On israelitas nochipa xipan kitaj Dios
106
¡Ma kiyekteneuakan toTEKO!Ma kimakakan tlaxtlauijli toTEKO,
pampa yejua kuajli iyojlo,
pampa itetlajsojtlalis xkaman tlami.
2 ¿Akinon uelis kinteneuas
nochi on uejueyi tetlatlachalistin yejuan yokichiu?
¿Akinon uelis nokuikatis para kiyekteneuas ken noneki?
3 Sanoyej pakiskej on yejuan kichiuaj tlen melajki,
niman nochipa kichiuaj tlen melajki.
4 Xnechelnamiki noTEKO
ijkuak tikintiochiuas motlapejpeniluanuan;
maka tinechelkauas ijkuak tikinuajmakixtis,
5 para nikitas on tlen kuajli kiseliskej
on yejuan yotikintlapejpenij,
niman nikpiyas on paktli yejuan kipiya moueyi nación,
iminuan on tolajmej yejuan moyaxkauan.
6 Tejuamej no ijki yotitlajtlakojkej ken toachtojtajuan;
sanoyej xipan otimitsitakej;
otikchijkej tlen sanoyej xkuajli.
7 On toachtojtajuan, okitakej ken xitlaj kijtosneki
on uejueyi tetlatlachalistin yejuan otikchiu ne Egipto.
Okelkajkej ika sanoyej tikintlajsojtla,
niman itech on Mar Rojo xipan omitsitakej.
8 Pero yejua okinmakixtij para okintitij iueyipoder,
niman ijkon okitlakaitak itokatsin.
9 Okajuak on Mar Rojo niman okichiu ma uaki,
niman okimpanoltij on toachtojtajuan ijtik on mar
ken ipan xalpatlajkan.
10 Ijkon okinmanauij intech intlauelikniuan,
intech on yejuan sanoyej kintlauelitayaj.
11 On mar okintlapachoj intlauelikniuan on toachtojtajuan,
niman nion se xonomanauij.
12 Kemaj, okineltokakej on ipromesas,
niman okikuikatlalijkej ikan yekteneualistli.
13 Pero nimantsin okelkajkej on tlen otikchiu impampa,
niman xokichixkej para kimatiskej on planes
yejuan kipiyaya para kichiuaskej.
14 Ipan on xalpatlajkan kampa xitlaj onkaj, okitlatlatakej;
sanoyej kuasnekiyaj tlakuajli yejuan yejuamej kinekiyaj.
15 Niman okinmamak on tlakuajli yejuan okitlajtlanilijkej,
pero okinuajtitlanilij sen temojtij kokolistli
yejuan okinmiktij miyekej.
16 Ipan on campamento kampa nemiyaj,
okinexikolitakej Moisés niman Aarón,
on yejuan itlatiochijkau toTEKO.
17 Yejua ika, otsayan on tlajli
niman okitoloj Datán niman Abirám,
niman iminuan on yejuan xipan okitakej Dios
yejuan iminuan onosentlalijkaj.
18 ¡On tlitl okintlatij nochimej yejuamej!
¡Nochimej on xompayejyeuamej otlatlakej!
19 Ipan on tepetl Horeb
okichijchijkej sen becerro ikan oro yejuan okipâtlakej,
niman yejua okimauistilijkej.
20 ¡Xok okimauistilijkej on Dios yejuan ueyixtikaj,
yej okimauistilijkej ixneskayo sen uakax yejuan kikua xojtli!
21 Okelkajkej on Dios yejuan intemakixtijkau,
yejuan okichiu uejueyi milagros ne Egipto,
22 yejuan okichiu uejueyi tetlatlachalistin ipan on país de Cam,
niman yejuan okimpanoltij ipan on Mar Rojo.
23 Dios kinekiya kinmiktis nochimej on israelitas,
pero Moisés, on itekitkau yejuan okitlapejpenij,
okiteltij niman okitlauelseuij,
niman ijki, Dios xokinmiktij.
24 Mas sakin, okichichijkej on tlajli yejuan sanoyej kuajli,
niman xokineltokakej ipromesas Dios.
25 Desde ijtik inkajkal de telaj
okiteneuilijkej toTEKO tlen xkuajli,
niman xokitlakamatkej itlanauatiluan.
26 Yejua ika, Dios sanoyej okualan,
niman onotlajtolmakak para kinmiktis ipan on xalpatlajkan,
27 niman no inuejkakoneuan kinchajchyauas ipan on naciones
kampa xkineltokaj Dios,
niman ompa mikiskej.
28 Onochijkej esclavos itech on dios Baal-peor,
niman okikuajkej on uentli
yejuan okinuentlalilijkej on dioses yejuan xyoltokej.
29 Pampa sanoyej xkuajli tlinon kichiuayaj,
okitlauelkuitijkej Dios,
niman imimpan ouajlaj sen temojtij kualolistli.
30 Pero Finees okimiktij on tlakatl
yejuan san ipampa ouajlaj on mikilistli,
niman ijki, on mikilistli onoteltij.
31 Niman Dios okitak kuajli on tlen Finees okichiu,
niman on teuejkakoneuan nochipa kelnamikij.
32 No ijki, on israelitas okualanijkej Dios
itech on atl itoka Meriba,
niman san impampa, Moisés san impampa, Moisés sanoyej otlajyouij.
33 Pampa on israelitas okualanijkej Moisés,
yejua xok kuajli okinemilij tlinon okijtoj.
34 On israelitas xokinxoxotonijkej on kalpanmej
yejuan toTEKO okiminnauatij ma kinxoxotonikan.
35 Yej ononelojkej iminuan on yejuan xkineltokaj Dios,
niman no ijki opeu nouikaj.
36 Opeu kinmauistiliaj on ídolos.
Yejua ika onixpolojkej.
37 Ompa okinmiktijkej inkoneuan, tlakamej niman siuamej,
niman okinuentlalilijkej on xkuajkualtin espíritus.
38 Okinmiktijkej inkoneuan, tlakamej niman siuamej,
niman on inyesyo okinuentlalilijkej on ídolos de Canaán.
Yejua ika, okijtlakojkej on tlajli ika iminyesyo.
39 Niman yejuamej onijtlakojkej nochi
ika on tlen xkuajli okichijkej,
niman pampa okinmauistilijkej on ídolos,
Dios okintak ken auilnenkej.
40 ToTEKO sanoyej okualan iminuan on itlapejpeniluan,
niman xok kinekiya kintas.
41 Yejua ika, okintemaktilij intech intlauelikniuan,
intech on yejuan xkineltokaj Dios
niman yejuamej okintlankapixkej.
42 On intlauelikniuan sanoyej kintlajyouiltiayaj
niman inka najauiltiayaj ikan iminpoder.
43 Niman maski Dios miyekpa okinmanauij,
yejuamej xokinekkej para yejua ma kinyekana,
yej más otlajtlakojkej.
44 Pero ijkuak Dios okintak
sanoyej tlajyouiyaj niman najmanaj,
45 okelnamik on pacto yejuan okichiu iminuan,
niman xok okincastigaroj,
pampa itetlajsojtlalis sanoyej ueyi.
46 ¡Yej okichiu para on intlauelikniuan ma kinmiknelikan!
47 ¡Xtechmakixti toTEKO niman toDios!
¡Xtechkixti ipan on naciones
niman san sekan xtechsentlali,
para tikyekteneuaskej moyektokatsin,
niman ikan paktli timitsyekteneuaskej!
48 ¡Ma tikyekteneuakan toTEKO, Dios de Israel,
aman niman para nochipa!
¡Nochimej on israelitas ma kijtokan: “Ma ijki nochiua”!
¡Ma tikyekteneuakan toTEKO!