoskej. 12 Ijkon nikchiuas iuan in ueyikalpan niman ichanejkauan. No ijki nikauas in ueyikalpan yejuan yonijtlakoj ken yoijtlakau Tófet. Nejua nemoTEKO ijki nikijtoua. 13 On kaltin de Jerusalén, impalacios on reyes de Judá niman inkuapan on kaltin kampa kinuentlaliliayaj kopajli on sitlalimej, niman kampa kitoyauayaj vinouentli para oksekimej dioses, kinteneuaskej xok chipajkej, sano ijki ken Tófet.'”
14 Ijkuak nochi in yokijtoj Jeremías, okis de Tófet, kampa toTEKO okontitlanka ma tlajtoti ikan itokatsin, niman ouajnotelkets ipan ikiauak on ueyitiopan. Ompa okimijlij nochimej on tojlanmej: 15 "ToTEKO yejuan nochi ueli kichiua, iDios Israel, kijtoua: 'Nikontitlanilis in ueyikalpan niman nochimej on kalpanmej yejuan onokej nisiu on castigo yejuan yonemechijlijka, pampa nemejuamej nenmoyoltechikauaj para xnenkitlakamatij notlajtoltsin.'”