Ajmankatsajtsilistli niman kuikatlalijli para toTEKO
22
NoDios, noDios,¿tline yotinechtlalkauij?
¿tline xtiuajlau para tinechamanauis?
¿tline xtikita nochokilis?
2 No Dios, nochi tonajli nimitsnotsa niman xtinechnankilia.
Niman nochi tlayoua nimitsnotsa niman xnikselia neseuijli.
3 Pero tejua tiyektli;
tejua tirey, niman on israelitas mitsueyiteneuaj.
4 Totajuan okitlalijkej inyojlo motech;
okitlalijkej inyojlo motech,
niman tejua otikinmanauij.
5 Omitstlajtlanilijkej xkimpaleui,
niman tejua otikinmanauij;
okitlalijkej inyojlo motech,
niman tejua xotikinkau.
6 Pero nejua maski nitlakatl,
ninomati ken sen niokuilin yeskia;
¡nejua noka uetskaj
niman nechchichiita nochi tlakatl!
7 Yejuan nechitaj nechpijpinauiyaj;
nechtempilichiuiliaj
niman hasta nokuauiuixouaj.
8 Kijtouaj:
"Yejua in tlakatl, okitlalij iyojlo itech toTEKO;
tla ijkon, yejua ma kimakixtiki."
Tla iTEKO kitlajsojtla, ma kimanauiki".
9 Tejua otikchiu para ma nitlakati itech nonanaj,
niman kemaj otikchiu para ma nechnapalo nonanaj.
10 Desde ijkuak nejua xe ninemiya,
tejua ye tinechcuidarouaya;
desde ijkuak ninemiya ijtik nonanaj,
tejua ye tinoDios katka.
11 Maka tej, tinechkauas,
pampa on tlajyouilistli ye notech yejkotikaj,
niman xnikpiya akin nechpaleuis.
12 On notlauelikniuan yonechyejyeualojkej ken itlaj toros,
kenon tlauelejkej toros yejuan ualeuaj ipan on ueyitlalpan Basán.
13 Nanalkaj ken itlaj leones yejuan sanoyej tlauelejkej,
hasta kamakoyauij niman nopan yauij.
14 Yoninokau ken itlaj atl yejuan toyaui;
noomiyouan yokejkelonkej;
noyoltsin yonokuep ken itlaj cera yejuan pâti nojtik.
15 Sanoyej yonikamauak hasta xok ueli nitlajtoua;
nonenepil hasta yopepechiuito nokopak.
¡Yotinechkau ipan on tlalkuechtli
ken yakaj mikatsintli!
16 On tlakamej xompayejyeuamej yonechyejyeualojkej
ken itlaj chichimej;
nomauan niman nokxiuan onechinkojkoyonilijkej.
17 Hasta ueli nikita keski omitl nikpiya,
niman on notlauelikniuan sanoyej nechtlajtlataj
niman nechixkechiaj.
18 Okojkotonkej notlaken niman okinomajmakakej,
niman ipan okichijkej suertes.
19 Pero tejua noTEKO yejuan tinechmaka fuerzas,
¡maka xnechtlalkaui,
yej amanaman xuajla para xnechpaleuiki!
20 Xmanaui nonemilis de on espada;
maka tinechkauilis nechmiktiskej on chichimej.
21 Xnechpaleui maka nechkuaskej on leones;
¡xnechpaleui maka nechtejteuiskej on tepeuakaxtin!
22 Nejua, nikinnojnotsas nokniuan de tejua,
niman nimitsueyiteneuas imintsajlan on yejuan mitsneltokaj,
ijkuak nosentlaliaj para mitsmauistiliaj.
23 ¡Xkueyiteneuakan toTEKO nemejuamej yejuan nenkitlakaitaj!
¡Xkititikan tlakaitalistli nemejuamej ikoneuan Jacob!
¡Xmauistilikan nemejuamej ikoneuan Israel!
24 Yejua xkichichiua
nion xkichichiita intlajyouilis yejuan mayankej,
niman xniyana de yejuamej.
¡Yej kaki ijkuak se kinotsa para ma kipaleui!
25 Nimitsueyiteneuas imixpan on tojlamej yejuan mitsneltokaj
ika nochipa tikchiua on tlen tikprometeroua.
Imixpan on yejuan mitstlakaitaj
nimitsmakas nochi tlen onimitsprometerouilij.
26 Nemejuamej yejuan mayankej,
xtlakuakan hasta kampa nemixuiskej.
Nemejuamej yejuan nenkitejtemouaj toTEKO,
xkueyitenauakan, niman xpiyakan ueyi nemilistli.
27 Nochi tlakatl de nochimej naciones,
yejuan nennemij imanian in tlajtikpaktli,
xkelnamikikan toTEKO niman xuajlakan itech.
¡Xmotlakuantelketsakan itech!
28 Ijkon xchiuakan pampa toTEKO yejua rey,
niman yejua tlamandaroua ipan nochi naciones.
29 Xmotlakuantelketsakan niman xmauistilikan san yejua,
nemochimej yejuan xitlaj* mechpoloua,
nemochimej yejuan nemokuepaskej tlalkuechtli,
pampa nemejuamej xuelis nenkiteltiskej on nemomikilis.
30 Nouejkakoneuan kimauistiliskej toTEKO,
niman nochipa kiteneuaskej yejua ipan nochi innemilis.
31 On yejuan xe tlakatij kintlajtlajtouiliskej
ika toTEKO kichiua tlen melajki,
niman no kintlajtlajtouiliskej nochi on tlajtlamach tetlatlachalistin
yejuan yokichiu.