Dios cuidaroua nochi tlen okichijchiu
104
¡Nikyekteneuas toTEKO ikan nochi noalma!¡Sanoyej tiueyixtikaj noTEKO Dios!
Moyeualkan onkaj ueyilistli niman petlanalistli.
2 Tejua tikmokentijtikaj on tlauijli ken itlaj tlakempani.
¡Tejua otikpatlau on cielo ken itlaj cortina!
3 ¡Otimochantij ne tlakpak ipan on moxtli!
On moxtli ken yejua mocarreta de guerra yeskia,
¡niman on ajakatl yejua mitsuika kampaka tiau!
4 On miyek ajakatl, yejuamej motlajtojkauan,
niman on tlimilinaltin, yejuamej motekitkauan.
5 Otiktlalij in tlaltikpaktli ipan icimientos
para maka kaman ma nejkuani.
6 On mar ken itlaj tlakentli okitlapachoj in tlaltikpaktli,
niman on atl okintlapachoj on tepemej.
7 Pero tejua otikajuak on atl, niman yejua oyaj;
nimantsin oyaj ijkuak okak otlakomon
pampa otiknauatij ma uiya.
8 On atl otemok tlatsintlan de on tepemej
niman ipan on ixtlauamej,
niman oajsik kampa tejua otinauatij ma nokaua,
9 kampa otiknauatij maka kaman kisas
para makasa kaman kitlapachos in tlaltikpaktli.
10 Tejua tikchiua para on atl de on ameyaltin
ma uiyan ipan on ríos
yejuan notlalojtokej intsajlan on tepemej.
11 Ipan on atl, atlij on tepeyolkej,
niman no, ompa atlij on tepepolokomej.
12 Itenko on ríos, onokej on kojtin
kampa on totomej kitlaliaj intepajsol
ipan imajmauan on kojtin,
¡niman ompa nokuikatiaj!
13 Desde ne tlakpak kampa mochan,
tejua tikuajtitlani on kiautli ipan on tepemej.
Ikan on miyek atl, tikchiua para kuajli ma aixui in tlajli.
14 Tejua tikchiua ma noskalti on sakatl yejuan kikuaj on yolkej,
niman no, tikchiua ma noskalti
on tlen kitôkaj on tlaltikpaktlakamej
para ma kipiyakan tlen kikuaskej.
15 On tlakuajli, kiminmaka chikaualistli,
on vino, kiminmaka paktli,
niman on aceite ika noxayakapetlanaltiaj.
16 Ika on atl, no natekiaj on cedroskojtin
yejuan onkaj ne Líbano.
On kojtin sano tejua otikintôkak noTEKO.
17 Ipan on kojtin, on tototsitsimej kitlaliaj intepajsol,
niman ipan on pinos, chantij on totomej cigüeñas.
18 Ipan on uejueyimej tepemej, chantij on tepechivos,
niman ipan on teostomej, chantij on conejos.
19 Tejua otiktlalij on metstli
para kiteititia ijkuak peua cada metstli,
niman on tonaltsintli ye kimatstikaj ijkuak kalakis.
20 Tejua tikchiua para ma tlayoua,
niman ijkuak yotlayouak,
peua kisaj on yolkej de on kojyoj.
21 On leones sa nanalkatinemij pampa apismikij;
kitejtemouaj intlakual yejuan tejua tikinmakas.
22 Pero ijkuak uajkisa on tonaltsintli, yauij,
niman onnotekaj ipan on tekaltin kampa chantij.
23 Niman on tlaltikpaktlakamej kisaj ontekitij;
kichiuaj intekiu hasta tlayouiliaj.
24 ¡Sanoyej miyek tlen otikchijchiu noTEKO!
Nochi on, otikchijchiu ikan motlamatkilis.
¡In tlaltikpaktli tentikaj ikan nochi tlen tejua otikchijchiu!
25 Xkitakan ken ueyi on mar niman ken patlauak.
Ompa sanoyej miyekej yolkej nemij
yejuan pipitikej niman uejueyimej.
26 Ompa kistinemij on barcos,
niman ompa nemi on temojtij yolki itoka Leviatán,
yejuan tejua otikchijchiu para ma nauilti ipan on mar.
27 Nochimej yejuamej, mitschaj
para xkiminmaka intlakual ijkuak apismikij.
28 Tejua tikinmaka intlakual, niman yejuamej kikuaj.
Ijkuak timomatlapoua,
yejuamej kikuaj on tlen más kuajli
hasta kampa ixuij.
29 Tla tikintlalkauiya, sanoyej nomojtiaj;
tla tikinkixtilia innemilis, mikij,
niman oksejpa nokuepaj tlajli.
30 Pero tla tejua tikuajtitlani moespíritu, yejuamej yoliuij,
niman oksejpa tlakualnesi ipan in tlaltikpaktli.
31 ¡Ma onya iueyilis toTEKO para nochipa!
ToTEKO ma kipiya paktli ipan nochi on tlen okichijchiu!
32 In tlaltikpaktli uiuixka ijkuak tejua tikualita;
¡on tepemej popokaj ijkuak tejua tikinmatoka!
33 Chika nejua nikpiya nonemilis,
nikuikatlalis noTEKO Dios.
34 NoTEKO, ma mitspakti nochi on tlen niknemilia,
pampa nejua, san tejua motech niknextia pakilistli.
35 ¡Ma popoliuikan ipan in tlaltikpaktli
nochimej on tlajtlakolejkej!
¡Maka sa ma nemikan on xompayejyeuamej!
¡Nikyekteneuas toTEKO ikan nochi noalma!
¡Ma tikyekteneuakan toTEKO!