Ueyikatsajtsilistli para tetlanilistli
20
Ma toTEKO mitsnenkijli ijkuak tikpiya ajmantli;iDios Jacob ma mitsmanaui.
2 Ma Dios mitspaleui desde ne ipan iyectiopan,
niman desde ne Jerusalén.
3 Ma kelnamiki nochi on mouen yejuan tikmaka,
niman ma kiseli ikan paktli on mouen yejuan nochi tlatla.
4 Ma mitsmaka on tlen ika nochi moyojlo tikneki tikpiyas,
niman ma mitspaleui
para xchiua nochi tlinon tiknemilia tikchiuas.
5 Ijkuakon, kemaj tinochimej tipakiskej ipampa motetlanilis,
niman tikimpiloskej on banderas ikan itokatsin Dios.
¡Ma toTEKO mitsmaka nochi tlen tiktlajtlanilia!
6 Aman, nejua kuajli nikmati ika toTEKO kimakas tetlanilistli
on rey yejuan yokitlalij,
ika yejua kinankilis desde ne kampa nemi ipan on yektli iluikak,
niman ika ipoder kipaleuis
para nochipa ma kipiya uejueyi tetlanilistin.
7 Sekimej kinemiliaj tetlaniskej
ipampa imincarretas de guerra niman ipampa imincaballos,
pero tejuamej tikmatij ika tikpiyaskej tetlanalistli
ipampa toTEKO Dios.
8 Yejuamej teteponkuejkuelpachiuij, niman uetsij,
pero tejuamej sanken* kuajli tinejnemij niman xtiuetsij.
9 NoTEKO, ¡Xchiua para ma tetlani on rey!
¡Xtechnankili ijkuak timitsnotsaskej.