Kixoxotoniaj Babilonia
51
ToTEKO kijtoua: "Nikuajtitlanis chikauak ajakatl yejuan kixoxotonis Babilonia niman on yejuan xipan nechitaj. 2 Nikchiuas para itlauelikniuan Babilonia ma kitlajkalikan tlakpak ken kixiniaj tlakpak on trigo ijkuak kajaniaj; nikchiuas para maka sa yakaj ma chanti ipan iueyitlalpan. Ijkuak yejkos on tonajli para kixoxotoniskej, kiyejyeualoskej para kuisokiskej. 3 ¡Nemejuamej arqueros, xpiyakan listos nemoarcojtlaminal! ¡Xtlalikan nemoteposchaleco! ¡Maka xkinmiknelikan on telpokamej babilonios! ¡Xkinmiktikan nochimej insodados! 4 Ipan nochi impaís on babilonios, xintoskej inmikatlalnakayouan on tlakamej ipan on uejueyiojtin. 5 Maski Israel niman Judá otlajtlakojkej nixpan niman okitemiltijkej impaís ika tlajtlakojli, nejua nemoTEKO yejuan nochi ueli nikchiua, niiDios Israel yejuan niYektli, sanken xnikintlalkauiya yejuamej.6 '¡Xcholojteuakan de Babilonia! ¡Ma nomakixti akin uelis! ¡Maka xmikikan san ipampa itlajtlakol! In yejua tonajli ijkuak niktlakuepiltis niman niktlaxtlauilis ken kimelaua kiselis. 7 Babilonia katka ipan noma ken sen copa de oro yejuan kitlauantiaya nochi tlakatl ipan in tlaltikpaktli. On naciones koniyaj on vino niman tlamachilispoliuiyaj. 8 Pero san isijkapan Babilonia okixoxotonijkej. ¡Xchokakan ipampa yejua! Xkuajkikan on pajtli para kipajtiliskej kampa kokoua; xkitakan tla uelis pajtis. 9 Yotiktlalilijkej pajtli kampa nokokoua Babilonia, pero xouel opajtik. ¡Xtlalkauikan! Tiauij, ma titejkuanikan, cada se ma uiya itlalpan, pampa itlajtlakoluan yoajsik hasta ipan cielo, más tlakpak hasta okipanauij on moxtin."
10 ToTEKO yokiteititij ika tejuamej timelajkanemij. Xuajlakan, tiauij tikomintlajtlajtouiliaj ichanejkauan Jerusalén on tlinon yokichiu toTEKO Dios.
11 To TEKO kineki kixoxotonis Babilonia, niman yejua yokinyoleu on reyes de Media para no ma kinekikan. On yejua ika kitlakuepiltia toTEKO ipampa on tlen okichiuilijkej itiopan. ¡Xkintlatekiltikan inkuayak nenmoflechas! ¡Xpiyakan listo nenmoescudos! 12 ¡Xkintlalikan banderas para ma kitakan ika nenkintlajkaliskej itepanchinanuan Babilonia! ¡Xkintlalikan miyekkej soldados! Ma nemikan soldadostlajpixkej! ¡Ma niyanakan soldados yejuan nemiskej listos para teixnamikiskej! Ijkon xchiua pampa toTEKO ijki yokitlalijka para kichiuas on tlinon yejua yokijtojka kinchiuilis on chanejkej Babilonia.
13 Tejua, Babilonia, yejuan tinemi intsajlan on uejueyimej ríos niman tikpiya miyek riquezas, ¡yoyejkok on tonajli ijkuak tipopolouis, on tonajli ijkuak tejua titlamis! 14 ToTEKO yejuan nochi ueli kichiua, ijkin yonotlajtolmakak ikan itokatsin: "¡Nikuajtitlanis miyek motlauelikniu, ken itlaj chapolimej niman yejuamej nokuikatiskej ika ueyi pakilistli pampa yomitstlankej!"
Kuikatl yejuan kiueyiteneua Dios
15 ToTEKO ikan ipoder okichijchiu tlaltikpaktli; ikan itlamatkilis okitlalij in tlaltikpaktli para san kampa onyas; ika itlamachilis okipatlau on cielo. 16 Ikan itlajtol kenon tlakomonajli, kakistilia on atl ipan cielo; yejua kichiua para ma tlejko on moxtin desde imanian in tlaltikpaktli, Kichiua ma petlani on tlapetlanalistli ijkuak kiaui, niman kimakaua on ajakatl ne kampa yejua kejtikaj. 17 Nochi tlakatl tonto niman xkinekij tlakakiskej. On ídolos kinmixkajkayauaj on yejuan kinchijchiuaj; on tlaixkopinaltin tlaixkajkayauaj niman xyoltokej. 18 Xitlaj ika valerouaj, yej san tlaixkajkayauaj. Ijkuak toTEKO techyolkuitis, on ídolos niman on tlaixkopinaltin kimpopolos. 19 ¡Pero iDios Jacob sanoyej oksekneka. Yejua okichijchiu nochi tlen onkaj niman tlen nemi! Yejua okitlapejpenij Israel para yejua iyaxka yes. ToTEKO itoka toTEKO yejuan nochi ueli kichiua.
ToTEKO okitekitiltij Babilonia para castigo
20 ToTEKO kijtoua:"¡Babilonia, tejua ken tinomartillo, ken tinotepos yejuan ika nikinuisoki naciones niman nikinxoxotonia reinojyomej. 21 Moka tejua nikinmiktia caballos niman on caballoyetiuij, on carretas de guerra niman on yejuan impan yauij. 22 Moka tejua nikinmiktia on tlakamej niman siuamej, on ueuentsitsimej niman on kokonej, on ichpokamej niman on telpokamej. 23 Moka tejua nikinmiktia on tlajpixkej iuan imborregos, on yejuan tlaxoponiaj iuan inuakaxuan, on yejuan tlamandarouaj iuan inuejueyitekiuajkauan.
Castigo yejuan kiselis Babilonia
24 'Pero nemejuamej nenkitaskej ken niktlaxtlauilis Babilonia iuan nochimej on chanejkej ken kinmelaua, pampa okichiuilijkej Jerusalén on tlen xkuajli. Nejua nemoTEKO ijki nikijtoua.
25 'Nejua nimitsuijsokis tejua Babilonia yejuan tikpiya poder ken sen tepetl para tikmikia nochi tlakatl ipan in tlaltikpaktli. Nejua moTEKO ijki nikijtoua. Nejua nimitsmailis para nimitscastigaros. Nimitsajtemimilos desde tlakpak impan on temej uejueyimej niman nimitskauas ken sen tepetl yejuan yotlatlak. 26 Nion sen tetl yejuan kisas ipan on tlaxoxotonilistli xok uelis oksejpa kitekitiltiskej para kalchiuaskej. Timokauas para nochipa kampa xok yakaj chantis. Nejua moTEKO ijki nikijtoua.
27 '¡Xtlalikan sen bandera para xteititikan ika onyas nouijsokilistli! ¡Xpitsakan on trompeta niman ma nokuiteuakan on naciones para kuijsokiskej Babilonia! ¡Xkinualeuitikan on renojyomej de Ararat, de on Mini niman Asquenaz para ma kixnamikikan! ¡Xteneuakan sen ueyitlayekanki soldado para tlayekanas ipan on nouijsokilistli! ¡Ma yakatstiakan on caballojyetiuij ken itlaj chapolimej yejuan sanoyej tlauelejkej! 28 Xkinnotsakan on naciones para ma tlauijsokikan. Xkinnotsakan on reyes de Media, on gobernadores niman iminuejueyitekiuajkauan, niman nochimej on yejuan kinmandarouaj."
29 Inueyitlalpan on babilonios uiuixkas niman kuekuetlakas, pampa toTEKO ye kichijtikaj on tlinon okinemilij kichiuas para kixoxotonis Babilonia niman nokauas sen temojtij xalpatlajkan, 30 Isoldados Babilonia xok teixnamikij, yej yonokaltsakukej ipan on ueyi kajli kampa nemij miyekej soldados. Yejuamej aman xok kojtikej, niman hasta nesij ken siuamej. On intlauelikniuan okintlajtlapanilijkej inuejueyitsakuijlouan para okalakkej ipan inuejueyikalpanuan, niman okintlatilijkej inkaluan. 31 On tlajtojkamej notlajtlalouaj, se yau ikuitlapan okse para konijliskej on rey de Babilonia ika iueyikalpan yokitlankej. 32 Intlauelikniuan yokinoyaxkatijkej nochiuiyan kampa ueliya kipanouayaj on ríos. Yokintlatlatilijkej kampa yejuamej ueliyaj namanauiyayaj niman on soldados sanoyej yonomojtijkej. 33 Ijkin nochiuas pampa toTEKO yejuan nochi ueli kichiua, iDios Israel, kijtoua: "¡Babilonia yonokau ken on kampa kuatsaj trigo ijkuak kichojcholouaj para kiteiniaj!"
34 On chanejkej Jerusalén, on iueyikalpan Sión ijkin kijtouaj: "Nabucodonosor, irey Babilonia, onechkuejkuechtilij niman onechtoloj. Onechkau ken itlaj on plato yejuan xitlaj kipiya. Ken itlaj on temojmojtij xkuajli ayolki, onechtoloj; niman oixuik ika on tlinon más okuelilij de nejua, niman on yejuan okixuikau okitlajkal. 35 ¡Ma kitlaxtlaua Babilonia on tlen xkuajli onechchiuilij! ¡Ma kitlaxtlauakan on babilonios impampa on tlakamej yejuan onechinmiktilijkej!"
Ipromesa toTEKO para Israel
36 ToTEKO kijtoua: "Nejua nemechmanauis ken kitocaroua. Nejua nikintlakuepiltis nenmotlauelikniuan. Nejua nikchiuas para ma uaki on río niman on ameyaltin de Babilonia. 37 On ueyikalpan Babilonia nokauas ken teolochojli, kampa niyanaskej on yolkej chacales. Ompa xok yakaj chantis, niman nochimej yejuan kitaskej sanoyej kinmomojtis.
38 On chanejkej nochimej nanalkaskej ken leones niman ken leones kokonej. 39 Ijkuak tonalmikiskej, nejua nikinmakas ma konikan tlaonijli yejuan kintlauantis, niman kichiuas para ma tlamachilispoliuikan. Niman ijki yejuamej sanoyej kochmikiskej niman xokaman tlachaskej. Nejua nemoTEKO ijki nikijtoua. 40 Kemaj nikinuikas nepa kampa tlamiktiua, ken kinuikaj on borregojkokonej, chivos niman on okichborregos."
Kitlanij Babilonia
41 ToTEKO ijkin kijtoua: "¡Babilonia, ueyikalpan yejuan sanoyej kixmatiyaj niman kiueyiteneuayaj ipan nochi tlaltikpaktli, yejua youets, yejua yokitlankej! ¡Sanoyej nomojtiaj on naciones ijkuak kitaj! 42 On itlauelikniuan Babilonia sanoyej onajkomankej, ken najkokuij on akoxonaltin de on mar niman okitlapachojkej. 43 Iuejueyikalpanuan kuajli yokinxoxotonijkej, kenon tlajli uaki kampa xitlaj onkaj, kampa xakaj chanti, kampaka xakaj panoua.
44 'Nejua nicastigaros on dios Bel yejuan kipiyaj ne Babilonia. Nikchiualtis ma kisotla on tlen okikuaj, niman on naciones xokaman oksejpa kimauistiliskej. ¡Ye kuajli itepanchinanuan Babilonia yoxinkej!
45 'Nokoneuan, amanaman xkisakan ompa. ¡Maka yej teuan nenmikiskej de on notemojtij tlauel! 46 Maka xmomojtikan, nion maka xmojkamikikan, ipampa on tlen nenkakij kijtouaj ipan in país. Cada xipan kijtoskej oksekneka on tlen nochiuas. Ye ijki onkaj para nochiuas on tlin sanoyej xkuajli ipan in país, pampa nikan ika nokauaj nouijsokij on yejuan tlamandarouaj. 47 Yejkos tonajli ijkuak nikincastigaros on ídolos de Babilonia. Nochi tlakatl ipan in país nopijpinajtis niman nochiuiyan xintoskej mikatsitsimej. 48 On cielo niman in tlaltikpaktli niman nochi tlinon onkaj, pakiskej ijkuak uetsis Babilonia, ijkuak yejkokej on yejuan ualeuaskej norte on yejuan kixoxotoniskej. Nejua nemoTEKO ijki nikijtoua. 49 Kemaj, Babilonia melauak uetsis pampa okinmiktij on nokoneuan israelitas, niman impampa on yejuan okinmiktij ipan nochi in tlaltikpaktli."
Tlajtojli para on judíos yejuan nemij Babilonia
50 Nemejuamej yejuan ouel onencholojkej kampa otemiktiuak, maka xmoteltikan. Niman maski nennemiskej uejka de nemopaís Israel, maka nenkelkauaskej toTEKO niman xkelnamikikan Jerusalén. 51 Nemejuamej nenkijtouaj: "Tipinauaj ijkuak tikakij ken techuijuikaltiaj. On pinaualistli nochi yotechnokentij, pampa on tlakamej yejuan xchanejkej yokalakkej niman yokijtlakojkej on ueyitiopan kampa más tlayekkan." @<check the last sent.> 52 Pero toTEKO kijtoua: "Yejkos tonajli ijkuak nejua nicastigaros iídolos Babilonia, niman nochiuiyan ipan iminueyitlalpan nochi tlakatl tetenas de nekokojli. 53 Niman maski Babilonia tlejkoskia hasta ipan cielo para kitlalis tlakpak kampa niyanas, nejua hasta ompa nikomintitlaniskia itlauelikniuan yejuan kixoxotoniskej. Nejua nemoTEKO ijki nikijtoua."
Kixoxotoniaj Babilonia
54 Desde Babilonia ualeua on kenijki ajmankachokaj, desde ipan impaís on babilonios uajkakisti ken tlaxoxotoniua. 55 ToTEKO, yejua kixoxotonia Babilonia; yejua kichiuas para maka sa ma kakisti ken on iluimej. Intlauelikniuan, ipan yaskej yejuan chikauak kakistis ken itlaj ikoxonalis on mar, sanoyej chikauak kakistis ijkuak kuijsokiskej Babilonia. 56 Ouajlajkej okixoxotonikoj Babilonia; yokinmajsikej insoldados, niman yokintepojpostekilijkej iminarcos pampa toTEKO yejua sen Dios yejuan cada se kimaka ken se kimelaua.
57 On Rey, nemoTEKO yejuan nochi ueli kichiua, kijtoua: "Nikintlajtlauantis itlayekankauan Babilonia, imintlamatkauan niman imingobernadores, niman iminuejueyitekiuajkauan niman insoldados. Yejuamej sanoyej kochmikiskej, niman yejuamej xokaman tlachaskej.
58 'Nejua nemoTEKO yejuan nochi ueli nikchiua, nikijtoua: "Itilajka on tepanchinantli de Babilonia nochi tlamis kixoxotoniskej, niman iminuejueyitsakuijlouan kintlatiskej. Sanenkaj otekitkej on naciones, pampa on tlen okichijkej ikan chikajkatekitl nochi tlatlas."
On tlajtojli yejuan okijtoj Jeremías omachiyato Babilonia
59 Ijkuak Sedequías ye kuikaya naui xipan ika tlamandarouaya ken rey ne Judá, on tiotlajtojketl Jeremías okimakak Serías, ikoneu Nerías niman teixuiu itech Maaseías, sen tlajtojli para ma kitemachistiti. Niman Seraías, yejuan itekiu katka para kuektlalilis kampa kochis on rey sedequías, okiktik on tlajtojli para kitemachistis, ijkuak oyajkej Babilonia. 60 Jeremías okijkuilojka ipan on amamoxtli nochi on tlajtoltin yejuan kijtoua nochi on tlinon xkuajli ipan nochiuas Babilonia. 61 Niman okijlij Seraías: "Ijkuak tajsis Babilonia, maka itlaj tikixkauas, yej nochi timomachtis on tlinon nikan tlajkuilolnestikaj. 62 Kemaj ijkin timoueyikatsajtsilis: 'ToTEKO, tejua yotikijtoj ika tikxoxotonis in ueyikalpan, yejua ika nikan xok yakaj chantis, nion on tlakamej nion yolkej, pampa tejua para nochipa tikauas ken sen xalpatlajkan.' 63 Niman kemaj ijkuak yotitlan timomachtia in amamoxtli, xsalouili sen tetl niman xkontlajkali ijtik on río Éufrates, 64 niman ijkin xkijto: 'Ijkin ken apolaki in amamoxtli, no ijki apolakis Babilonia, niman xokaman nokuiteuas de on tlinon xkuajli kuajtitlanilis toTEKO.' "
Nikan tlami on tlen okijtoj Jeremías.