David kitlajtlanilia Dios melajkilistli
17
NoTEKO, ¡xkaki ika nimitsueyikatsajtsilia para nikselis melajkilistli!
!Xkaki ika nimitstlajtlanilia para tinechpaleuis!
¡Xkaki ipan nooración pampa ika melauak xnimitskajkayaua!
2 ¡Tejua xkita tla nikpiya tlajtlakojli, pampa tejua tinechixmati!
¡Tejua xnechtlajtlakolmaka tla ijki tikita kuajli,
pampa tejua tinechixmati!
3 Tejua ueli kuajli tikita tlinon niknemilia;
ipan tlayoua ueli tinechita.
Maski yotinechtlatlatak,
yotikitak ika xonkaj tlen xkuajli nopan.
Nejua xitlaj* nikamaijneua tlen xkuajli,
4 ken oksekimej kichiuaj.
Nejua xokuitlaj nikchiua ikan tlauejli
ijkon ken tejua titlanauatia.
5 Nochipa ninemiya ipan moojui.
Xkaman nikaua moojui.
6 NoDios, nejua nimitsnotsa,
pampa nikmati ika tejua tinechnankilis.
Nimitstlajtlanilia xnechkaki;
xkaki tlinon nimitsijlia.
7 Xnechmelajkaititi ika tinechtlajsojtla,
tejua akin tikinmanauiya mokoneuan de intlauelikniuan
yejuan kitejtemouaj mopoder para nomanauiskej.
8 Xnechejeua ken itlaj mixtlilijkayotsin;
xnechiyana ikan momastlakapaluan
ijkon ken sen kuanaka kinmiyana ikoneuan.
9 Xnechmanaui de on xkuajkualtin tlakamej
yejuan nechmiktisnekij,
de on notlauelikniuan
yejuan yonechyejyeualojkej!
10 Yejuamej xteikneliaj,
yej noueyimatij.
11 Sa nisiu nechajtokaj niman nechyejyeualouaj.
Yejuamej sa nechchajcha para nechmiktiskej.
12 Yejuamej ken itlaj leones yejuan nechchajcha,
ken leones yejuan yoniyankej para kajsiskej on yolki
yejuan kikuaskej.
13 NoTEKO, xmokuiteua.
¡Tejua xkinmixnamiki
niman xkinchiualti mixpan ma notlakuantelketsakan!
Tejua xnechmanaui ikan moespada
itech on xompayejyeua tlakatl.
14 NoTEKO, xnechmanaui intech yejuamej ikan mopoder.
¡Xkinkixti ipan in tlaltikpaktli yejuan okiselijkej ken herencia!
Xkinuajtitlanili nochi on castigo
yejuan tikejtikaj para yejuamej,
niman no xkincastigaro inkoneuan niman ixuiuan.
15 Pero nejua, uej, noyolika ninemis
ijkuak tinechteneuas ika xnikpiya tlajtlakojli.
Ijkuak niuajnotlachaltis, nikitas moxayaxtsin
yejua ika noyolika ninemis.