Itech toTEKO tikseliaj nochi tlen kuajli
16
¡NoTEKO, xnechmanaui,pampa motech niktlalia nochi noyojlo!
2 Nejua yonimitsijlij ika tejua tinoTEKO.
Nochi tlen kuajli yejuan nikpiya, tejua otinechmakak.
3 On yolchipajkej yejuan tlaneltokaj
yejuan nemij ipan in país
yejuan san ika nokauaj nechmauistiliaj,
imintech ninoyoltaliaj ikan paktli.
4 Pero on yejuan kinneltokaj on tlamachijchiualtin dioses
sanoyej najmanaskej.
¡Nejua xkaman iminuan nitlauentlalis ika on uentli
yejuan kipiya yestli.
¡Xkaman nikteneuas imintoka on ídolos!
5 NoTEKO, tejua timochiua nochi para nejua,
tinechmaka miyek tlatiochiualistli,
nonemilis ipan momatsin onkaj.
6 Sanoyej kualtsin on tlajli yejuan otinechmakak,
¡on herencia yejuan notech onokau sanoyej kualtsin!
7 Nikyekteneuas noTEKO, pampa yejua nechyekana;
hasta ijkuak tlayoua nechijlia kenijki kuajli ninouikas.
8 Nikmati ika noTEKO nochipa nemi nouan.
Yejua nemi noyekmakopa,
niman xkaman itlaj nopan nochiuas.
9 Yejua ika, ipan noyojlo niman ipan noalma onkaj miyek paktli.
Ipan notlalnakayo noyolika ninemi,
10 pampa xtinechkauas ipan tlalkontli,
nion xompa tikauas ma palani notlalnakayo.
11 Tejua tinechititis on ojtli yejuan teuika ipan nemilistli.
Onkaj miyek pakilistli tejua motech.
On pakilistli xkaman tlamis ne mouan.