Tiotlajtojli yejuan kijtoua tlinon impan nochiuas on amonitas
49
Tiotlajtojli yejuan toTEKO kijtoua tlinon ipan nochiuas Amón: "¿Kanon nemij on ikoneuan Israel? ¿Kanon nemij on ikoneuan yejuan kiseliskej itlal Gad? ¿Tline yokinkauilijkej on yejuan kimauistiliaj on dios Milcom yokinoyaxkatijkej itlal Gad? ¿Tline on amonitas aman chantij ipan iminuejueyikalpanuan?2 'Kuajli tej, nejua, nemoTEKO, nikijtoua: 'Yejkos on tonajli ijkuak icapital on ueyikalpan Rabá yejuan onkaj ipan iueyitlalpan Amón icapital on ueyikalpan Damasco kakiskej on tsajtsilistli de nouisokilistli. Yejua kuajli kixoxotoniskej, niman on uejueyikalpanmej yejuan onokej iyeualkan kintlatiskej. Ijkuakon, Israel oksepa kinoyaxkatis inuejueyikalpanuan. Nejua nemoTEKO ijki nikijtoua.'
3 '¡Xchokakan chanejkej Hesbón, pampa on ueyikalpan Ai yokixoxotonijkej! ¡Xajmankatsajtsikan, siuamej chanejkej Rabá! ¡Xmoajmankatlakentikan, xmoyelpanuitekikan pampa sanoyej nenmajmanaj! ¡Xmotlajtlalokan sa kanika, xmokojkokokan ipan nenmotlalnakayo, pampa on dios Milcom kuikaskej esclavo ipan okse país, iuan itiopixkauan niman iuejueyitekiuajkauan! 4 ¿Tline nenmoueyimatij ika nenkojtikej? Nenmokojtilis ye tlantiu, tlakamej yejuan xnentetlakamatij, yejuan nenkitlaliaj nenmoyojlo ipan nenmoriquezas yejuan yonenkisentlalijkej niman nenkijtouaj: '¿Akinon techuisokis?' 5 Kuajli tej, nejua de nochiuiyan nemechajtitlanilis nemojtijli. Nejua nemoTEKO yejuan nochi niueli nikchiua, ijki nikijtoua. Nochimej nemejuamej nenchojcholoskej sa kanika nenyaskej, niman xakaj nemis yejuan oksejpa uelis mechsentlalis. 6 Pero sakin ijkuak ijkon nemopan yonochiu, nikchiuas para on amonitas oksejpa nokuepaskej ipan intlal. Nejua, nemoTEKO, ijki nikijtoua."
Tiotlajtojli yejuan kijtoua tlinon ipan nochiuas Edom
7 Tiotlajtojli yejuan toTEKO yejuan nochi ueli kichiua kijtoua para ipan nochiuas Edom:
"¿Xokuitlaj onkaj tlamatkilistli ne Temán? ¿Xok kimatij tlinon kichiuaskej on tlamachilisyejkej? ¿Yoixpoliu on intlamatkilis? 8 ¡Chanejkej Dedán, xontlatlaksakan, xuiyan xmiyanatij, pampa nikimpopolos on ikoneuan Esaú; yoyejkok on tonajli ijkuak nejua nikincastigaros. 9 On yejuan kitekij uvas, seki kauaj on uvas tejtematstik ipan ikuamekayo; hasta on tlachtekej ijkuak uajlauij tlayoua yejuamej san kiktij on kech kinpoloua. 10 Pero on iuejkakoneuan Esaú yonikinkuilij nochi. Yoniknextij kanon niyanaj niman aman xok uelij niyanaj. Inkoneuan, on yejuan ken kintaj, niman innisiuchanejkauan, nochimej yejuamej yomikkej; xok yakaj onokau yejuan uelis kijtos: 11 'Xnechinkauili on yejuan iknomej, nejua impan nitlachas. On yejuan kakaualtsitsinmej nejua nikimpaleuis.' "
12 ToTEKO kijtoua: "Tla yejuamej on yejuan xkinmelauaya kiseliskej castigo, okiselikej on castigo, maka xnemilikan ika nenmeuamej xnenkiseliskej on castigo. Yej ika onkaj no nenkiseliskej on castigo. 13 San no nejua, nemoTEKO, ninotlajtolmaka ikan notokatsin: Ika on ueyikalpan Bosra xok yakaj chantis. Kixoxotoniskej, niman nokauas ken sen xalpatlajkan. Nochimej mechitaskej ken tlauelijli niman pinaualistli. Niman on sekimej uejueyikalpanmej nokauaskej xoxotontoskej para nochipa."
14 Nejua Jeremías onikselis sen tlajtojli yejuan oualeu itech toTEKO, ika okititlan sen temachistijketl intsajlan on naciones para kinmijlis: "¡Xkinsentlalikan mosoldados niman xnejnemikan para nenkuisokiskej Edom! ¡Xmotlatlajtlalilikan para nentlauisokiskej! 15 Nejua nikchiuas para timochiuas sen nación yejuan más pitentsin de nochimej naciones yejuan onokej, yejuan más kichichiitaskej on tlakamej. 16 Tejua timoueyimati pampa tikinmomojtia oksekimej. Niman timouiyimati pampa tichanti ipan sen teostotl tlakpak ipan se tepetl kampa timiyana.
¡Pero maka xmokajkayaua! Maski tejua tichanti tlakpak inuan on kuaktin, nejua nimitsajtlajkalis. Nejua moTEKO ijki nikjtoua.
17 'Ixoxotonilis Edom sanoyej temomojti yes. Nochi tlakatl yejuan ompaka panos sanoyej nomojtis ijkuak kitas kenijki ocastigarojkej, 18 pampa nokauas ken Sodoma, niman Gomorra niman on oksekimej kalpamej ompaka nisiu onokej ijkuak okinxoxotonijkej. Ompa xokaman yakaj chantis, nion xok yakaj ompa noseuis ijkuak ompaka panos. Nejua moTEKO ijki nikijtoua.
19 'Niuajlas isijkapan, ken itlaj on león yejuan uajkisaj ipan on uitzkojyoj itech on Rio Jordán niman kajsi on ojtli para yau nepa kampa nochipa onkaj xoxojki sakatl. Niman desde ompa nikchiuas para ma cholokan on yejuan chantij Edom. Niman nikchiuas para ma kinmandaro on tlakatl yejuan nejua niktlapejpenis. Tej, ¿akinon uelis nouan notemachiuas? ¿Akinon uelis nechixnamikis? ¿Akin tlamandaroketl uelis nechixnamikis?
20 'Xkakikan on tlen nejua nemoTEKO yoniktlalij nikinchiuilis on edomitas, on tlen nejua nikinchiuilis on chanejkej Temán. Hasta iminkoneuan kinuikaskej, niman nochi on país kixoxotoniskej. 21 Ijkuak uetsis Edom sanoyej tlakokomokas, niman in tlajli uiuixkas; sanoyej chikauak tetsajtsilis para ma kipaleuikan, niman on itsajtsilis ajsis hasta ne ipan Mar Rojo. 22 Itlauelikniu ipan yas para kuisokis Bosra, ken sen kuaktli uajnopilojtikisas kinuajpatlajtias imastlakapaluan; niman ipan on tonajli isoldados Edom kuekuetlakaskej ken on siuatl ijkuak kitlakatilia ikonetsin."
Tiotlajtojli yejuan kijtoua tlinon ipan nochiuas Damasco
23 Tiotlajtojli yejuan kijtoua tlinon ipan nochiuas Damasco:
"On chanekej ipan on uejueyikalpanmej Hamat niman Arpad mojkamikij pampa yokimijlijkej ika onochiu tlen xkuajli. Sanoyej nomojtiskej; xok nemiskej inyolika. 24 On chanejkej Damasco xok kojtikej, niman yocholojkej pampa nomojtiaj. Yejuamej sanoyej mojkamikiskej, ajmankanemiskej, niman tlajyouiskej kenon siuatl yejuan yekinemitis ikonetsin. 25 On ueyikalpan Damasco yejuan sanoyej kixmatij nouiyan, yejuan sanoyej kipiya paktli, aman yonokau iseltij. 26 On tonajli itelpochuan xintoskej ipan iuejueyikalpanuan, niman nochimej isoldados mikiskej. Nejua nemoTEKO yejuan nochi niueli nikchiua ijki nikijtoua. 27 Nejua niktlatlatilis itepanchinanuan Damasco, niman on tlitl kitlatis ipalacios on rey de Ben-hadad."
Tiotlajtojli yejuan kijtoua tlinon impan nochiuas Quedar niman Hasor
28 Itlajtoltsin toTEKO kijtoua tlinon impan nochiuas itribu* Quedar, niman intech intlayekankauan Hasor, yejuan okintlan Nabucodonosor, rey de Babilonia:
ToTEKO kijtoua: "Soldados de Babilonia, xkuijsokitokan on nación de Quedar! ¡Xpopolokan on tribu yejuan ualeua ikisayan tonaltsintli! 29 Xmoyaxkatikan intojtonkaluan niman imborregos; xkinkuilikan iminlonas niman nochi on tlinon kitekitiltiaj. Xkinkuilikan imincamellos niman xkintsajtsilikan: '¡Nochiuiyan onkaj ueyi nemojtijli!' 30 Nejua, nemoTEKO nemechnauatia nemejuamej chanejkej Hasor: ¡Xontlatlaksakan! ¡Xuiyan niman xmiyanatij pampa Nabucodonosor, rey de Babilonia, kuajli yokinemilij kenijki kichiuas para mechuisokis!
31 'Nejua nemoTEKO nemechnauatia nemejuamej soldados de Babilonia: 'Xuiyan, xkinuijsokitij on tlakamej yejuan nemij inyolika niman xitlaj kimakajsij. Yejuamej xkipiyaj inueyitsakuijlouan nion xkinllavetsakuaj niman xkipiyaj tlamanauijli! 32 Xkinmichtekilikan imincamellos niman nochimej iyolkauan! Nejua nikinsesemanas nochiuiyan on tlakamej yejuan nonakastlan ximaj; desde nochiuiyan nikualeuitis on tlajyouilistli. Nejua nemoTEKO ijki nikijtoua.' 33 Hasor ijki nokauas para nochipa kampa xok yakaj chantis, yej nochantiskej on yolkej intoka chacales. Ompa xokaman yakaj nochantis."
Tiotlajtojli yejuan kijtoua tlinon ipan nochiuas Elam
34 Ijkuak Sedequías opeu tlamandaraoua ken rey ne Judá, toTEKO okimakak Jeremías yejua in tlajtojli itechkopa on tlinon ipan nochiuas Elam:
35 Nejua, nemoTEKO yejuan nochi niueli nikchiua, nikijtoua: "Nejua nikintepojpostekis iminarcos on elamitas on yejuan más uelij tlamotlaj. 36 Nejua nikuajtitlanis sen ajakatl impan in tlakamej yejuan uajleuas de nochiuiyan ipan in tlalikpaktli, para ma kinsesemanakan nochiuiyan, hasta kampa nojnoka impan nochimej on países ompa onnomanauiskej on yejuan kinsesemanaskej. 37 Nikchiuas para ma kuekuetlakakan ichanekauan Elam inmixpan imintlauelikniuan yejuan kinekij kimiktiskej. Nikuajtitlanilis on tlajyouilistli; nikuajtitlanis noueyitlauel impan yejuamej, nikuajtitlanis on nouijsokilistli hasta kaman nochimej kinmiktia. Nejua nemoTEKO ijki nikijtoua. 38 Nikinmiktis iminreyes niman imintlayekankauan, niman niktlalis notrono ne Elam. Nejua nemoTEKO ijki nikijtoua. 39 Pero yejkos on tonajli ijkuak nejua nikchiuas para on elamitas oksejpa ma nokuepakan ipan imintlal. Nejua nemoTEKO ijki nikijtoua."