ToTEKO nochipa tetlajsojtla
107
Xmakakan tlaxtlauijli toTEKO,pampa yejua sanoyej kuajli iyojlo,
pampa itetlajsojtlalis xkaman tlamis.
2 Xkijtokan, nemejuamej yejuan toTEKO omechmakixtij,
yejuan omechmanauij intech nemotlauelikniuan,
3 yejuan san sekan omesentlalij
ijkuak omechkixtij ipan on naciones
de neka ikisayan tonaltsintli,
niman kampa ikilakiyan,
niman neka Norte niman kampaka Sur.
4 Sekimej yonopojpolojkaj ipan on xalpatlajkan,
niman xkinextiayaj kanon chantiskej.
5 Yejuamej sanoyej apismikiyaj niman amikiyaj.
¡Semi ye miktikatkaj!
6 Pero ipan intlajyouilis, onoueyikatsajtsilijkej itech toTEKO,
niman yejua okinmanauij ipan on intlajyouilis.
7 Niman okinuikak ipan on kuajli ojtli
para oyajkej ipan on ueyikalpan kampa uelij chantij.
8 Ma kimakakan tlaxtlauijli toTEKO
ipampa itetlajsojtlalis yejuan xkaman tlamis,
niman pampa kichiua uejueyi tetlatlachalistin
impampa on tlaltikpaktlakamej.
9 Yejua tej, katliltia on yejuan amiki
niman kimaka miyek tlakuajli on yejuan apismiki.
10 Sekimej nemiyaj ipan temojtij tlayouajlotl,
tsakutikatkaj ipan ueyi ajmantli,
niman salijtikatkaj ikan teposcadenas.
11 Ijkon imimpan onochiu,
pampa xokitlakamatkej itlanauatiluan toTEKO
niman pampa xokinekkej ma kinyekana
on yejuan más Ueyixtikaj.
12 Dios okincastigaroj ikan chikauak tekitl,
ijkuak uetsiyaj, xakaj kimpaleuiyaya.
13 Pero ipan intlajyouilis,
onoueyikatsajtsilijkej itech toTEKO,
niman yejua okinmanauij ipan on intlajyouilis.
14 Okinkixtij ipan on temojtij tlayouajlotl,
niman okinkixtilij on teposcadenas.
15 Ma kimakakan tlaxtlauijli toTEKO
ipampa itetlajsojtlalis yejuan xkaman tlamis,
niman pampa kichiua uejueyi tetlatlachalistin
impampa on tlaltikpaktlakamej.
16 ¡Yejua, okimpojpostek on tsakuijlomej de bronce,
niman okimpojpostek on tepostin
yejuan ika kintsakuaj on tsakuijlomej!
17 Sekimej xtlamatkej katkaj
niman tlajyouiyayaj
ipampa intlajtlakoluan niman inxompayejyeualis.
18 Xok ueliyaj tlakuayaj.
¡Semi ye miktikatkaj!
19 Pero ipan intlajyouilis,
onoueyikatsajtsilijkej itech toTEKO,
niman yejua okinmanauij ipan on intlajyouilis.
20 ToTEKO okimpajtij san ika itlajtol;
¡okinmanauij de on mikilistli!
21 Ma kimakakan tlaxtlauijli toTEKO
ipampa itetlajsojtlalis yejuan xkaman tlamis,
niman pampa kichiua uejueyi tetlatlachalistin
impampa on tlaltikpaktlakamej.
22 Ma kimakakan uentli de tlaxtlauijli,
niman ma kitetlajtlajtouilikan ikan paktli
nochi on tlen yejua kichiua.
23 On tlanamakakej yejuan kistinemiyaj ipan mar,
yayaj miyekan ipan inbarcos.
24 Niman ijkuak yayaj itlajkotian on mar,
okintakej on tetlatlachalistin yejuan toTEKO kinchiuaya.
25 ToTEKO otlanauatij chikauak ma ajakakiaui,
niman on akoxonaltin sanoyej tlakpak onajkokkej.
26 Nesiya ken ajsiya hasta ipan cielo,
niman ijkuak uajchapaniya,
ajsiya hasta kampa más uejkatlan ijtik on mar.
¡Niman on tlanamakakej sanoyej onomojtijkej!
27 Hasta uejuetsiyaj ken tlauankej ipampa innemojtil.
¡Xitlaj ika okimpaleuij
maski kuajli kixmatiyaj ken kistinemiyaj ipan mar.
28 Pero ipan intlajyouilis,
onoueyikatsajtsilijkej itech toTEKO,
niman yejua okinmanauij ipan on intlajyouilis.
29 ToTEKO okiteltij on ajakakiautli,
niman on akoxonaltin xok onajkokkej.
30 Niman ijkuak on tlanamakakej okimatkej xok koxoni on mar,
sanoyej opakkej,
niman Dios okinuikak kampa kinekiyaj ajsiskej.
31 Ma kimakakan tlaxtlauijli toTEKO
ipampa itetlajsojtlalis yejuan xkaman tlamis,
niman pampa kichiua uejueyi tetlatlachalistin
impampa on tlaltikpaktlakamej.
32 ¡Ma kiueyiteneuakan
ijkuak nosentlaliaj inuan nochimej itlapejpeniluan Dios!
Ma kiyekteneuakan
ijkuak san sekan nemij inuan on ueuetkkej tlayekankej!
33 ToTEKO kinuatsa on ríos niman on ameyaltin,
niman kinkaua tlauakkan kenon xalpatlajkan.
34 Yejua kichiua
para makasa ma tlatlaki ipan on tlaltin
kampa kuajli tlatlakiya,
pampa on yejuan ompa chanejkej sanoyej xompayejyeuamej.
35 Pero no, kichiua ma onya amanaltin ipan on xalpatlajkan,
niman kimeyaltia atl ipan on tlaltin kampa tlauakkan.
36 Niman ompa kinchantia on yejuan apismikij,
niman yejuamej kichijchiuaj inuejueyikalpanuan.
37 Kemaj tlatôkaj, niman kitôkaj uvas.
Niman ijkuak yotlatlak, miyek kipixkaj.
38 ToTEKO sanoyej kintiochiua
niman más kinmiyekilia.
Niman no, más kinmiyekilia inyolkauan.
39 Pero tla peua mikij niman xok miyekiyaj
pampa on xompayejyeuamej sanoyej kintlajyouiltiaj,
niman okseki tlamach xkuajli impan nochiua,
40 ToTEKO kincastigaroua on xompayejyeuamej,
niman kichiua para ma nopojpolokan
ipan on xalpatlajkan kampa xitlaj ojtli.
41 Pero toTEKO, kinkixtilia ajmantli on mayankej;
¡kichiua para ma miyekiyakan infamilias
ken inyolkauan miyekiyaj!
42 Ijkuak on tlakamej
yejuan yolchipajkej ijkin kitaj, sanoyej pakij,
niman on xompayejyeuamej nokamatsakuaj.
43 On yejuan kuajli itlamachilis,
kajsikamatis tlinon kijtosneki nochi in,
niman kajsikamatis ken toTEKO sanoyej tetlajsojtla
ikan sen tetlajsojtlalistli yejuan xkaman tlamis.