In tiotlajtojli kijtoua tlinon impan nochiuas on filisteos
47
In yejua tlajtojli yejuan toTEKO okijlij on tiotlajtojketl Jeremías para on filisteos, ijkuak on rey de Egipto xe kuisokiya on ueyikalpan Gaza:2 "Nejua, nemoTEKO, nikijtoua: 'Neka kampaka norte uajlaskej on babilonios sanoyej miyekej, ken sen ueyi río yejuan xonakis ijtik on atlautli, yejuan kapachos on país niman nochi tlin ompa onkaj, niman on chanejkej ipan on uejueyikalpanmej. Nochimej yejuan chantij ipan on país tetsajtsiliaj xtechpaleuikan; nochi tlakatl ajmankachoka. 3 Ijkuak kinkakij ken notlajtlalouaj on caballos, ken sanoyej chikauak kakistitiu incarretas de guerra niman no ken kakistitiuij iminruedas, on tatajtin xok kixokouaj niman kinkajteuaj inkoneuan. 4 Ijkon nochiuas pampa yoyejkok on tonajli ijkuak toTEKO kimpopolos on filisteos. Yejua kinkuilis on uejueyikalpanmej Tiro niman Sidón yejuan itech nopaleuiyayaj. 5 On chanejkej ipan on ueyikalpan Gaza ijkuak najmanaj nokuatexikalouaj, On chanejkej ipan on ueyikalpan Ascalón xok uelij tlajtouaj ijkuak nomojtiaj. Niman nenmeuamej uejuejyitlakamej filisteos yejuan sa keskimej nemokauaj, ¿hasta kamanon nenkajkauaskej ika xok nenmotetekiskej ipan nemotlalnakayo para nenkiteititiaj ika nenmokokoua?
6 '¡Ay, iespada toTEKO! ¿Hasta kamanon tej, timoteltis? ¡Oksejpa xkalaki ijtik movaina; xmoseui, maka sa itlaj xchiua!'
7 '¿Pero kenijki tej uelis xitlaj tikchiuas tla toTEKO yomitsnauatij tikuijsokis on ueyikalpan Ascalón, niman nochi on atenkokalpanmej?' "