ToTEKO kijtoua tlinon ipan nochiuas Jerusalén
21
On rey Sedequías okititlan Pasur, ikoneu Malquías, niman on tiopixki Sofonías, ikoneu Maaseías, para ma kitatij Jeremías niman ma kitlajtlanilikan: 2 "Xtechchiuili sen ueyi favor niman xtlajtolti toTEKO topampa, pampa on Nabucodonosor, rey de Babilonia ye techuijsoktikaj. Tla saman kinekiskia toTEKO kichiuaskia sen ueyi milagro niman kichiualtis Nabucodosor para makasa ma techuijsoki."3 Kemaj toTEKO okinots Jeremías, niman okijlij on tlen kinmijlis Pasur niman Sofonías. Yejua ika Jeremías okinnankilij on yejuan okomintitlan Sedequías: "Xkijlikan Sedequías 4 ika toTEKO, iDios Israel, ijkin kijtoua: 'Nejua nikchiuas para nemejuamej xtsinkisakan intech on soldados yejuan nemij ikuitlapan in tepanchinantli, yejuan nemejuamej nenkinmixnamikij de on isoldados on rey de Babilonia niman on caldeos, niman nejua nikinsentlalis itlajkotian in ueyikalpan. 5 Sano nejua nemechuisokis ikan nochi nopoder niman ika notemojtij tlauel. 6 Nikinmiktis nochimej on tlakamej yejuan nemij ipan in ueyikalpan; on tlakamej niman on yolkej kinmiktis sen temojtij kokolistli. 7 Kemaj, tla yopanok on kokolistli, on nouisokilistli niman on mayantli, nochimej on yejuan xmikiskej nikintemaktilis itech Nabucodonosor niman intech on oksekimej intlauelikniuan yejuan kinekij kinmiktiskej: Sedequías, on rey de Judá, iuejueyitlayekankauan niman isoldados. Nikchiuas para intlauelikniuan ma kinmiktikan xikan teiknelilistli nion iknoitalistli. Nejua nemoTEKO ijki nikijtoua.'
8 'No xkimijli on yejuan chantij Jerusalén ika nejua nemoTEKO, nikijtoua: 'Yejuamej ma kitlapejpenikan tla kinekij nemiskej noso tla kinekij mikiskej. 9 On tlakatl yejuan nokauas ipan in ueyikalpan mikis ipan nouisokilistli, noso ikan on mayantli, noso ika on kokolistli. Pero on yejuan kisas niman notemakas intech on caldeos yejuan aman kuijsoktokej in ueyikalpan, uej xmikis, yej kauiliskej ma nemi. 10 Ijkon nochiuas pampa nejua ijki yonikijtoj ika xnikuajkis ipan in ueyikalpan tlen kuajli yej nikuajkis on tlen xkuajli. Nejua nikmaktilis on rey de Babilonia in ueyikalpan, niman yejua kitlatlatilis. Nejua nemoTEKO ijki nikijtoua.'
To TEKO kijtoua tlinon kichiuilis on rey de Judá
11-12 'Xkimijli on yejuan nemij ichan on rey de Judá, on teuejkakoneuan itech rey David, on tlinon nikijtoua: 'Xkakikan tlinon mechijlia toTEKO: Nochipa xtechiuilikan tlen melajki; xchiua para on yejuan tetlajyouiltiaj makasa makichiuakan. Maka yej ipampa on tlin xkuajli tikchiua, kichiuas para notlauel tlikuis ken itlaj on tlitl yejuan xnemis akinon kiseuis.
To TEKO kijtoua tlen castigo kiselis Jerusalén
13 'Tejua ueyikalpan Jerusalén, tionkaj ipan sen tlakpak tepetl, yejuan sanoyej más tlakpak xken on ixtlauatl. Yejua ika, timoueyimati niman tiknemilia ika timakisas, niman tikijtoua: ¿Akinon uelis nechuisokis? ¿Akinon uelis yejkos kampa nejua ninomanauiyaj? Pero nejua moTEKO nimitsijlia ika nimitsuisokis. 14 Nejua nimitstlaxtlauilis ken mitsmelauaj ipampa on tlen otikchiu. Niktlakechis tlitl ipan motlaluan kampa kojyoj, niman on tlitl kitlatis nochi tlinon onkaj iyeualkan on kojyoj. Nejua, nemoTEKO, ijki nikijtoua.’”