David kimaka tlaxtlauijli toTEKO pampa otetlan
18
NoTEKO, tejua motech niyolchikaui;tinotemanauijkau.
¡Nejua nimitstlajsojtla!
2 Tejua tinoDios yejuan ken tisen tetl kampa niniyana;
¡tinechejeua niman tinechmanauiya!
Tejua ken itlaj tinoescudo*yejuan nechmanauiya.
Tinechmanauiya ikan mopoder,
niman xtenechtemaka intech notlauelikniuan,
yej kuajli tinechiyana.
3 NoTEKO, tejua mitsmelaua* tikselis mauistilistli,
pampa ijkuak nimitsnotsa,
tinechmanauiya intech notlauelikniuan.
4 On mikilistli ye nechmiktiaya ika imekayouan ipan nokechkojyo.
Notlauelikniuan ken ueyi atl, yejuan sanoyej onechmojtij
hasta oniknemilij ika nimikiskia.
5 On mikilistli onechmamalin ika on mekatl.
¡Oniuetsito ipan uejueyi tlatlalijli yejuan temiktia!
6 Ijkuak najmankamikiya, oniknots noTEKO.
Oniktlajtlanilij noDios ma nechpaleui,
niman yejua onechkak desde ne ipan iyektiopan
kampa yejua nemi.
¡Okak ijkuak oniktsajtsilij!
7 Kemaj otlalolin sanoyej chikauak.
On tepemej chikauak ouiuixkakej desde ipeuyan.
Otlalolin chikauak pampa toTEKO okualan.
8 Iyakak okis miyek poktli,
niman ikamak kisaya miyek tlitl
yejuan nochi kitlatia.
¡No ijki, ipan ikamak kixtiaya tlixochtli
yejuan uajkauantiaya!
9 Kemaj toTEKO okitlapoj on cortina
yejuan ika tsakutikatka on cielo,
niman ouajtemok.
¡Ikxitlanika onkatka tilauak moxtli!
10 Niman otlejkok ipan sen querubín*,
niman kemaj opatlan.
Opatlan ipan imastlakapaluan on ajakatl.
11 Yejua oniyan ijtik on tlayouajlotl,
ijtik on tilauak moxtli yejuan kipiya atl.
12 Sen tlastajlotl sanoyej teixkuilij ouajkis itech toTEKO.
Kemaj ipan on moxtli opeu uajxini tejsiutli iuan tlixochtli
yejuan uakauantiaya.
13 ToTEKO yejuan más Ueyixtikaj,
okakistik itlajtol ken itlaj tlakomonajli ne ipan cielo,
niman uajxiniya tejsiutli iuan tlixochtli yejuan uajkauantiaya.
14 ToTEKO okuajtitlan tlapetlanalistli imimpan notlauejikniuan,
ken uajtlamotlaskia ikan itlaminaluan,
niman on notlauelikniuan ontlatlaksakej.
15 Ijkuak toTEKO okinmajuak itlauelikniuan,
ipan iyakak okis chikauak ajakatl,
niman on mar hasta onesiko ijtik kampa ontlantikaj
niman in tlaltikpaktli no hasta onesiko kampa onkaj ipeuyan.
16 Dios okuajtlalij imatsin desde ne tlakpak niman onechkitskij,
niman no, ika imatsin onechkixtij de ijtik on sanoyej ueyi mar.
17 Onechmanauij intech on notlauelikniuan
yejuan más kojtikej xken nejua,
yejuan sanoyej nechtlauelitaj
niman más kotikej katkaj xken nejua.
18 Onechuijsokej ijkuak miyek tlajtlamach nechajmanaya,
pero toTEKO onechpaleuij.
19 Onechuikak kampa xitlaj* nechpajsolos.
¡Yejua onechmanauij pampa nechtlajsojtla*!
20 ToTEKO yonechmakak notetlayokolil
yejuan nechmelaua* nikselis,
pampa kuajli ninouika.
Yejua nechtiochiua
pampa xnikpiya tlajtlakojli.
21 Nejua xkaman nikaua ijoui toTEKO.
¡Xkaman ixkonejeua noDios para nikchiuas on tlen xkuajli!
22 Nejua xkaman nikelkaua itlanauatiluan.
¡Xkaman nikinkaua ileyes!
23 Yejua kimati ika xnikpiya tlajtlakojli,
niman yonikajkau on tlen xkuajli.
24 ToTEKO yonechmakak notetlayokolil
yejuan nechmelaua* nikselis,
pampa kuajli ninouika.
Yejua nechtiochiua
pampa kuajli ninouika ixpan.
25 NoTEKO, tejua nochipa tikchiua on tlen tikprometeroua
intech on yejua nochipa mitstlakamatij,
niman no tikchiua nochi tlen kuajli
para on yejuan kuajli nouikaj.
26 Tejua tiintlajsojkaikniu on
yejuan yolchipajkej,
pero timochiua intlauelikniu on
yejuan xompayejyejkej.
27 Tejua tikmakixtia yejuan yolyemanki,
pero tikchiualtia ma nokneli yejuan noueyimati.
28 NoTEKO, tejua tinechpiya ipan tlauijli.
NoDios, tejua tikchiua ma tlauilpanti kampa tlayouatok ninemi.
29 Tejua tinechpaleuis para nikintlanis notlauelikniuan,
niman tinechpaleuis para nikpanos imintepanchinan.
30 Iojui noDios sanoyej melajki;
on tlen yejua kiprometeroua melauak kichiua.
¡Yejua kinmanauiya yejuan itech kitlaliaj inyojlo!
31 ToTEKO, san yejua Dios;
xnemi okse dios yejuan uelis techmanauis.
32 Dios yejua nechyolchikaua;
yejua nechpaleuiya para kuajli ninouika.
33 Yejua nechpaleuiya para nitlaksa ken itlaj masatl;
yejua nechpaleuiya para xniuajuetsi kampa tlakpak.
34 Yejua nechmachtia ken nitetlanis;
yejua nechpaleuiya para nimakojkojtik,
para niueli nitlamotla uejka
ika on arco tlaminajli yejuan de bronce.
35 Tejua noDios, tinechmanauiya niman tinechmakixtia;
tinechkitskia ikan ipoder moyekma,
motetlajsojtlalis* yokichiu para nochi kuajli ma kisa nouan.
36 Tejua, tikuektlalia noojui
para maka niuetsis.
37 On notlauelikniuan onikintojtokak niman onikinmajsito,
niman xoniuajnokuepato hasta kaman otlan nikinmiktia.
38 Sanoyej onikinmajmailij hasta xok ouel onokuitejkej.
¡Ijkon oxinkej nokxitlan!
39 Tejua otinechmakak poder para onitetlan ipan on nouijsokilistli.
Otikchiu para nixpan ma notlakuantelketsakan on yejuan xipan teitaj,
40 niman otikchiu para ocholojkej on notlauelikniuan,
para ijkon onikintlan on yejuan nechtlauelitayaj.
41 Tsajtsiyaj para ma kimpaleuikan,
pero xakaj okimpaleuij.
Onoueyikatsajtsilijkej itech toTEKO,
pero yejua xokiminnakilij.
42 ¡Onikinkuejkuechtilij ken itlaj tlalteutli
yejuan ajkotokoua ikan ajakatl!
¡Onikinchojcholoj ken itlaj sokitl
yejuan onkaj ipan on kalpan ojtli!
43 Otinechmanauij intech on tlakamej xompayejyeuamej,
otinechtlalij tlayekanki ipan on naciones,
niman aman nikimpiya notekiuajkauan
yejuan xnikinmixmatiya.
44 Ijkuak itlaj nikinnauatia, nechtlakamatij.
Nochi tlakatl yejuan xchanej nomojtia
niman kuekuetlak nixpan.
45 On yejuan xchanejkej nomojtiaj
niman kuekuetlakaj nixpan.
Uajkisa kampa niyantikatka uajkuekuetlakatiu
niman notemaka.
46 ¡Ma kiueyiteneuakan noTEKO!
¡Ma kiyekteneuakan on akin nechmanauiya!
¡Nikueyiteneua noDios, noTemakixtijkatsin!
47 Yejua Dios yejuan tetlakuepiltia san nopampa,
niman yejua kichiua para on notlauelikniuan ma nikintlani.
48 Yejua nechmanauiya intech notlauelikniuan,
de on yejuan xipan teitaj,
yejuan onokuitejkej para nechixnamikiskej.
¡Tejua noTEKO, tinechmanauiya de on tlakamej xompayejyeuamej.
49 Yejua ika, nimitsueyilia imixpan on naciones
niman ninokuikatia on kuikamej de ueyiteneualistli.
50 NoTEKO nechmaka uejueyi tetlanilistin,
nejua yejuan nirey, yejuan yonechtlapejpenij.
Nochipa nechpiya ikan itetlajsojtlalis*
nejua David niman nochimej nouejkakoneuan.