David kitlajtlanilia on más ueyixtikaj Juez para ma tetlakuepilti
109
Ay noDios, nejua nimitsueyiteneua.Itlaj xkijto,
2 pampa on tlakajkayajkej niman xompayejyeuamej xkuajli
tlen nechteneuiliaj,
niman sanoyej nechtlajtolketsteuiliaj.
3 Sa nochiuiyan nikaki ika sanoyej nechtlauelitaj,
¡nechuijsokij maski xitlaj nikinchiuilia!
4 Maski nejua nikintlajsojtla,
yejuamej nechtlajtolketsteuiliaj,
pero nejua ninouiyikatsajtsilia impampa.
5 Maski nikchiua tlen kuajli impampa,
yejuamej nechtlaxtlauiliaj ika tlen xkuajli.
Niman maski nejua nikintlajsojtla,
yejuamej sanoyej nechtlauelitaj.
6 Xkintlalili sen teyolkuitijketl yejuan xompayejyeua
para kiyolkuitis notlaluelikniu,
niman Satanás ma kiteixpanui.
7 Ijkuak kiyolkuitiskej, ma kijtokan ika kipiya tlatlakojli,
niman iueyikatsajtsilis sano yejua ika ma kitlajtlakolmakakan.
8 ¡Maka uejkauis nemis,
niman okse tlakatl ma kichiua itekiu!
9 ¡On ikoneuan, ma nokauakan iknomej,
niman on isiuau, ma nokaua kauajli!
10 ¡On ikoneuan makasa ma kipiyakan iminchan,
niman ma notlajtlayeuikana!
¡Ma kinuajkixtikan iminchan, kampa tlaxoxotontok!
11 Nochi on tlen kipiya,
ma kuili on yejuan kitetlanejtia tomin.
Nochi on tlen yokitlan ipan itekiu, ma kichtekilikan.
12 Maka yakaj ma kikneli,
nion maka yakaj ma kinmikneli ikoneuan iknomej.
13 Ma popoliuikan on iuejkakoneuan,
niman ma popoliui imintlakamekayo para nochipa.
14 Maka tikelkauas noTEKO, on ixompayejyeualis itataj,
niman maka kaman tikpopolos itlajtlakol inanaj.
15 Tejua noTEKO, nochipa xkelnamiki imintlajtlakol,
niman xchiua para makasa kaman ma kinmelnamikikan
ipan in tlaltikpaktli.
16 Yejua, xkaman oteiknelij,
yej okintotokatinen
on yejuan mayankej niman yejuan yolyemankej,
niman no, on yejuan tlajyouiyaj,
hasta kaman okinmiktij.
17 Ijkon tej, pampa okuelitak tlauelijli,
¡tejua xtlaueli!
Pampa xokinek tlatiochiualistli,
¡maka kaman tiktiochiuas!
18 On tlauelijli ma kitlapacho ken itlaken yeskia,
niman ma kalaki ipan ijti niman ipan iomiyouan
ken itlaj atl noso ken itlaj aceite yeskia.
19 ¡Ika ma tlapachiui on tlauelijli ken tlakentli yeskia,
niman ma kitilini ken itlaj ilpikatl yeskia!
20 ¡Ijki tej noTEKO, xkintlaxtlauili notlauelikniuan,
on yejuan xkuajli tlen nechteneuiliaj!
21 Pero nejua noTEKO, xnechpaleui ken otinechprometerouilij
para nochi tlakatl ma mitstlakaita.
¡Xnechmakixti, pampa motetlajsojtlalis sanoyej kuajli!
22 Nejua sanoyej nimayanki niman nitlajyouiya.
Noyojlo sanoyej nokokoua.
23 Machisti nipopolijtiu kenon tlaseuajlotl,
¡on ajakatl nechajkotoktia ken sen chapolin!
24 Pampa xnitlakua, semi yoniteuak,
niman noteteponuan kuekuetlakaj pampa xok nikojtik.
25 ¡Aman sa nochimej noka uetskaj!
¡Ijkuak nechitaj, hasta nokuatlajkalij ika nechpijpinauiyaj!
26 Xnechpaleui noTEKO Dios,
¡xnechmakixti ika motetlajsojtlalis yejuan xkaman tlamis!
27 Ma kimatikan noTEKO,
ika tejua otinechmakixtij ikan mopoder.
28 Tla oksekimej nechtlaueliaj, tejua xnechtiochiua.
Yejuamej ma pinauakan chika nejua nimotekitkau ma nipaki.
29 ¡Sanoyej ma pinauakan on notlauelikniuan!
¡Ika ma tlapachiuikan on pinaualistli
ken itlaj capa kintlapochoskia!
30 Nejua ikan nokamak nikmakas ueyi tlaxtlauijli* toTEKO.
Nikyekteneuas tetsajlan kampa sanoyej tojlan,
31 pampa yejua ipan tlajtoua on yejuan mayanki,
niman kimanauiya de on yejuan kitlajtlakolmakaj.