Ueyikatsajtsilistli de tetlanilistli
21
NoTEKO, on rey sanoyej paki pampa otikmakak poder para otetlan.
¡Yejua sanoyej paki pampa otikpaleuij para otetlan!
2 Yotikmakak on tlen ika nochi iyojlo kinekiya kipiyas;
nochi otikmakak on tlen omitstlajtlanilij.
3 Otikselij ikan miyek tlatiochiualistli
niman otiktlalij ipan itsontekon sen corona
yejuan tlachijchijtli ikan oro yejuan más kuajli.
4 Omitstlajtlanilij nemilistli, niman tejua otikmakak;
Ueyi nemilistli otikmakak niman para nochipa.
5 Pampa tejua otikpaleuij, aman sanoyej kipiya poder;
otikmakak tlakaitalistli niman ueyilistli.
6 Yotiktiochiu para nochipa;
sanoyej kipiya pakilistli pampa tinemi iuan.
7 On rey xkaman uetsis pampa kitlalia iyojlo itech toTEKO.
¡Kitlalia iyojlo itech itetlajsojtlalis on Ueyixtikaj Dios,
itetlajsojtlalis yejuan xkaman tlamis!
8 Ika mopoder tikintlanis nochimej motlauelikniuan;
ika moyekma tikintlanis on yejuan mitstlauelitaj.
9 Tikominxinis ijtik sen horno yejuan tlikuitikaj,
ijkuak tiuajlas para titeyolkuitis.
ToTEKO ikan itlauel, kintlatis nochimej
niman kimpopolos ikan tlitl.
10 Tikimpopolos ipan in tlaltikpaktli nochimej inkoneuan;
tikimpopolos ipan in tlaltikpaktli nochimej inuejkakoneuan.
11 Maski kinekiskej mitschiuiliskej tlen xkuajli,
niman sa kinejnemilijtiaskej tlen xkuajli motechkopa,
xkaman uelis itlaj mitschiuiliskej,
12 pampa tejua tikintotokas,
ijkuak moarco tikinmelauilis para tikinmotlas.
13 ¡NoTEKO, xkiteititi moueyi poder!
¡Ma titlaluichiuakan ikan kuikamej
niman ueyiteneualistli ipampa motetlanilis!