Iueyilis Dios onkaj ipan nochi on tlajtlamach
19
On cielo kipannextia iueyilis toTEKO,niman nochi on tlen onkaj tlakpak yejuan tikitaj,
techititia nochi tlen Dios okichijchiu.
2 Cada tonajli kinojlijtiuij on tlen Dios okichiu,
niman cada tlayouaj no techititia itlamatkilis Dios.
3 Maski xitlaj* tlajtojli kakisti
nion xakaj nauati,
4 on intlajtol kakisti imanian in tlaltikpaktli.
Niman imintlajtol ajsi hasta kampa ontlami in tlaltikpaktli.
Ne ipan cielo, Dios okitlalij kampa onyas on tonaltsintli.
5 Niman on tonaltsintli sanoyej paki
ijkuak uajkisa para oksejpa peua nejnemi.
Ken sen novio ijkuak uajkisa ipan on kajli kampa nonamiktia.
Niman ken sen tlakatl yejuan sa kicha notlalos
para teuan notlatlanis.
6 On tonaltsintli uajkisa ipeuyan on cielo,
niman ijkuak nejnemi, ajsi hasta oksekan inakastlan on cielo.
Xakaj ueli niyana de on itonajlo.
7 Iley toTEKO nochi kuajli,
pampa kitemaka yenkuik nemilistli.
On tlen kijtoua toTEKO ipan ipacto* xkaman nopatlas,
niman kimaka tlamatkilistli yejuan xe tlamachiliskui.
8 On sesekneka itlanauatiluan toTEKO sanoyej melajkej,
pampa kitemakaj yolpakilistli.
Itlanauatil toTEKO sanoyej kuajli ajsitikaj,
xitlaj kipoloua,
niman techititia ma tiktokakan on kuajli ojtli.
9 On ipanteitalistli para toTEKO, sanoyej kuajli,
niman xkaman popoliui.
On itlanauatiluan toTEKO kijtouaj tlen melauak;
cada se kijtoua tlen kuajli.
10 ¡On itlanauatil toTEKO más sanoyej kuajli,
xken on oro yejuan más patioj,
niman más tsopelik xken on nekutli
yejuan kisa ipan on tekamasosojli! !
11 Nejua nimotekitkau, nikmati tlinon nopan nochiuas
tla xnikintlakamati motlanauatiluan.
Niman tla nikintlakamati, ueyi tetlayokolijli* nikpiyas.
12 ¿Akinon ueli kimati nochi on tlajtlakojli
yejuan niyana ipan iyojlo?
¡Xnechtlapojpolui noTEKO
pampa kamanian xnikmati tlinon xkuajli nikchiua!
13 Xnechpaleui nejua nimotekitkau,
para maka ninoueyimatis.
Maka nechyekanas on noueyimatilistli.
Ijkon, nichipajkanemis, niman xitlaj* tlajtlakojli nikpiyas.
14 ¡NoTEKO, tejua tinotemakixtijkatsin akin tinechmanauiya!
Xseli ikan paktli tlinon nikijtoua
niman tlinon nikpiya ipan noyojlo.