Nikyekteneuas toTEKO
103
Nikyekteneuas toTEKO ikan nochi noalma.Nikyekteneuas iyektokatsin ikan nochi nonemilis.
2 Nikyekteneuas toTEKO ika nochi noalma.
Xnikelkauas nion se on tlen kuajli okichiu nopampa.
3 Yejua nechtlapojpoluiya nochi notlajtlakoluan
niman nechpajtilia nochi nokualolisuan.
4 Yejua kimakixtia nonemilis de on mikilistli
niman nechtiochiua ikan tetlajsojtlalistli niman teiknelilistli.
5 Yejua nechmaka nochi tlen kuajli
niman kiyenkuilia nonemilis
no ijki ken kiyenkuilia ijuiyo sen kuaktli.
6 ToTEKO teyolkuitia melajki,
niman kinmanauiya nochimej on yejuan kintlajyouiltiaj.
7 Yejua okititij Moisés
niman on israelitas on tlen kinekiya kichiuas para yejuamej,
niman no okintitij on uejueyitlatlachalistin yejuan okichiu.
8 ToTEKO teikneliani niman kuajli iyojlo.
Yejua xniman kualani
niman nochipa kipiya ueyi tetlajsojtlalistli
yejuan xkaman tlamis.
9 Xnochipa techajua,
nion xuejkaui kualantikaj .
10 Xtechcastigaroua ken kimelaua nochi tlen xkuajli tikchiuaj,
nion xtechcastigaroua ken kimelaua totlajtlakoluan.
11 Itetlajsojtlalis impampa on yejuan kitlakaitaj sanoyej ueyi,
ijkon ken sanoyej tlakpak on cielo de in tlaltikpaktli.
12 Totlajtlakoluan okinmejkuanij totech sanoyej uejka,
ijkon ken uejka ikisayan tonaltsintli hasta kampa ikalakiyan.
13 Ken sen tajtli kintlajsojtla ikoneuan,
toTEKO no ijki kintlajsojtla on yeuan kitlakaitaj,
14 pampa yejua kimatstikaj kenijki otechchijchiu.
Kimatstikaj ika tejuamej titlachijchijtin ika tlalkuechtli.
15 Inemilis sen tlakatl ken itlaj xojtli.
Xochiponi kenon xochitl yejuan onkaj ipan tepetl,
16 pero ijkuak ipan panoua on ajakatl kixpoloua,
niman xok kaman oksejpa kitaj.
17 Pero itetlajsojtlalis toTEKO xkaman tlamis
para on yejuan kitlakaitaj,
niman iyolmelajkilis xkaman tlamis
para nochimej on tekoneuan yejuan uajnentiaskej,
18 para on yejuan kitlakamatij ipacto
niman xkelkauaj para kitlakamatij itlanauatiluan.
19 ToTEKO yokitlalij itrono ne iluikak,
niman kimandaroua nochi tlen onkaj.
20 ¡Xyekteneuakan toTEKO nemejuamej ángeles
yejuan nententokej ikan poder,
niman yejuan nenkichiuaj tlen mechnauatia
niman nenkitlakamatij.
21 ¡Xyekteneuakan toTEKO
nochimej nemejuamej iluikaksoldados yejuan nenitekitkauan
niman nenkichiuaj on tlen yejua kineki.
22 ¡Nochi kech onkaj, niman nemi, niman yoltikaj,
ma kiyektenua toTEKO nochiuiyan kampa tlamandaroua!
¡Nikyekteneuas toTEKO ikan nochi noalma!