Yoniktlalij ipan noyojlo para nimitsyekteneuas
(Sal 57.7-1; 60.5-12)
108
NoDios, nochi noyojlo niktlalia motechniman nimitskuikatlalis ikan yekteneualistli.
Xtlacha noalmajtsin,
2 para nitlatsotsonas ikan arpa niman ikan salterio.
¡Ninokuiteuas uejkakualkan
para niktlachaltis on yejkuik tonajli!
3 Nimitsyekteneuas noTEKO ixpan nochi tlakatl;
nimitskuikatlalis inmixpan on naciones.
4 Ijkon nikchiuas
pampa on motetlajsojtlalis yejuan xkaman tlamis
sanoyej ueyi, hasta ajsi ipan cielo.
Niman on moyolmelajkilis, ajsi hasta ipan moxtli.
5 Tejua noDios, más tiueyixtikaj ipan cielo.
¡Moueyilis kitemiltia nochi in tlaltikpaktli!
6 ¡Xtechnankili! ¡Xtechmakixti ikan mopoder!
¡Xtechmakixti tejuamej yejuan titechtlajsojtla!
7 Dios ijkin okijtoj ipan iyektiopan:
"¡Ikan miyek paktli nikinxelouilis nokoneuan
on tlajli Siquem niman on ixtlauatl Sucot!
8 On ueyitlalpan de Galaad niman on ueyitlalpan de Manasés
nejua noyaxkauan.
Efraín ken yejua casco yejuan ika nomanauiyaj nokoneuan,
niman Judá ken yejua notopil yejuan ika nitlamandaroua.
9 On ueyitlalpan Moab ken sen ajpastli kampa ninomajtekiya.
Ipan on tlajli Edom nikontlajkalis nokak,
para nikteititis ika on ueyitlalpan noyaxka.
¡Chikauak nitsajtsis pampa nikintlanis on filisteos!"
10 ¿Akinon nechuikas ipan on ueyikalpan
yejuan tepanyeualtsakutikaj?
¿Akinon nechyekanas hasta ne Edom?
11 Pampa tejua noDios yotitechtlalkauij,
¡xok tiau iminuan tosoldados ijkuak ontlauijsokij!
12 Xtechpaleui ma tikinmixnamikikan on totlauelikniuan,
pampa maski in tlaltikpaktlakamej techpaleuiskej,
sanenkaj yes.
13 Ikan itlapaleuil toDios titetlaniskej;
¡yejua, impan chojcholos on totlauelikniuan!