On tlen Dios okichiu impampa on israelitas
105
“¡Xmakakan tlaxtlauijli* toTEKO!¡Xkueyiteneuakan itokatsin!
Xtetlajtlajtouilikan ipan on naciones nochi tlen yejua okichiu.
2 Xkuikatlalikan ikan yekteneualistli.
¡Xteijlikan on uejueyi tetlatlachalistin yejuan yokichiu!
3 Xpakilistlamatikan ipampa iyektokatsin.
¡Ma yolpakikan on yejuan kitejtemouaj toTEKO!
4 Xtejtemokan itlapaleuil toTEKO, niman iueyi poder;
nochipa yejua xtejtemokan para ma mechpaleui.
5 Xkelnamikikan on uejueyi tetlatlachalistin yejuan okichiu,
niman on tlanauatiltin yejuan okinteneu.
6 Ijki xchiuakan, nemejuamej iuejkakoneuan Abraham,
yejuan itekitkau toTEKO,
nemejuamej iuejkakoneuan Jacob, yejuan omechtlapejpenij.
7 “Yejua, yejua toTEKO niman toDios.
¡Yejua kimandaroua nochi in tlaltikpaktli!
8 Maski panoskej miles teuejkakoneuan yejuan tlakatitiuij,
yejua xkaman kelkauas on tlen okiprometeroj ipan ipacto,
9 on pacto* yejuan okichiu iuan Abraham,
niman on tlajtolmakalistli yejuan okimakak Isaac.
10 Okitlalij ken ley para Jacob,
ken sen pacto* yejuan xkaman tlami para Israel
11 ijkuak okijtoj:
“Nimitsmakas on tlajli de Canaán
yejuan tikselis ken sen herencia.”
12 “Maski on nemoachtojtajuan xmiyekej katkaj,
niman kistinemiyaj ken xchanejkej ipan in tlajli Canaán,
13 niman kisayaj ipan sen nación para yayaj ipan okse nación,
niman kisayaj ipan sen reino para yayaj ipan okse reino,
14 Dios xokitekauilij para yakaj ma kintlajyouilti,
niman no, ijkin okiminnauatij on reyes:
15 “Maka itlaj xkinchiuilikan on yejuan yonikintlapejpenij,
nion maka xkintlajyouiltikan notiotlajtojkauan.”
16 ToTEKO okuajtitlan apistli ipan on tlajli Canaán,
niman okinkuilij nochi tlen kikuayaj.
17 Pero inyakapan yejuamej, okititlan José ne Egipto,
kampa okinamakakej ken esclavo.
18 Okinsalojkej ikxiuan ikan teposcadenas,
niman okitsakukej ipan cárcel.
19 Hasta ijkuak ipan onochiu José on tlen yejua yokijtojka,
itlajtol toTEKO okiteititij ika José onouikak kuajli ken kitocaroua.
20 On rey yejuan kimandarouaya miyek tlakatl,
otlanauatij ma kimakauakan José.
21 Okitlalij tlayekanki ipan ireno
niman ipan nochi on tlen kipiyaya,
22 para kinmachtis tlamatkilistli on tlayekankej niman ueuetkej.
23 Sakin, Israel, yejuan no itoka Jacob, oyaj Egipto,
niman ompa ochantik ken se yejuan xchanej.
24 Ompa toTEKO okichiu
para on israelitas sanoyej ma miyekiyakan,
niman ma nochiuakan más kojtikej xken on egipcios.
25 Pero no okichiu para on egipcios sanoyej ma kintlauelitakan
on israelitas, itekipanojkauan Dios niman okintlajtouilijkej ika sanoyej kintlajyouiltiskej.
26 Kemaj toTEKO okititlan Moisés, on itekitkau,
niman Aarón, yejuan okitlapejpenij.
27 Intechkopa yejuamej, Dios okichiu uejueyi milagros
yejuan yokijtojka kichiuas ipan on tlajli de Egipto.
28 Dios okuajtitlan tlayouajlotl imimpan on Egipcios,
pero yejuamej xokinekkej okakkej tlen okinmijlij Dios.
29 On atl okikuep yestli,
niman ijkon omikkej on michimej.
30 Nochi on país de Egipto okitemiltij ikan atemomej,
niman hasta inchan on uejueyixtokej no okalakkej.
31 Dios okijtoj para ma nemikan sayolimej niman atintin
imanian on país de Egipto.
32 Dios xsan okichiu ma kiaui,
yej okuajtitlan uejueyi tejsiutli,
niman sanoyej otlapetlan imanian on país.
33 Okinxaxakualoj nochi on uvasyoj niman on higuerajkojtin,
¡niman okinmatetsajtsayan nochi on kojtin de Egipto!
34 Dios okijtoj para ma uajlakan chapolimej;
niman sanoyej miyekej tapachichimej.
35 ¡Niman okitlamijkej nochi xojtli
niman tlatoktli yejuan yotlakka ipan imintlal!
36 ¡Sakin, Dios okinmiktij on tlakayenkuiyomej
ipan nochi on familias de Egipto!
37 Kemaj Dios okinkixtij on israelitas,
niman okiktikej miyek oro niman plata.
Niman nochimej ipan on tribus* kipiyayaj kuajli chikaualistli.
38 On egipcios opakkej ijkuak okiskej on israelitas
pampa sanoyej okinmakaskej.
39 Dios okisou sen moxtli inkuapan on israelitas
para ika okintlaseuayotilij,
niman ijkuak tlayoua okintlauiluij ikan sen tlimilinajli.
40 Okitlajtlankej nakatl para tlakuaskej,
niman Dios okinuajtitlanilij tektotomej,
niman okinmakak maná, on pan yejuan oualeu iluikak.
41 ToTEKO, okueponaltij miyek atl ipan sen ueyi tetl,
niman on atl onotlaloj ken río ipan on xalpatlajkan.
42 Nochi in okichiu toTEKO,
pampa okelnamik on tlen okiprometerouilijka Abraham,
on itekitkau.
43 Ijki tej, toTEKO okinkixtij itlapejpeniluan
yejuan okintlatlapejpenij.
Ikan miyek paktli okiskej Egipto, hasta pakatsajtsiyaj.
44 Niman okiminmakak on tlaltin de oksekimej naciones,
niman no okinmakak ma kipixkakan
on tlen oksekimej okitokakej.
45 Nochi on okiminmakak,
para ma kitlakaitakan
niman ma kitlakamatikan ileyes niman itlamachtiluan.
¡Ma tikyekteneuakan toTEKO!