Tiotlajtojli yejuan kijtoua tlinon ipan nochiuas Moab
48
ToTEKO yejuan nochi ueli kichiua, iDios Israel, ijkin okijlij Moab tlinon ipan nochiuas: "¡Lástima para on ueyikalpan Nebo, pampa nochi xoxotontok! ¡Quiriataim yokinoyaxkatijkej niman ika yonauiltijkej! ¡Itepanchinanuan yokinxoxotonijkej! 2 Iueyilis Moab yotlan popoliui. Ne Hesbón, itlauelikniuan kichiuaj planes kenijki Moab kipopoloskej ken nación. Tejua, Madmén, no mitsxoxotoniskej, niman on nouisokilistli xkaman mitskauas. 3 Yejuan chantij ne Horonaim, ijkin ajmankatsajtsij: '¡Nochi yokixoxotonijkej in ueyikalpan!'
4 'Moab kuajli yokixoxotonijkej; inajmankatsajtsilis on kojkonej ajsi hasta Zoar. 5 Chokatiuij ipan ojtli on yejuan tlejkotiuij ipan itlaixko Luhit; niman on yejuan ye temotiuij para Horonaim chokatiuij pampa kitaj on tlaxoxotonalistli. 6 Yejuamej tsajtsij:'¡Xcholokan! ¡Cada se ma nomanaui ken uelis! ¡Amanaman xuiyan ipan on xalpatlajkan ken tepepolokomej yejuan noyolijmatij!'
7 'Moab, tejua tiktlaliaya moyojlo ipan mofuerza niman ipan moriquezas yejuan tikpiyaya, pero maski, no ijki mitsnoyaxkatiskej. On modios Quemós kuikaskej ipan okse país, inmiuan intiopixkauan niman on uejueyitekiuajkej. 8 On tlaxoxotonalistli ajsis ipan nochimej on uejueyikalpanmej, niman nion se ueyikalpan xnomanauis. On ixtlauatl niman tlalmantli kinxoxotoniskej. Nejua nemoTEKO ijki nikijtoua. 9 Xchijchiuilikan Moab sen tlalkontli, pampa kixoxotoniskej. Iuejueyikalpanuan xoxotonki yeskej, niman ompa xok yakaj chantis."
10 (¡Ma kajsi tlauelijli on tlakatl yejuan xkichiuas ika nochi iyojlo on tekitl yejuan toTEKO tlanauatia! ¡Ma kajsi tlauelijli on tlakatl yejuan nonenekis teuan yas para temiktis!)
11 Moab nochipa kipiyaya yolseuilistli; xkaman okuikakej ken esclavo ipan okse país. Yejua ken itlaj on vino yejuan nokaua tlatsintlan ijkuak yoixauets, yejuan xkaman kitekaj ipan okse atekomatl. Yejua ika, nochipa ijki uelik niman nochipa ijki ajuiyak.
12 Pero toTEKO ijkin kijtoua: "Yejkos tonajli ijkuak nejua nikomintitlanis tlakamej para kitekaskej on vino ipan okseki atekomamej, niman on atekomamej tetlajtlapaniskej. 13 Ijkuakon, kemaj Moab pinauas pampa okitlalij nochi iyojlo itech on dios Quemós, no ijki ken Israel opinau pampa okitlalij nochi iyojlo itech on uakaxkonetl de oro ne Betel.
14 'Maka ma kijtoj Moab: 'Tejuamej xtixmojkej, tejuamej tisoldados yejuan nochipa titetlanij.' 15 Ye yejkotikaj on akin kixoxotonis Moab niman iuejueyikalpanuan; on telpokamej yejuan más kojtikej mikiskej. Ijki kijtoua on Rey, yejuan itoka nemoTEKO yejuan nochi ueli kichiua. 16 Ye yejkotikaj on tonajli ijkuak xoxotonis Moab; ye yekojtikaj ika ipan nochiuas on tlen xkuajli. 17 Nemejuamej nisiuchanejkej de Moab, nochimej yejuan nenkimatij ika sanoyej ueyixtikaj xchokakan ipampa, niman xkijtokan: 'Xkitakan kenijki yoxoxoton itlayekanalis yejuan sanoyej kojtikkatka niman sanoyej ueyixtikatka!'
18 'Nejuamej chanejkej ipan on ueyikalpan Dibón, achi xuajtemokan niman maka sa xmoueyimatikan, yej xmotlalikan ipan tlikonextli, pampa on tlaxoxotonijketl yejuan kixoxoxtonis Moab ye uajlajtikaj mitsajuisokis niman amantsin yokinxoxotonij motepanuan. 19 Nemejuamej chanejkej ipan on ueyikalpan Aroer, xmotelketsakan itempan on ojtli niman xkitakan; xkintlajtoltikan on yejuan ye cholojtokej tlinonon onochiu ompa. 20 Yejuamej kinankiliskej: 'Moab yokipijpinajtijkej, pampa yokixoxotonijkej. ¡Xajmankachokakan ipampa yejua! ¡Xtemachistikan ne itech on río Arnón ika Moab yokixoxotonijkej!'"
21 Yoyejkok on castigo yejuan yotlanauatijkaj para impan uajlas on uejueyikalpanmej yejuan onokej ipan on ueyi tlalmantli: Holón, Jahasa, Mefaat, 22 Dibón, Nebo, Bet-diblataim, 23 Quiriataim, Bet-gamul, Bet-meón, 24 Queriot, Bosra niman nochimej iuejueyikalpanuan Moab, yejuan nokauaj nisiu niman nokauaj uejka.
25 ToTEKO kijtoua: "Yokuilijkej ikojtilis Moab, niman ipoder no yokixtilijkej.
26 'Xtlajtlauantikan Moab, pampa yejua okixnamik toTEKO. Kemaj Moab notlalmimilos ipan iijsotlal, niman nochimej kipijpinauiskej. 27 Moab, ¿xmelauak tejua tikpijpinauiyaya Israel niman nochipa tikteneuaya ika xtikitasneki, ken tla yejua yeskia sen tlachteketl?
28 'Xkintlalkauikan on uejueyikalpanmej, nemejuamej yejuan nechantij Moab; xuiyan kampa onkaj on uejueyitemej, niman ompa xchantitij ken itlaj palomas yejuan kitlaliaj intepasol intempan on teostomej. 29 Tikmatstokej ika Moab sanoyej noueyimati, noueyiteneua, noueyilia niman kinemilia ika xakaj uelis kiyakapanauis. 30 ToTEKO no kimatstikaj ika ichanejkauan xipan teita. On tlen kijtouaj kitechiuiliskej xmelauak kichiuaj yej san tlajtlajtouaj, on tlen kichiuaj xitlaj ika tepaleuiya. 31 Yejua ika nichokas niman ninajmanas impampa on chanejkej Moab niman impampa on chanejkej Quir-hares. 32 Nichokas más nemopampa chanejkej Sibma, xken onikinchokilij on chanejkej de Jazer. Mouvasmauan hasta okipanauijkej on Mar Muerto. niman ajsitikatka hasta ne Jazer. Pero aman itlakijlo mouvasyoj nochi yokixpolojkej. 33 Aman xok kakisti kampa pakatsajtsiua ipan icampos Moab, kampa sanoyej kuajli tlatlaki. Xokuitlaj vino nepa kampa tlayejyeualo. Xok nemij on yejuan kipaxouaj uvas para kayokixtiaj; aman xok onokej on pakakuikamej. 34 On tlakamej yejuan chantij ne Hesbón sanoyej ajmankatsajtsij, niman intsajtsilis ajsi hasta Eleale niman Jahaza, niman desde ne Soar hasta Horonaim niman Eglat-selisiya, pampa hasta inameyaluan Nimrim youakkej."
35 ToTEKO kijtoua: "Nejua nikinmiktis on chanejkej Moab yejuan tlejkouaj ipan on tlamimiltsitsimej ipan on tiopanmej pipitikej yejua para ídolos kampa konmintlauentlaliliaj niman kimpopochuiyaj imindioses."
36 Yejua ika, noyojlo najmana ipampa Moab niman impampa on chanejkej Quir-hares ken yakaj akapitsa sen ajmankakuikatl ijkuak yakaj miki, pampa nochi on riquezas yejuan okisentlalij yokipoloj. 37 Para onoteititijkej ika najmanaj, nochimej onokuatexikalojkej, niman no onotentsonxinkej; niman yonokojkokojkej ipan inmauan niman onotlakentijkej ikan ajmankatlakentli.
38 Impani nochimej inkaluan Moab niman ipan nochimej inuejueyiojuiuan aman san kakisti kenijki chokalo, pampa nejua yonikuejkuechtilij Moab ken itlaj on tekomatl yejuan xok kuajli. Nejua, nemoTEKO, ijki nikijtoua.
39 ¡Sanoyej xajmankachokakan ipampa Moab! ¡Sanoyej temojtij ken onokau pampa okipopolojkej ken nación! Temojtij ken onokau niman tetlajyeloj para nochimej on innisiuchanejkauan.
40 ToTEKO kijtoua: "Itlauelikniu Moab ye uajlajtikaj kuajuijsokis ken itlaj on kuaktli yejuan uajnopilotikisas kinuajpatlajtias imastlakapaluan para kajsis. 41 Uejueyikalpammej niman on tekaltin kampa nomanauiyaj on soldados kinnoyaxkatiskej. Ipan on tonajli isoldados Moab kuekuetlakaskej kenon siuatl ijkuak kinemitia ikoneu. 42 Moab xok yes sen nación, pampa onechixnamik, nejua nemoTEKO." 43 Yejua ika, nejua nemoTEKO ijkin nikijtoua: "On tlakamej yejuan chantij Moab yeskej kenon yolkej yejuan kintojtokaj on tlatemojkej noso ken on yejuan ye onuetstokej kampa uejkatlan noso ijtik sen tlatlalijli. 44 Yejuan cholos de on tlatemojkej onuetsis kampa uejkatlan, niman yejuan kisas kampa uejkatlan onuetsis ijtik sen tlatlalijli, pampa nejua nikuajkis ipan Moab on tonajli de castigo. Nejua nemoTEKO ijki nikijtoua.
45 'Yejuan cholojteuaskej sa axkan ajsiskej niman kinekiskej nomanauiskej ipan on ueyikalpan Hesbón; pero ne Hesbón, ipan iueyikalpan on rey Sehón, ijkuakon tlikuitias niman on tlitl ajsis hasta ipan itepeuan Moab, kampa nemij on tlakamej yejuan xipanteitaj.
46 '¡Lástima de tejua, Moab! ¡On chanejkej yejuan kimauistiliaj Quemós, yoixpolijkej! ¡Mokoneuan tlakamej niman siuamej kinuikaskej esclavos ipan okse país! 47 Pero yejkos on tonajli ijkuak nikchiuas para oksejpa kuajli nemis Moab; nejua nemoTEKO ijki nikijtoua."
In yejua castigo yejuan toTEKO kuajtitlanilis Moab.