Tiotlajtojli itechkopa Pasur
20
Ijkuak Pasur, ikoneu Imer, yejuan tiopixki katka niman yejuan ueyitlachixki katka ipan on ueyitiopan, okak on tiotlajtojli yejuan okijtoj Jeremías, xokuelitak. 2 Yejua ika, otlanauatij ma kimajmailikan Jeremías, niman ma kitepitskualtikan ikxiuan ipan on cepo yejuan onkatka inakastlan iueyitskuijlou Bejamín ne tlakpakkopa nisiu on ueyitiopan. 3 Uajmostla otlanauatij para ma kixtikan ikxiuan Jeremías ipan on cepo. Kemaj Jeremías okijlij: "ToTEKO yomitspatilij motoka. Aman xok motoka yes Pasur, yej motoka yes Magor-misabib,a 4 pampa toTEKO mitsijlia: 'Nejua nikchiuas para sano tejua sanoyej timomomojtis niman para nochimej motlajsojkaikniuan. Mixpan, on motlajsokaikniuan kinmiktiskej intlauelikniuan ikan inespada. Nejua nikintemaktilis nochimej on chanejkej Judá imak on rey de Babilonia. Sekimej kinmajsis niman kinuikas ken esclavos hasta Babilonia, niman oksikemej kinmiktis. 5 No ijki nikinkauilis imintlauelikniuan ma kinkuilikan nochi on riquezas yejuan onkaj ipan in ueyikalpan, nochi tlen inyaxka, nochi on tlajtlamach yejuan patioj niman nochi intesoros on reyes de Judá, para ma kiktikan Babilonia. 6 Niman tejua Pasur, mitsuikaskej Babilonia, iuan nochi mofamilia. Ompa timikis, niman ompa mitstlaltȏkaskej tejua niman nochimej motlajsojkaikniuan yejuan tikinmijliaya tiotlajtojli yejuan xmelauak.'"Jeremías kijlia toTEKO on tlino kijyouiyaya
7 NoTEKO, tejua otinechtlapoltij, niman nejua san oniknokauilij. Tejua más tikojtik, niman otinechtlan. Nochipa noka uetskaj, nochimej nechpijpinauiyaj. 8 Nochipa ijkuak nitiotlajtoua nikinmijlia ika onyas miyek tlauejli niman miyek xoxotonilistli. Ijkuak ijkon nikchiua, nochipa nechuijuikaltiaj niman nechpijpinauiyaj pampa nikinmijlia motlajtoltsin. 9 Tla nikijtoua: "Xok nikteneuas noTEKO, xok nitenojnotsas ikan itokatsin", ijkuakon motlajtoltsin nojtikopa nokuepa kej itlaj tlimilinajli yejuan nechtlatia, yejuan kalaki hasta ipan noomiyouan. Nikchiua kanika para xnitiotlajtos, pero xniueli nikchiua.
10 Nikinkaki miyekej ika ijkin kiichtakaijtouaj: "¡In tlakatl sanoyej temomojtia pampa kijtojtinemi onkaj tlamojtilistli nochiuiyan para nochimej." Niman kinojliaj: "¡Xualakan, ma tikteixpanuikan!" No ijki on notlajsojkaikniuan sa kichaj ma nikchiua itlaj xkuajli. Niman kijtouaj: "Ma tikitakan tla sano yejua nokajkayaua; para tiktlaniskej niman tiktlakuepiltiskej." 11 Pero tejua, noTEKO, nouan tinemi ken sen soldado yejuan xakaj kitlani. On yejuan nechtlaueltotokatinemij uetsiskej, niman yejuamej xueliskej nechtlaniskej. Xkuajli kisas tlinon kinemiliaj kichiuaskej. Nosematij nopijpinajtiskej, niman on impinauilis xkaman kelkauaskej. 12 NoTEKO, tejua akin nochi ueli tikchiua, tejua yejuan tikixtlaloua nochi ika yolmelajkilistli. Tejua tikita hasta on tlinon kineki niman kinemilia sen tlakatl ijtikopa. Xnechkauili ma nikita kenijki tikincastigaros on tlakamej, pampa nejua nikaua ipan momauan on tlinon yejuamej nechchiuiliaj.
13 Xkuikatlalikan toTEKO, xkueyiteneuakan pampa yejua kimakixtia on yejuan tlajyouiya de ipan imauan on xompayejyeuamej.
14 ¡Niktlauelia on tonajli ijkuak onitlakat! On tonajli ijkuak nonanaj onechtlakatilij nejua xnikyekteneua! 15 Niktlauelia on akin okijlij notataj ma paki, on yejuan okijlij ika ye kipiyaya sen itlakakoneu! 16 ¡On tlakatl ipan ma nochiua ken on uejueyikalpanmej yejuan Dios okinxoxotonij! ¡Ijkuak kualkan ma kaki ken tsajtsij de nekokojli, niman tlakualispan ma kaki ken kipitsaj on trompeta para nouijsokilistli, 17 pampa Dios onechpaleuij xonimik ijti nonanaj! Tlamo ijtik nonanaj yejua nochiuaskia notlalkon, niman nejua xkaman ninemiskia. 18 ¿Tline onikis ijti nonanaj san para nikitas on tlajyouilistli niman on ajmantli, niman para tlamis nonemilis ikan pinaualistli?