Ouets Babilonia
50
In tlajtojli toTEKO okimakak on tiotlajtojketl Jeremías para kiteijlis tlinon impan nochiuas on chanejkej de on país Babilonia.2 ¡Xteijlikan: "Xketsteuakan sen bandera ken señal para nochimej naciones ma kimatikan ika Babilonia kixoxotoniskej! ¡Maka itlaj xkiyanakan! Ijkin xkijtokan: '¡Aman yokitlankej Babilonia!' ¡On dios Bel yonopinajtij, on dios Marduc sanoyej yonomojtij! ¡Iminídolos, yejuan xmelauak dioses, yonokipijpinajtikej niman sanoyej yonomojtijkej! 3 In yonochiu pampa neka norte uajlau sen nación yejuan kuajuisokis niman yejua kikauas in país ken sen xalpatlajkan. Xakaj, nion tlakamej, nion yolkej, oksejpa ompa chantiskej, pampa nochimej cholojteuaskej."
On israelitas oksejpa nokuepaskej
4 ToTEKO kijtoua: "Ipan on tonaltin, on chanejkej Israel niman Judá uajlaskej uajchokatiaskej nechajtejtemoskej, nejua niiminTEKO Dios. 5 Kitetlajtoltiskej katlejua ojtli yejuan yau para Jerusalén, niman ompaka yaskej, niman kijtoskej: 'Tiauij tikontaj toTEKO. Niman iuan tikchiuaskej sen pacto yejuan xkaman popoliuis, yejuan xkaman tikelkauaskej.'
6 'Nokoneuan katkaj kenon borregos yejuan xok kimatij kanon nemij. Xkuajli okinyekankej intlajpixkauan, yejuan okinkauilijkej ma nopojpolokan ipan tepemej. Okistinenkej ipan on tepemej, niman hasta okelkajkej kanon onkaj incorralko. 7 Intlauelikniuan, ijkuak okinnextijkej, kinmiktiayaj niman kijtouayaj: 'Tejuamej xtikpiyaj tlajtlakojli tla tikinmiktiaj, yej pampa yejuamej otlajtlakojkej ixpan iminTEKO, yejuan kinmakaya nochi on tlen nonekiya kampa tlakuajkuayaj, yejuan inachtojtajuan itech okitlalikaj inyojlo.'
8 'Nokoneuan, ¡xcholojteuakan de Babilonia, de impaís on babilonios! ¡Nemejuamej xmoyakatstlalikan de on yejuan cholouaj ken itlaj borregos! 9 Ijkon xchiuakan pampa nejua nikintlalis san sekan on chanejkej de on naciones de norte yejuan san setipan kuisokiskej Babilonia. Notekpanaskej niman kitlaniskej. On soldados sanoyej uelij tlauijsokij. Kampa kiminiliaj tlinon kimotlaj ikan inarcoj, xkaman kijneuaj. 10 Nochi kinkuiliskej on babilonios; kinkuiliskej nochi tlen kinekiskej. Nejua nemoTEKO ijki nikijtoua.
Kitlaniskej Babilonia
11 'Nemejuamej babilonios, yejuan nochi onenkinkuilijkej nokoneuan, ¡xuetskakan niman xpakanemikan! ¡Xtsijtsikuinikan kenon siuauakaxkonetl yejuan nemi kampa sakayoj! ¡Xtsajtsikan ken itlaj on caballos! 12 Pero nenmotlalpan niman on mocapital sanoyej pinauaskej. Mopaís xmás ueyixtika de nochimej on naciones; nokauas sen uaki xalpatlajkan kampa xitlaj yoltikaj. 13 Pampa nokualanilis, kichiuas para maka sa yakaj ma chanti; melauak ika ompa nikauas ken sen ueyi xalpatajkan. Nochi yejuan ompaka panos sanoyej nomojtis ijkuak kitas on castigo yejuan okiselij.
14 'Nemejuamej soldados yejuan intlauelikniuan on Babalonios niman ¡yejuan nentlamotlaj ikan arcos, ¡xnemikan listos, xyejyeualokan Babilonia! Nochimej nemejuamej, xmotlakan ikan nenmoflechas, pampa otlajtlakoj nixpan, nejua yejuan niiminTEKO on israelitas! 15 ¡Xtsajtsikan nochiuiyan ika yopeu nouisokilistli! ¡Babilonia xok teixnamiki! ¡Yoxinkej intorres, yoxinkej intepanchinanuan! ¡In yejua ika niktlakuepiltia; nemejuamej no xtlakuepiltikan! ¡No ijki xchiuilikan Babilonia ken otechiuilij! 16 Maka xkauakan yakaj ne Babilonia, tlatȏkas noso pixkas. Ijkuak on nouisokilistli tlaxoxotonis ne Babilonia, on yejuan okinuikakej ken esclavos cholojteuaskej niman nokuepaskej ipan impaís."
Israel oksejpa nokuepas ipan itlal
17 ToTEKO okijtoj: "Israel ken itlaj on borrego yejuan opoliu, yejuan kitotokatinemij on leones. Achtopa okikuaj on rey de Asiria, kemaj Nabucodonosor, rey de Babilonia, yejuan okikualij hasta iomiyouan. 18 Yejua ika, nejua nemoTEKO yejuan nochi niueli nikchiua, niiDios Israel, nikijtoua: Nicastigaros on rey de Babilonia niman on ichanejkauan on país, ijkon ken onikchiuilij irey Asiria. 19 Nikchiuas para Israel ma nokuepa ipan itlal, ken itlaj on borrego yejuan kipiyas miyek sakatl ne ipan on tepetl Carmelo, ipan iueytlalpan Basán, ne ipan itepeuan Efraín niman Galaad. 20 Nejua nemoTEKO nikijtoua: Ipan on tonaltin, Israel niman Judá xkiminnextiliskej intlajtlakoluan, pampa nejua nikintlapopoluilis on yejuan sanken nemiskej ipan on tonaltin.
Kitlanij Babilonia
21 '¡Xkinuisokikan iueyitlalpanuan Merataim niman on yejuan chantij Pecod! ¡Xkintojtokakan, kuajli xkintlamikan! ¡Nochi xchiuakan ken yonemechnauatij! Nejua, nemoTEKO, ijki nitlanauatia.
22 'Ipan on país kakisti chikauak ken nouisokilo, ken ijki sanoyej tlaxojxotonilo. 23 ¡Babilonia, yejuan ken itlaj martillo katka, yejuan kitetlajtlapanaya nochi tlaltikpaktli aman yotepojpostek, yotetlajtlapan! ¡Sanoyej kimojkaitaj nochimej on naciones ijkuak kitaj on tlinon ipan yonochiu Babilonia! 24 Sano tejua Babilonia, otimotlatlalilij, niman xotimomakak cuenta ika ompa otiuetsito. Ompa otimokau, xok ouel otikis, pampa xotiknek otiktlakamat moTEKO. 25 ToTEKO okitlapoj kampa kinmeua itepostlauijsokuan, niman okinkixtij ika itlauel, pampa toTEKO yejuan nochi ueli kichiua, kipiya sen tekitl yejuan kichiuas ipan on nación de on babilonios. 26 ¡Desde nochiyan xkuijsokikan! ¡Xkintlapokan ikueskouan! ¡Xkinnepanokan iminmikatlakayouan on yejuan yomikkej! ¡Maka yakaj ma nokaua yoltikaj! 27 ¡Xkinmiktikan nochimej isoldados, xkomintitlanikan kampa kinmiktiskej! Lástima de yejuamej! ¡Yoyejkok on tonajli, ijkuak yejuamej kiseliskej incastigo!
28 (Sekimej tlakamej yejuan ouajcholojtekej de Babilonia yejkoj nikan Jerusalén. Yejuamej kitetlajtlajtouiliaj kenijki toTEKO Dios yokitlakuepiltij Babilonia ika on tlinon yejua okichiu ipan on ueyitiopan.)
29 '¡Xkinnotsakan nochimej yejuan uelij tlamotlaj ikan arcos, para ma kuisokikan Babilonia! Kuajli xyejyeualokan on ueyikalpan para maka yakaj cholos! ¡Xchuilikan ijkon ken yejua kimelaua kiselis! ¡No ijki xchiuilikan ken yejua okitechiuilij pampa yejua xokinek onechtlakaitak, nejua niiTEKO, niiDios Israel yejuan niYektli. 30 Yejua ika, itelpochuan miktoskej ipan iuejueyiojuiuan niman nochimej isoldados mikiskej on tonajli. Nejua nemoTEKO ijki nikijtoua."
31 ToTEKO, yejuan nochi ueli kichiua, kijtoua: "Nación yejuan xtitetlakaita, nejua nimitsixnamikis; yoyejkok in tonajli, ijkuak nejua timitscastigaros. 32 Tejua nación yejuan xipan titeita, timokxitechakuanis niman tiuetsis, niman xakaj mitsketsteuas. Nikintlatlatilis nochimej mouejueyikalpanuan, niman on tlitl kitlatis nochi tlinon onkaj moyeualkan."
33 ToTEKO, yejuan nochi ueli kichiua, kijtoua: "On chanejkej de Israel niman on chanejkej Judá kijyouijtokej on tlinon kinchiuiliaj. Intlauelikniuan kimpiyaj presos niman xkinekij kinmakauaskej. 34 Pero on yejuan mechmakixtis sanoyej kojtik niman itoka teTEKO yejuan nochi ueli kichiua. Yejua kichiuas para nemejuamej nochi tlen melajki; kichiuas para ma onya yolseuilistli ipan in país niman kichiuas para ma onya nemojtijli para on chanejkej Babilonia."
35 ToTEKO kijtoua: "¡Xkinmiktikan on chanejkej babilonia! ¡Xkinmiktikan on intlayekankauan niman no on intlamatkauan! 36 ¡Xkinmiktikan on tetlatejtemouilijkej, ma lojlocojtiakan! 37 ¡Xkinmiktikan insoldados, ma mojkakuekuetlakakan! ¡Xkinmiktikan incaballos, niman incarretas de guerra xkinxoxotonikan! ¡Xkinmiktikan isoldados yejuan okintlakejkej de okseki países! ¡Ma nomojtikan ken yakaj siuamej! ¡Xkinmichtekilikan nochi on tesoros yejuan kipiyaj! 38 ¡Xkinuatsakan iminríos para ma uakikan! Ijkon xchiuakan pampa Babilonia yejua sen país kampa sanoyej miyek kimpiyaj ídolos, niman san impampa yotlamachilispolijkej.
39 'Yejua ika, ne Babilonia nochantiskej on tepemistomej niman on yolkej intoka chacales, niman ompa chantiskej on avestruces. Panos miyek xipan niman ompa xokaman yakaj oksejpa chantis. 40 Nokauas ken Sodoma niman Gomorra niman on uejueyikalpanmej yejuan onkatkaj inyeualkan, ijkuak oxoxotonkej. Xok yakaj ompa noseuis ijkuak ompaka panos.
41 'Desde neka uejka ipan on tlaltin de norte miyekej naciones sanoyej uejueyimej niman miyekej reyes notlatlajtlalilijtokej para uajlaskej. 42 Ika iminarmasuan de arcos niman lanzas, yejuamej xakaj kikneliaj. Intsajtsilis kenon mar ijkuak chikauak kakisti, niman ijkuak yejuamej yejyetiui ipan incaballos. Yejuamej nemij listos para kuijsokiskej Babilonia. 43 Ijkuak on rey de Babilonia okimat tlinon ye nochijtikaj, xok ouel onolinij pampa sanoyej onomojtij, niman sanoyej oajmankamik niman otlajyouij, ken sen siuatl yejuan ye kitlakatilijtikaj ikonetsin.
44 'Niuajlas ijsikapan ken sen león yejuan uajkisa ipan on uitzkojyoj itech on Rio Jordán niman kajsi on ojtli para yau nepa kampa nochipa onkaj xoxojki sakatl, niman de ompa nikchiuas para ma cholojteuakan yejuamej on yejuan chantij Babilonia. Kemaj, nikchiuas para ma mechmandaro sen tlakatl yejuan nejua niktlapejpenis. Tej, ¿akinon uelis nouan notemachiuas? ¿Akinon uelis nechixnamikis? ¿Akin tlamandaroketl uelis nechixnamikis?
45 'Xkakikan on plan yejuan nikpiya, nejua nemoTEKO, para nikchiuilis Babilonia, on tlinon nejua yoniknemilij nikuajtitlanis ipan impaís on babilonios: hasta on más pipitikej kojkonej no kinuikaskej hasta kinteuilanaskej, niman nochi on nación kixoxotoniskej. 46 Ijkuak uetsis Babilonia, nochiuiyan machiyas, in tlajli hasta uiuixkas, niman intsajtsilis sanoyej uejka onkakistis hasta neka impan oksekimej naciones."